Clik here to view.
អាជ្ញាធរគណបក្សកាន់អំណាច នៅតាមបណ្ដាស្រុកមួយចំនួន នៅខេត្តបាត់ដំបងបានដាក់កម្លាំងតាមឃ្លាំមើលសកម្មភាពរបស់មន្ត្រីគណបក្សសង្គ្រោះជាតិ។ ការឃ្លាំតាមដាននេះ ទំនងការពារខ្លាចមានចលនាសង្គ្រោះជាតិកើតឡើងនៅតាមមូលដ្ឋាន។ សមាជិកក្រុមប្រឹក្សាគណបក្សប្រឆាំងខ្លះ សម្ដែងការព្រួយបារម្ភ មិនសូវហ៊ានដើរហើរចេញទៅណាឆ្ងាយពីផ្ទះសម្បែងរបស់ខ្លួននោះទេ។ ប៉ុន្តែអភិបាលស្រុករុក្ខគិរី អះអាងថា អាជ្ញាធរមិនបានតាមឃ្លាំមើលសកម្មជនរបស់គណបក្សប្រឆាំងឡើយ។
មន្ត្រីគណបក្សប្រឆាំងនៅស្រុករុក្ខគិរី បានចាត់ទុកការតាមដានដោយអាជ្ញាធរ គណបក្សកាន់អំណាចមកលើពួកគាត់នេះថា ជាការព្យាយាមបំភិតបំភ័យ និងបំបិទសិទ្ធិសេរីភាពពួកគាត់។
ប្រធានគណបក្សសង្គ្រោះជាតិ ស្រុករុក្ខគិរី លោក សែម ពីរស់ ឲ្យដឹងនៅថ្ងៃទី៨ កុម្ភៈ ថា មួយរយៈចុងក្រោយនេះ អាជ្ញាធរស្រុក និងឃុំរបស់គណបក្សកាន់អំណាចបានដាក់មនុស្សតាមដានសកម្មភាពរបស់ពួកគាត់ស្ទើររៀងរាល់ថ្ងៃ។ លោកបន្ថែមថា សព្វថ្ងៃសកម្មជនរបស់គណបក្សលោកនៅតាមឃុំ ជាពិសេសឃុំព្រែកជីក និងស្ដុកប្រវឹកជាដើម មានការខ្លាចរអា ហើយមិនសូវហ៊ានចេញទៅធ្វើការងារឆ្ងាយពីផ្ទះនោះទេ៖ «អាជ្ញាធរគួរតែកុំធ្វើបែបនេះអី ហើយបើយើងល្អ យើងស្រលាញ់ប្រជាពលរដ្ឋ យើងឲ្យល្អទៅប្រជាពលរដ្ឋស្រលាញ់យើងហើយ។ គ្មានអ្នកណាគេ ទៅបង្កើតចលនាអីទេ ព្រោះទាំងខ្ញុំទាំងប្រជាពលរដ្ឋគឺចង់បានសិទ្ធិសេរីភាព សន្តិភាពគ្មានអំពើហិង្សា ជាពិសេស យើងភ័យខ្លាចណាស់ ពីព្រោះកន្លងមកចេះតែមានព័ត៌មានមិនល្អដែលធ្វើឲ្យយើងចេះតែប្រយ័ត្នប្រយែងខ្លួន»។
លោកបន្ថែមថា សកម្មភាពតាមដានសកម្មជនគណបក្សប្រឆាំងនេះ កើតមានស្ទើរគ្រប់ស្រុក នៅក្នុងខេត្តបាត់ដំបង ក្នុងនោះមានស្រុកសំពៅលូន កំរៀង ភ្នំព្រឹក បវេល និងក្រុងបាត់ដំបងជាដើម។
ឆ្លើយតបនឹងបញ្ហានេះអភិបាលស្រុករុក្ខគិរី លោក ជា សម្បត្តិ មានប្រសាសន៍ថា ចាប់តាំងពីសមាជិកក្រុមប្រឹក្សាគណបក្សសង្គ្រោះជាតិ បញ្ចប់មុខតំណែងមក គឺសកម្មជនគណបក្សមួយនេះហាក់មានភាពស្ងប់ស្ងាត់ ដោយពុំមានការប្រមូលផ្ដុំគ្នាធ្វើចលនាអ្វីផ្សេងៗនោះទេ។
លោក ជា សម្បត្តិ អះអាងទៀតថា អាជ្ញាធរក៏ពុំបានបញ្ជូនកម្លាំងដើម្បីតាមឃ្លាំមើលសកម្មភាពរបស់មន្ត្រីគណបក្សប្រឆាំងនោះដែរ៖ «អានឹងជាអារម្មណ៍របស់ពួកគាត់ទេ ក្នុងនាមខ្ញុំជាអាជ្ញាធរមិនដែលទៅធ្វើអីពួកគាត់ទេ កុំឲ្យតែពួកគាត់ធ្វើអីផ្ដេសផ្ដាសខុសច្បាប់ បើពួកគាត់ធ្វើអីស្របច្បាប់ខ្ញុំមិនដែលទៅរុកទៅកួនស៊ើបអង្កេតអីទេ»។
ទោះជាយ៉ាងនេះក្ដីមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបងលោក យិន ម៉េងលី លើកឡើងថា ការបោះឆ្នោតជ្រើសតាំងតំណាងរាស្ត្រកាន់តែខិតកៀកមកដល់ទៅហើយ គឺអាជ្ញាធរគណបក្សកាន់អំណាចគួរតែបន្ធូរបន្ថយ ដើម្បីធ្វើឲ្យបរិយាកាសមុនការបោះឆ្នោតនេះឲ្យបានប្រសើរឡើងវិញ ហើយក៏មិនត្រូវដាក់កម្លាំងតាមដានសកម្មជនបក្សប្រឆាំងដូចសម័យអាវខ្មៅនោះទេ ពីព្រោះកម្ពុជាជាប្រទេសរបរសេរីពហុបក្ស៖ «ដូច្នេះយើងមិនត្រូវមានការបំបិទសិទ្ធិសេរីភាពពេកទេ ហើយនេះជាសកម្មភាពមួយបើទោះបីមិនចេញជាពាក្យសម្ដីអីទេ គ្រាន់តែថា តាមឆ្វែលជាប់នឹងក៏វាធ្វើឲ្យមានការប៉ះពាល់ដល់ការងាររបស់គាត់ ហើយខ្ញុំគិតថា វាគ្មានបដិវត្តន៍ពណ៌ និងគ្មានចលនាអីកើតមាននៅក្នុងប្រទេសនេះទេ អ្វីដែលកើតនៅក្រៅប្រទេសខ្ញុំគិតថា វាជារឿងមួយផ្សេង»។
កាលពីពេលថ្មីៗនេះលោក សម រង្សី បានបង្កើតចលនាសង្គ្រោះឡើង ដើម្បីទាមទារដោយសន្តិវិធីឲ្យរដ្ឋាភិបាលលោក ហ៊ុន សែនអនុញ្ញាតឲ្យគណបក្សសង្គ្រោះជាតិ បានចូលរួមបោះឆ្នោតជ្រើសតាំងតំណាងរាស្ត្រនៅខែកក្កដា ឆ្នាំ២០១៨៕
