Clik here to view.
រដ្ឋមន្ត្រីក្រសួងទេសចរណ៍ លោក ថោង ខុន ជាថ្មីម្តងទៀតបានអំពាវនាវដល់ប្រតិបត្តិករទេសចរ និងអាជីវករ ពិសេស អាជ្ញាធរ ក្នុងខេត្តព្រះសីហនុ ឲ្យរួមសហការគ្នាថែរក្សាបរិស្ថានឆ្នេរសមុទ្រ ឲ្យមានសោភ័ណភាពល្អ និងអនាម័យជាប្រចាំ ដើម្បីទាក់ទាញភ្ញៀវទេសចរឲ្យចូលមកទស្សនាខេត្តនេះបានច្រើនថែមទៀត។
លោកថា ភ្ញៀវទេសចរជាតិអន្តរជាតិ ដែលចូលមកទស្សនាខេត្តព្រះសីហនុ គឺគេចង់ឃើញ ឆ្នេរ សមុទ្រស្រស់ស្អាត ជាពិសេសសោភ័ណភាពតាមបែបធម្មជាតិ នៃជីវៈចម្រុះក្នុងបាតសមុទ្រ និងធនធម្មជាតិនានា ដែលមាននៅលើកោះនានា។
លោក ថោង ខុន បានលើកឡើងដូច្នេះ នៅក្នុងពិធីប្រកាសទទួលស្គាល់ លោកឧកញ៉ា ទៀ វិចិត្រ ជាប្រធានសមាគមភ្នាក់ងារដឹកជញ្ជូនទេសចរណ៍ជលយាន ប្រចាំខេត្តព្រះសីហនុ កាលពីល្ងាចថ្ងៃពុធ ទី៧ ខែកុម្ភៈ ឆ្នាំ២០១៨ នាសាលប្រជុំសាលាខេត្តព្រះសីហនុ។
លោក យន្ត មីន អភិបាលខេត្តព្រះសីហនុ និងជាប្រធានសមាគមទីភ្នាក់ងារដឹកជញ្ជូនទេសចរណ៍ជលយានថ្មីប្រចាំខេត្តនេះ ក៏ស្នើឲ្យជួយបង្កើនការយកចិត្តទុកដាក់អំពីសុវត្ថិភាពដឹកជញ្ជូនភ្ញៀវទេសចរតាមសមុទ្រ ឲ្យបានខ្ពស់ថែមទៀត ដើម្បីទាក់ទាញកំណើនភ្ញៀវទេសចរជាតិអន្តរជាតិ ឲ្យចូលមកទស្សនាខេត្តនេះ បានកាន់តែច្រើននាបណ្ដាឆ្នាំខាងមុខទៀត។
ឆ្លើយតបបញ្ហានេះ លោកឧកញ៉ា ទៀ វិចិត្រ បានប្ដេជ្ញាថា នឹងខិតខំបំផុសចលនា ឲ្យប្រតិបត្តិករទេសចរទាំងអស់ ដែលជាសមាជិកសមាជិកា របស់សមាគមឲ្យបង្កើនការងារថែរក្សាអនាម័យបរិស្ថានឆ្នេរ ឲ្យបានជាប្រចាំ។
របាយការណ៍របស់មន្ទីរទេសចរណ៍ខេត្តព្រះសីហនុ បង្ហាញថា កាលពីឆ្នាំ២០១៧ ខេត្តនេះ ទទួលបានភ្ញៀវទេសចរសរុបជិត ២លាននាក់ (១,៩៩៥,២០៤ ក្នុងនោះ ភ្ញៀវជាតិមានចំនួនជាង ១លាន ៥សែននាក់ (១,៥២៥,២៨៦) និងអន្តរជាតិ មានជិត ៥សែននាក់ (៤៦៩,៩១៨)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
