លោកនាយករដ្ឋមន្ត្រី លោក ហ៊ុន សែន បានបញ្ជាអាជ្ញាធរឲ្យសិក្សាត្រួតពិនិត្យករណីកម្មករដួលសន្លប់បន្ថែមទៀត នៅពេលករណីដួលសន្លប់កម្មករឆ្នាំនេះមានការកើនឡើង។ សហជីពស្វាគមន៍ចំណាត់ការរបស់លោក ហ៊ុន សែន នៅពេលនេះ ប៉ុន្តែទាមទារឲ្យដោះស្រាយបញ្ហារបស់កម្មករនៅពេលរកមូលហេតុពិតនៃការដួលសន្លប់ឃើញ។
លោក ហ៊ុន សែន បានបញ្ជាឲ្យមន្ត្រីថ្នាក់ក្រោមរបស់លោករកឲ្យឃើញពីមូលហេតុពិតប្រាកដនៃការដួលសន្លប់របស់កម្មករនៅតាមរោងចក្រ។ បញ្ជានេះប្រហែលលោក ហ៊ុន សែន មិនទាន់ជឿជាក់ទាំងស្រុងលើរបាយការណ៍របស់បេឡាជាតិរបបសន្តិសុខសង្គមចេញផ្សាយកាលពីសប្ដាហ៍មុនដែលអះអាងថា មូលហេតុកម្មករដួលសន្លប់ គឺដួលសន្លប់តាមគ្នា មិនមែនជាបញ្ហាធ្ងន់ធ្ងរ។
នៅមុខកម្មករជាង ១៥.០០០នាក់ (មួយម៉ឺនប្រាំពាន់) នៅរាជធានីភ្នំពេញ ថ្ងៃទី៦ ខែកុម្ភៈ ក្នុងពេលលោកជួបសំណេះសំណាលជាមួយកម្មកររោងចក្រលោកនាយករដ្ឋមន្ត្រី លោក ហ៊ុន សែន ក៏បានបញ្ជាឲ្យអ្នកជំនាញពីក្រសួងសុខាភិបាល ក្រសួងការងារ សហការជាមួយអង្គការសុខភាពពិភពលោកដើម្បីរកពីមូលហេតុនៃការដួលសន្លប់កម្មកររោងចក្រ។ លោក ហ៊ុន សែន ហៅការដួលសន្លប់នេះថាជាបាតុភូត៖ «»។
បេឡាជាតិរបបសន្តិសុខសង្គម កាលពីថ្ងៃទី២ ខែកុម្ភៈ បានបង្ហាញរបាយការណ៍ថា កម្មករជិត ១.៧០០នាក់ បានដួលសន្លប់ក្នុងឆ្នាំ២០១៧ នៅតាម ២២រោងចក្រ។
បេឡាជាតិរបបសន្តិសុខសង្គមអះអាងថា មូលហេតុដែលនាំឱ្យកម្មករដួលសន្លប់នោះ គឺផ្ដើមចេញពីបញ្ហាសុខភាពរបស់កម្មករមួយនាក់ ឬពីរនាក់ដួលសន្លប់មុន ហើយបណ្ដាលឲ្យកម្មករដទៃឃើញក៏មានការភិតភ័យ ទន់ដៃទន់ជើងតៗគ្នា សន្លប់ជាបន្តបន្ទាប់។ ប៉ុន្តែបន្ទាប់ពីបេឡាជាតិរបបសន្តិសុខសង្គមបង្ហាញពីមូលហេតុនៃការដួលសន្លប់នេះ ទាំងសហជីព និងកម្មកររោងចក្រប្រតិកម្មទៅនឹងការរកឃើញនេះ។ សហជីពអះអាងថា ការរំលោភច្បាប់ការងារជាដើមហេតុចំណងនៃការដួលសន្លប់របស់កម្មករ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) លោក អាត់ ធន់ យល់ថា ការបញ្ជាឲ្យត្រួតពិនិត្យករណីកម្មករដួលសន្លប់បន្ថែមទៀតជារឿងល្អ ព្រោះរបាយការណ៍ស្ដីពីការដួលសន្លប់កម្មករដែលទើបតែចេញផ្សាយមិនទាន់គ្រប់គ្រាន់នៅឡើយទេ។ លោក អាត់ ធន់ ស្នើដល់រដ្ឋាភិបាល និងថៅកែរោងចក្រថា នៅពេលរកបញ្ហាពិតប្រាកដនៃការដួលសន្លប់កម្មករឃើញហើយ ត្រូវរួមគ្នាដោះស្រាយបញ្ហានោះផង ព្រោះកន្លងសង្កេតឃើញថា បញ្ហាដួលសន្លប់របស់កម្មករ រដ្ឋាភិបាល និងអ្នកពាក់ព័ន្ធមិនទាន់បានដោះស្រាយនៅឡើយទេ៖ «»។
ប្រធានសហជីព លោក អាត់ ធន់ ជាអ្នកធ្វើការជាមួយកម្មករជាច្រើនឆ្នាំមកហើយបានលើកឡើងថា មូលហេតុសំខាន់ដែលកម្មករដួលសន្លប់គឺដោយសារតែអំពើពុករលួយ មន្ត្រីរដ្ឋាភិបាលមានភាគហ៊ុននៅក្នុងរោងចក្រ សហជីពខ្លះទៅជាប្រឹក្សាក្រុមហ៊ុនរោងចក្រ និងកង្វះខាងអធិការកិច្ចនៅតាមរោងចក្រដើម្បីធានាឱ្យបរិស្ថានរោងចក្រគោរពតាមច្បាប់ការងារ។ លោកថា បញ្ហាកាដួលសន្លប់បានកើតឡើងជាយូរមកហើយ ប៉ុន្តែមិនបានដោះស្រាយនៅឡើយទេ៕