កូនប្រសាលោកនាយករដ្ឋមន្ត្រី ហ៊ុន សែន គឺលោក ឌី វិជ្ជា ត្រូវបានអគ្គស្នងការនគរបាលជាតិប្រកាសឲ្យចូលកាន់តំណែង ជាអគ្គស្នងការរងនគរបាលជាតិ ជាផ្លូវការហើយនៅថ្ងៃទី៦ ខែកុម្ភៈ។ នាយឧត្ដមសេនីយ៍ នេត សាវឿន ជាអ្នកប្រកាសតែងតាំងលោក ឧត្ដមសេនីយ៍ឯក ឌី វិជ្ជា ពីប្រធាននាយកដ្ឋានកណ្ដាលសន្តិសុខ ទៅជាអគ្គស្នងការរងនគរបាលជាតិ។
ការប្រគល់តួនាទីដល់លោក ឌី វិជ្ជា ជាផ្លូវការនៅពេលនេះ គឺឡើងបន្ទាប់ពីលោកនាយករដ្ឋមន្ត្រី ហ៊ុន សែន ជាឪពុកក្មេកលោក ឌី វិជ្ជា បានចេញអនុក្រឹត្យតែងតាំងកូនប្រសាលោកឲ្យធ្វើជាអគ្គស្នងការរងនគរបាលជាតិ កាលពីថ្ងៃទី១៦ ខែមករា កន្លងទៅ។
ការតែងតាំងនេះត្រូវបានអ្នកវិភាគនយោបាយមើលឃើញ គឺជាការពង្រឹងអំណាច ឲ្យរឹងមាំមួយកម្រិតទៀត នៃក្រុមគ្រួសារត្រកូល “ហ៊ុន”។ សព្វថ្ងៃកូន និងក្មួយរបស់លោក ហ៊ុន សែន កំពុងកាន់តួនាទីសំខាន់ក្នុងជួរទាហាន និងប៉ូលិស។ កូនច្បងលោក ហ៊ុន សែន លោក ហ៊ុន ម៉ាណែត គឺជាឧត្ដមសេនីយ៍ផ្កាយ៣ កាន់តំណែងជាអគ្គមេបញ្ជាការរងកងទ័ពជើងគោក ជាមេបញ្ជាការរងកងអង្គរក្ស ជាមេបញ្ជាការកម្លាំងពិសេសប្រឆាំងភេរវកម្ម និងជានាយរងសេនាធិការចម្រុះនៃកងយោធពលខេមរភូមិន្ទ។ រីឯកូនប្រុសទីពីររបស់លោកវិញ គឺលោក ហ៊ុន ម៉ានិត គឺជាឧត្ដមសេនីយ៍ផ្កាយ៣ កាន់តំណែងជាអគ្គនាយកនៃអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិ និងជានាយរងខុទ្ទកាល័យនាយករដ្ឋមន្ត្រី។ ចំណែកក្មួយប្រសារបស់លោក ហ៊ុន សែន គឺលោក នេត សាវឿន គឺ ជាអគ្គស្នងការនគរបាលជាតិ។
លោក ឌី វិជ្ជា ស្វាមីរបស់អ្នកស្រី ហ៊ុន ម៉ាណា កូនស្រីច្បងរបស់លោកនាយករដ្ឋមន្ត្រី ហ៊ុន សែន ដែលមានឈ្មោះក្នុងរបាយការណ៍ របស់អង្គការឃ្លាំមើលពិភពលោក (Global Witness) ថាជាអ្នកក្ដោបក្ដាប់មុខជំនួញជាច្រើនក្នុងប្រព័ន្ធសេដ្ឋកិច្ចកម្ពុជា៕