ជនជាតិអង់គ្លេស ៥នាក់ ដែលត្រូវបានចាប់ឃុំខ្លួនពីបទបញ្ចេញកាយវិការរាំអាក្រាតបែបអាសអាភាសនៅខេត្តសៀមរាប អះអាងថា សមត្ថកិច្ចខ្មែរបានជំរិតទារប្រាក់ចំនួនជិត ៤ម៉ឺនដុល្លារជាថ្នូរនឹងការដោះលែង។
ប្រភពព័ត៌មានពីកាសែត ដេលី ម៉ែល (Daily Mail) ដែលបានដកស្រង់សម្ដីរបស់ក្រុមគ្រួសារជនជាតិអង់គ្លេសទាំង ៥នាក់នោះ ឲ្យដឹងនៅថ្ងៃសៅរ៍ ទី៣ ខែកុម្ភៈ នេះថា សមត្ថកិច្ចខ្មែរបានជំរិតទារប្រាក់ពីពួកគេចំនួន ២ម៉ឺន ៨ពាន់ផោន (ស្មើប្រមាណជិត ៤ម៉ឺនដុល្លារអាមេរិក) ជាថ្នូរនឹងការដោះលែងឲ្យនៅក្រៅឃុំ។ ប្រភពដដែលអះអាងថា សមត្ថកិច្ចខ្មែរបានប្រាប់ថា ពួកគេអាចមានជម្រើសមួយ គឺទទួលសារភាពនូវទោសកំហុស និងជាប់ពន្ធនាគារចំនួន ៦សប្ដាហ៍។ ក៏ប៉ុន្តែពួកគេទាំង ៥នាក់នោះបានបដិសេធចំពោះការចោទប្រកាន់នេះ ហើយពួកគេក៏មិនបានពឹងពាក់មេធាវីដើម្បីស្នើសុំតុលាការឲ្យពួកគេនៅក្រៅឃុំបណ្ដោះអាសន្នឡើយ ដោយបារម្ភខ្លាចករណីរឿងក្តីនេះនឹងអាចបន្តរាប់ខែតទៅទៀត។
កាលពីថ្ងៃព្រហស្បតិ៍ ទី២៥ ខែមករា សមត្ថកិច្ចខ្មែរបានចាប់ឃាត់ខ្លួនជនបរទេសចំនួន ១០នាក់នៅក្នុងផ្ទះវីឡាមួយ ខណៈដែលពួកគេកំពុងផឹកស៊ី និងបញ្ចេញកាយវិការបែបរួមភេទអាសអាភាសដែលខុសនឹងក្រមសីលធម៌នៃប្រទេសកម្ពុជា។ ជនបរទេសទាំង ១០នាក់ គឺមានជនជាតិអង់គ្លេស ៥នាក់ និងជនជាតិដទៃទៀត រួមមាន កាណាដា នូវែលហ្សេឡង់ ន័រវែស ហុល្លង់។ លិខិតឆ្លងដែនរបស់ពួកគេត្រូវបានសមត្ថកិច្ចខ្មែរដកទុក និងមិនអនុញ្ញាតឲ្យចាកចេញពីប្រទេសកម្ពុជាឡើយ។ ពួកគេមានក្តីសង្ឃឹមថា សមត្ថកិច្ចកម្ពុជា នឹងបញ្ចប់ការស៊ើបអង្កេតឲ្យបានឆាប់ៗ ដើម្បីដោះលែងពួកគេឲ្យមានសេរីភាពឡើងវិញ៕