Clik here to view.
ក្រសួងធនធានទឹក និងឧតុនិយមអំពាវនាវដល់ពលរដ្ឋ ពិសេសកងទ័ពដែលកំពុងឈរជើងតាមបន្ទាត់ព្រំដែនជួរភ្នំដងរែក អោយប្រុងប្រយ័ត្នចំពោះអាកាសធាតុចុះត្រជាក់ជិត ១សប្ដាហ៍។
លិខិតជូនដំណឹងរបស់ក្រសួងធនធានទឹក និងឧតុនិយម ស្ដីពីការចុះត្រជាក់លើកទី៤ ឲ្យដឹងថា ជ្រលង ដោយសារសម្ពាធខ្ពស់ពីប្រទេសចិន និងខ្យល់មូសុងឦសានកំពុងបង្កើនឥទ្ធិពលគ្របដណ្ដប់មកភាគខាងជើងនៃកម្ពុជា។ ឥទ្ធិពលនេះ នឹងធ្វើឲ្យអាកាសធាតុត្រជាក់ចាប់ពីថ្ងៃទី៤ ដល់ថ្ងៃទី៩ ខែកុម្ភៈ។
សេចក្ដីដំណឹងបង្ហាញថា តំបន់ជួរភ្នំដងរែក មានសីតុណ្ហភាពអប្បបរមា នឹងថយចុះមកនៅរង្វង់ ១៣អង្សា ទៅ ១៤អង្សា។ ខេត្តឧត្ដរមានជ័យ ព្រះវិហារ ស្ទឹងត្រែង រតនគីរី មណ្ឌលគិរី និងខេត្តប៉ៃលិន សីតុណ្ហភាពអប្បបរមា នឹងថយចុះមកនៅរង្វង់ ១៥អង្សា ទៅ ១៦អង្សា។ ខេត្តពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ ក្រចេះ និងខេត្តកោះកុង សីតុណ្ហភាពអប្បបរមានឹងថយចុះមកនៅរង្វង់ ១៧អង្សា ទៅ ១៨អង្សា។ រាជធានីភ្នំពេញ កំពង់ឆ្នាំង កំពង់ស្ពឺ កណ្ដាល តាកែវ ព្រៃវែង និងខេត្តស្វាយរៀង សីតុណ្ហភាពអប្បបរមា នឹងថយចុះមកនៅរង្វង់ ១៩អង្សា ទៅ ២០អង្សា។ ចំណែកខេត្តកែប កំពត និងខេត្តព្រះសីហនុ សីតុណ្ហភាពអប្បបរមា នឹងមានពី ២៣អង្សា ទៅ ២៤អង្សា៕
