កម្មករ-កម្មការិនីនៃរោងចក្រ សេឌូណូ ខេមបូនីតធីង (SEDUNO Cambo KNITTING. LTD) ជិត៧០នាក់ បានដួលសន្លប់ជាបន្តបន្ទាប់ កាលពីល្ងាចថ្ងៃទី៣០ ខែមករា។ រោងចក្រនេះ ស្ថិតនៅភូមិកណ្ដឹងតូច ឃុំកណ្ដឹង ស្រុកបាទី ខេត្តតាកែវ។
រហូតមកដល់ពេលនេះ សមត្ថកិច្ចជំនាញផ្នែកសុខាភិបាល មិនទាន់បញ្ជក់ មូលហេតុច្បាស់លាស់នៃការដួលសន្លប់នេះថា បណ្ដាលមកពីបញ្ហាអ្វីមួយពិតប្រាកដនោះទេ។
ប៉ុន្តែ សារព័ត៌មានក្នុងស្រុកបានស្រង់សម្ដីរបស់អធិការនគរបាលស្រុកបាទី លោក ង៉ាន់ សារី ថា ករណីដួលសន្លប់នេះ អាចបណ្ដាលមកពីពុលថ្នាំបាញ់ស្រូវរបស់ប្រជាពលរដ្ឋ នៅក្បែររោងចក្រនោះ។
រោងចក្រ សេឌូណូ ខេមបូ នីតធីង មានកម្មករ កម្មការិនីសរុបជាង ១ពាន់ ៦រយនាក់។
អាជ្ញាធរ និងក្រុមគ្រូពេទ្យ បានដឹកកម្មករ កម្មការិនី ដែលដួលសន្លប់ទាំងនោះទៅសង្គ្រោះនៅមន្ទីរពេទ្យបង្អែកស្រុកបាទីជាបន្តបន្ទាប់ ចាប់តាំងពីអំឡុងម៉ោងជាង៣ រសៀល កាលពីថ្ងៃ ទី៣០ មករា៕