មេធាវីការពារក្ដីរបស់ជនបរទេស ១០នាក់ដែលត្រូវសមត្ថកិច្ចចាប់ខ្លួនដោយអះអាងថា ពួកគេបានផ្សាយរូបភាពនៃកាយវិការរាំបែបអាសអាភាស អះអាងថា តុលាការមិនគួរចាប់កូនក្តីរបស់លោកដាក់ក្នុងពន្ធនាគារនោះទេ។ លោកមេធាវីស្នើឱ្យតុលាការសម្រេចបណ្ដេញកូនក្តីរបស់លោកទាំង ១០នាក់ចេញពីប្រទេសកម្ពុជា។
ទីភ្នាក់ងារព័ត៌មាន អេ.ភី (AP) ផ្សាយកាលពីថ្ងៃទី៣០ ខែមករា ឱ្យដឹងថា ជនបរទេសចំនួន ១០នាក់ត្រូវបានសមត្ថកិច្ចឃាត់ខ្លួននៅក្នុងពិធីជប់លៀងមួយដែលរៀបចំឡើងនៅឯខេត្តសៀមរាប ដោយសមត្ថកិច្ចចាត់ទុកថា កាយវិការរាំរបស់ពួកគេមានលក្ខណៈអាសអាភាស ដែលខុសទៅនឹងក្រមសីលធម៌នៃប្រទេសកម្ពុជា។
មេធាវីការពារក្តីឱ្យជនបរទេសទាំង ១០នាក់នោះ គឺលោក សួង សុភា និយាយថា តាមរយៈរូបថតក្នុងពិធីជប់លៀងដែលពួកគេបានផ្សាយនៅលើបណ្ដាញសង្គមមួយចំនួន ជារូបភាពផឹកស៊ីដោយមានស្ត្រីខ្លះស្លៀកពាក់ប៊ីហ្គីនី ប៉ុន្តែមិនឃើញរូបភាពនៃការរូបភេទ ឬក៏រូបអាក្រាតកាយនោះឡើយ។
ទោះយ៉ាងណា លោកមេធាវីទទួលស្គាល់ថា ពួកគេពិតជាបានធ្វើខុសនឹងក្រមសីលធម៌នៃប្រទេសកម្ពុជា ប៉ុន្តែទោសនេះមិនសមនឹងត្រូវបានផ្ដន្ទាទោស ឬដាក់ក្នុងពន្ធនាគារនោះទេ។
សមត្ថកិច្ចបានឃាត់ខ្លួនជនបរទេសទាំង ១០នាក់នោះ ដែលត្រូវបានអាជ្ញាធរកម្ពុជា ឃាត់ខ្លួនកាលពីថ្ងៃព្រហស្បតិ៍ នោះ ខ្លះមកពីចក្រភពអង់គ្លេស កាណាដា រវ៉េសរវ៉ស ហុល្លង់ និងនូវែលហ្សេឡង់ ជាដើម។
ជនបរទេសទាំង ១០នាក់នេះ អាចនឹងត្រូវផ្ដន្ទាទោសឱ្យជាប់ពន្ធនាការរយៈពេល ១ឆ្នាំ៕