បញ្ហារថយន្តពាក់ស្លាកលេខ« ខ.ម» សម្រាប់យោធា ឬន.ប សម្រាប់នគរបាល មិនត្រឹមត្រូវ នៅតែជាបញ្ហាខុសច្បាប់ដដែលៗ ច្រើនអាណត្តិហើយ។ បញ្ហាដដែលនេះ ត្រូវបានរដ្ឋមន្ត្រីក្រសួងការពារជាតិ លោក ទៀ បាញ់ ចេញបញ្ជាជាថ្មីម្ដងទៀត ឲ្យកងរាជអាវុធហត្ថចាប់ភ្លាមៗ និងដោយគ្មានការតវ៉ានូវរថយន្តទាំងឡាយណា ដែលពាក់ស្លាក«ខ.ម» ខុសច្បាប់ និងមិនបង់ពន្ធចូលរដ្ឋ។
អ្នកធ្វើការងារផ្នែកសង្គម សាទរចំពោះការចេញបញ្ជាជាថ្មីរបស់លោក ទៀ បាញ់ លើបញ្ហាស្លាកលេខឡាន ខ.ម ខុសច្បាប់នៅពេលនេះ។
ប្រធានមជ្ឈមណ្ឌលអប់រំប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គីមអេង មានប្រសាសន៍ថា ទោះជាយ៉ាងនេះក្ដី លោកនៅតែមិនទាន់មានជំនឿចិត្តនៅឡើយទេ ព្រោះនេះជាបញ្ជាដដែល ហើយបញ្ហាដែលកើតមានគឺដដែល៖ «ការមានវិធានការជាការប្រសើរ។ ប៉ុន្តែជាមួយគ្នានោះដែរ ការអនុវត្តវិធានការនោះមានប្រសិទ្ធភាពទៅបាន លុះត្រាណាតែការអនុវត្តនោះធ្វើឡើងដោយស្មើភាព ដោយមិនរើសមុខ ហើយតែអនុវត្តទៅគ្រប់បុគ្គលទាំងអស់ជាអ្នកល្មើស ដែលផ្លាក ខ.ម ទៅប្រើសម្រាប់ឲ្យប្រយោជន៍ផ្ទាល់ខ្លួន ឬសម្រាប់ប្រើឲ្យប្រយោជន៍បុគ្គលជាបញ្ហាសំខាន់»។
ថ្លែងក្នុងសិក្ខាសាលាការងារបច្ចេកទេសទូទាំងកងយោធពលខេមរភូមិន្ទ កាលពីថ្ងៃទី២៥ មករា រដ្ឋមន្ត្រីក្រសួងការពារជាតិ លោក ទៀ បាញ់ ក៏លើកឡើងអំពីការរិះគន់របស់សាធារណជនមួយចំនួនដែរ ដែលមានជនបរទេស និងបុគ្គលខ្លះមិនមានតួនាទីអ្វីនៅក្នុងកងយោធពលខេមរភូមិន្ទទេ ប៉ុន្តែគេយកស្លាកលេខខ.ម ទៅបំពាក់រថយន្តរបស់ខ្លួន ដោយមិនបង់ពន្ធ និងប្រើប្រាស់ជាមធ្យោបាយខុសច្បាប់។ លោកថារថយន្តពាក់ស្លាកលេខ ខ.ម ទាំងអស់មិនត្រូវបានអនុញ្ញាតឲ្យបុគ្គលផ្សេងក្រៅពីអង្គភាព ឬម្ចាស់រថយន្តប្រើប្រាស់ឡើយ។
ទាក់ទងបញ្ហានេះដែរ យុវជនរស់នៅរាជធានីភ្នំពេញ លោក ឡេង បូរី សង្កេតឃើញថា រថយន្តពាក់ស្លាកលេខ ខ.ម និង ន.ប អត់ពន្ធដែលមន្ត្រីរាជការទិញជិះផ្ទាល់ខ្លួន ហើយធ្វើដំណើរតាមផ្លូវបើកបរមិនសូវគោរពច្បាប់ចរាចរ និងធ្វើឲ្យពលរដ្ឋខ្លាចរអា ពេលមានគ្រោះថ្នាក់ចរាចរ។ លោកសង្កេតឃើញទៀតថា បទបញ្ជារបស់រដ្ឋមន្ត្រីក្រសួងការពារជាតិ នឹងពុំមានប្រសិទ្ធភាពទេ ដរាបណាអាជ្ញាធរអនុវត្តច្បាប់បានតែមួយឆាវដូចភ្លើងចំបើង ព្រោះបទបញ្ជានេះពុំមែនជារឿងថ្មីឡើយ៖ «ឧទាហរណ៍ ពេលដែលយើងជួបចរាចរដូចគ្នា គ្រាន់តែយើងឃើញលេខហ្នឹង យើងរាងខ្លាចញញើត។ បើតាមខ្ញុំសង្កេតឃើញនៅក្នុងសង្គមខ្មែរសព្វថ្ងៃដូចជាដដែល ហើយនៅក្នុងពេលហ្នឹង ខ្ញុំសុំឲ្យអាជ្ញាធរហ្នឹង គាត់រឹតបន្តឹងបន្តិចទៅ គឺជាការល្អ ព្រោះរាល់ថ្ងៃហ្នឹង ឃើញតែដដែល គឺចាប់លែងៗ អត់មានយន្តការពិតប្រាកដ។ សុំឲ្យអាជ្ញាធរដែលគាត់ពាក់ព័ន្ធរឿងច្បាប់ចរាចរ រឿងគយអ៊ីហ្នឹង ច្បាប់កម្ពុជាយើងមានហើយ នៅតែអ្នកអនុវត្តទេ។ សុំអ្នកអនុវត្តហ្នឹង គាត់អនុវត្តឲ្យបានច្បាស់លាស់ ឲ្យបានក្រិតក្រម»។
ទោះជាយ៉ាងនេះក្ដី ពេលនេះ លោក ទៀ បាញ់ ចេញបញ្ជាម្ដងទៀតឲ្យអគ្គនាយកដ្ឋានបច្ចេកទេស និងកងរាជអាវុធហត្ថចាត់វិធានការករណីនេះឲ្យមានប្រសិទ្ធភាព ស្របពេលដែលសាធារណជននឹងរង់ចាំមើលការអនុវត្តបទបញ្ជាលើកនេះ៕