ពលរដ្ឋមានជម្លោះដីធ្លីនៅតំបន់បឹងកក់ បានដាក់ញត្តិជាថ្មីដើម្បីស្នើសុំឲ្យអាជ្ញាធរក្រុងភ្នំពេញ ដោះស្រាយបញ្ចប់ជម្លោះដីធ្លីឲ្យអស់នៅភូមិ២២ ក្នុងតំបន់បឹងកក់ និងស្នើសុំឲ្យអាជ្ញាធរក្រុងភ្នំពេញ ជួយអន្តរាគមន៍ឲ្យតុលាការដោះលែងតំណាងពួកគេ គឺអ្នកស្រី ទេព វន្នី។
ពលរដ្ឋមានជម្លោះដីធ្លីអះអាងថា មន្ត្រីសាលាក្រុងភ្នំពេញសន្យាថា នឹងយកញត្តិរបស់ពួកគេបញ្ជូនទៅអភិបាលក្រុងភ្នំពេញ លោក ឃួង ស្រេង តាមសំណើរបស់ពលរដ្ឋនៅភូមិ២២ ក្នុងតំបន់បឹងកក់។
ពលរដ្ឋបឹងកក់ ម្នាក់ ដែលចូលរួមដាក់ញត្តិ គឺអ្នកស្រី ប៉ូ ឆវី ឲ្យដឹងថា ញត្តិដែលពលរដ្ឋមានជម្លោះដីធ្លីដាក់ជូនអភិបាលក្រុងភ្នំពេញ កាលពីព្រឹកថ្ងៃទី២២ មករា នោះ មានពីរចំណុច គឺទី១ ជួយដោះស្រាយបញ្ចប់ជម្លោះដីនៅភូមិ២២ និងទី២ ស្នើសុំអាជ្ញាធរក្រុងភ្នំពេញ ជួយអន្តរាគមន៍ទៅមន្ត្រីតុលាការកំពូល ដើម្បីឲ្យមានការដោះលែងអ្នកស្រី ទេព វន្នី នៅថ្ងៃទី៧ ខែកុម្ភៈ៖ «»។
សកម្មជនដីធ្លីនៅសហគមន៍បឹងកក់ អ្នកស្រី ទេព វន្នី ត្រូវបានចៅក្រមនៅសាលាដំបូងរាជធានីភ្នំពេញ បានសម្រេចផ្ដន្ទាទោសឲ្យជាប់ពន្ធនាគារចំនួន ២ឆ្នាំកន្លះ ពីបទហិង្សាដោយចេតនាមានស្ថានទម្ងន់ទោសលើសន្តិសុខសណ្ដាប់ធ្នាប់សាលាខណ្ឌដូនពេញ កាលពីថ្ងៃទី១៣ ខែមីនា ឆ្នាំ២០១៣។
កាលពីថ្ងៃទី២៧ ខែកក្កដា ឆ្នាំ២០១៧ ព្រះរាជអាជ្ញាសាលាឧទ្ធរណ៍ លោក ង៉ែត សារ៉ាត់ ចោទអ្នកស្រី ទេព វន្នី មួយករណីផ្សេងទៀត ថាបាននាំបក្សពួកទៅដាក់ញត្តិនៅផ្ទះលោកនាយករដ្ឋមន្ត្រី ហ៊ុន សែន និងបង្កឲ្យមានអំពើហិង្សានៅទីនោះ ក៏ប៉ុន្តែអ្នកស្រី ទេព វន្នី បានបដិសេធជាបន្តបន្ទាប់។
ការប្រើប្រាស់ចំណាត់ការតុលាការក្នុងករណីការចាប់ និងឃុំខ្លួនសកម្មជនដីធ្លីនៅតំបន់បឹងកក់ អ្នកស្រី ទេព វន្នី ត្រូវបានអង្គការជាតិ និងអន្តរជាតិរិះគន់យ៉ាងចាស់ដៃ។
បណ្ដាញភាពជាមេដឹកនាំស្ត្រីសកល នៃអង្គការវ៉ាយថល វ៉យស៍ (Vital Voices) ដែលមានមូលដ្ឋាននៅរដ្ឋធានីវ៉ាស៊ីនតុន កាលពីខែសីហា ឆ្នាំ២០១៧ សន្យាថា នឹងបន្តឃ្លាំមើលករណីអ្នកស្រី ទេព វន្នី និងសហគមន៍បឹងកក់ យ៉ាងយកចិត្តទុកដាក់ជាទីបំផុត។
អង្គការ Vital Voices ប្ដេជ្ញាថា ពួកគេនឹងនៅតែបន្តពាំនាំរឿងរ៉ាវរបស់អ្នកស្រី ហើយនិងរឿងរ៉ាវនៃពលរដ្ឋក្នុងសហគមន៍អ្នកស្រីទៅប្រាប់ពិភពលោក និងមនុស្សគ្រប់គ្នាឲ្យបានដឹងឮពីសេចក្ដីក្លាហានរបស់អ្នកស្រី ទេព វន្នី។
អ្នកស្រី ទេព វន្នី ត្រូវបានអង្គការ Vital Voices ប្រគល់ពានរង្វាន់ភាពជាអ្នកដឹកនាំសាកលឆ្នាំ២០១៣ និងផ្ដល់កិត្តិយសឲ្យធ្វើជាសមាជិកបណ្ដាញភាពជាអ្នកដឹកនាំសាកលរបស់អង្គការ Vital Voices។
ទាក់ទងនឹងរឿងដីមានជម្លោះនៅភូមិ២២វិញ កាលពីថ្ងៃទី២៧ ខែធ្នូ អាជ្ញាធររាជធានីភ្នំពេញ ផ្ដល់ប័ណ្ណកម្មសិទ្ធិឲ្យពលរដ្ឋដែលមានជម្លោះដីធ្លីរ៉ាំរ៉ៃរាប់ឆ្នាំនៅតំបន់បឹងកក់ ចំនួន ២២គ្រួសារ ក្រោយពួកគេចេញតវ៉ាជាច្រើនឆ្នាំ។
សហគមន៍បញ្ជាក់ថា នៅសល់ពលរដ្ឋជិត ២០គ្រួសារទៀតដែលមិនទាន់ទទួលបានការដោះស្រាយ និងទទួលប្លង់ ប៉ុន្តែតួលេខពីសាលារាជធានីប្រាប់ពលរដ្ឋថា នៅសល់តែ ៧គ្រួសារទៀតប៉ុណ្ណោះ។ ពលរដ្ឋមានជម្លោះដីធ្លីនៅតំបន់បឹងកក់ ដែលទទួលបានប័ណ្ណកម្មសិទ្ធិប្ដេជ្ញាថា ពួកគេនៅតែចូលរួមក្នុងការតស៊ូទាមទារដីរបស់អ្នកបឹងកក់ ពីអាជ្ញាធរមកវិញ។ អ្នកដែលតវ៉ាបានដីធ្លីមកវិញ ហៅលទ្ធផលនេះថា ជាការប្រឹងប្រែងតស៊ូទាមទារដីរបស់ពួកគេមកវិញ។
អ្នកបឹងកក់អះអាងថា ដីនោះមិនមែនសាលាក្រុងផ្ដល់ឲ្យនោះទេ តាមពិតដីមានជម្លោះជាដីរបស់ពួកគេតាំងពីដើមមក ប៉ុន្តែក្រុមហ៊ុនបានទៅរំលោភបំពានដីរបស់ពួកគាត់ក្រោមលេសថា អភិវឌ្ឍន៍។
អ្នកភូមិ២២ ក្នុងតំបន់បឹងកក់ម្នាក់ដែលមិនទាន់ទទួលបានសំណង និងធ្លាប់ជាប់ពន្ធនាគារ ៣ដង ដោយសារការតវ៉ាទាមទារដីធ្លី គឺអ្នកស្រី ផាន់ ឈុនរ៉េត ចាត់ទុកការចេញមកទទួលញត្តិ និងសន្យាខិតខំបន្តដោះស្រាយ ជាបញ្ហាច្រំដែល។ អ្នកស្រី ផាន់ ឈុនរ៉េត បន្តថា មន្ត្រីសាលាក្រុងបានសន្យាចុះទៅពិនិត្យមើលដីអ្នកស្រីផ្ទាល់៖ «»។
តំបន់បឹងកក់ ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ មានផ្ទៃដីសរុបប្រមាណ ១៣៣ហិកតារ ក្នុងនោះមាន ៩០ហិកតារជាផ្ទៃបឹង។
កាលពីឆ្នាំ២០០៧ រដ្ឋាភិបាលបានចុះកិច្ចសន្យាជួលដីតំបន់នេះ ក្នុងរយៈពេល ៩៩ឆ្នាំដល់ក្រុមហ៊ុនស៊ូកាគូ (Shukaku) ទៅឲ្យសេដ្ឋីម្នាក់ជាសមាជិកព្រឹទ្ធសភារបស់គណបក្សប្រជាជនកម្ពុជា គឺឧកញ៉ា ឡាវ ម៉េងឃីន ក្នុងតម្លៃប្រមាណ ៧៩លានដុល្លារ។ ប្រជាជនប្រមាណ ៤.២៥២គ្រួសារត្រូវរងផលប៉ះពាល់ដោយសារគម្រោងនេះ។
តាមផែនការអភិវឌ្ឍន៍ដែលទទួលមានការឯកភាពពីសាលារាជធានីភ្នំពេញ ក្នុងឆ្នាំ២០១៤ ក្រុមហ៊ុនអភិវឌ្ឍន៍នេះ កំពុងប្រែក្លាយតំបន់បឹងកក់ ឲ្យទៅជាទីក្រុងរណបមួយដែលមានមជ្ឈមណ្ឌលពាណិជ្ជកម្ម ផ្សារទំនើប លំនៅឋាន សណ្ឋាគារ សាលសន្និសីទ និងអគារផ្សេងៗទៀត។
ដើម្បីឈានដល់ចំណុចអភិវឌ្ឍន៍ទាំងនេះ ក្រុមហ៊ុនស៊ូកាគូ និងអាជ្ញាធរក្រុងភ្នំពេញ ត្រូវបានរងការចោទប្រកាន់ថា បានឃុបឃិតគ្នាជាប្រព័ន្ធក្នុងការធ្វើទុក្ខបុកម្នេញពលរដ្ឋម្ចាស់ដី បង្ខំឲ្យចាកចេញដើម្បីយកទីតាំងឲ្យឧកញ៉ារកស៊ី។
អ្នកនាំពាក្យនៃសមាគមសិទ្ធិមនុស្សអាដហុក (ADHOC) លោក ស៊ឹង សែនករុណា ទទូចឲ្យអាជ្ញាធរក្រុងភ្នំពេញ បញ្ចប់ទំនាស់រ៉ាំរ៉ៃ នៅតំបន់បឹងកក់។ លោក ស៊ឹង សែនករុណា យល់ថា ល្មមដល់ពេលដែលត្រូវបញ្ចប់ជម្លោះដើម្បីឲ្យពលរដ្ឋអាចទទួលយកបាន ហើយអាជ្ញាធរនឹងលែងឈឺក្បាលតទៅទៀត៖ «»។
ចំណែកករណីទាមទារឲ្យអាជ្ញាធរអន្តរាគមន៍ដោះលែងសកម្មជនដីធ្លី អ្នកស្រី ទេព វន្នី លោក ស៊ឹង សែនករុណា សំណូមពរឲ្យអាជ្ញាធរ ឬមន្ត្រីតុលាការ ពិចារណាក្នុងការដោះលែង អ្នកស្រី ទេព វន្នី។ សមាគមសិទ្ធិមនុស្សអាដហុក យល់ថា អ្នកស្រី ទេព វន្នី ជាប់ពន្ធនាគារដោយសារអ្នកស្រីទាមទារឲ្យដោះលែងសកម្មជនសិទ្ធិមនុស្សទាំង ៥រូប នៃសមាគមសិទ្ធិមនុស្សអាដហុក មិនមែនជាករណីអ្នកស្រី ទេព វន្នី មានសមត្ថភាពប្រើហិង្សាទៅលើក្រុមសន្តិសុខខណ្ឌ ដែលពោរពេញដោយកម្លាំងនោះទេ៖ «»។
អ្នកស្រី ទេព វន្នី នឹងត្រូវឡើងសវនាការនៅតុលាការកំពូល នៅថ្ងៃទី៧ ខែកុម្ភៈ។ ពលរដ្ឋមានជម្លោះនៅបឹងកក់ អះអាងថា នឹងនាំគ្នាឃ្លាំមើលសវនាការនោះ ខណៈដែលពួកគេទាមទារយ៉ាងទទូចឲ្យមានការដោះលែងសកម្មជនពួកគេជាបន្ទាន់ ដោយគ្មានលក្ខខណ្ឌ៕