សហគមន៍ប្រចាំដែនជម្រកសត្វព្រៃកែវសីមា ប្រកាសពីភាពជោគជ័យរបស់ខ្លួនសម្រាប់ឆ្នាំ២០១៧ ក្នុងការបង្ក្រាបបទល្មើសព្រៃឈើ និងសត្វព្រៃនៅក្នុងតំបន់សត្វព្រៃកែវសីមា ស្ថិតក្នុងខេត្តមណ្ឌលគិរី។
សេចក្ដីប្រកាសព័ត៌មានរបស់សមាគមអភិរក្សសត្វព្រៃ ចេញផ្សាយកាលពីថ្ងៃទី២២ ខែមករា ឱ្យដឹងថា ក្រុមល្បាតដែលមានការចូលរួមពីមន្ត្រីក្រសួងបរិស្ថាន និងប្រជាសហគមន៍មូលដ្ឋានចុះចំនួន ៥២លើក ឃាត់ខ្លួនមនុស្សចំនួន ៧នាក់ និងវត្ថុតាងជាច្រើនផ្សេងទៀត ដូចជា អន្ទាក់សត្វ រណារយន្ត កាំភ្លើងកែច្នៃ ជាដើម។
ប្រធានក្រុមសម្របសម្រួលការដើរល្បាតសហគមន៍ និងជាមន្ត្រីក្រសួងបរិស្ថាន លោក អែម ត្រាយ បញ្ជាក់បន្ថែមថា ពលរដ្ឋដែលចូលមកកាប់ព្រៃ និងដាក់អន្ទាក់សត្វភាគច្រើនជាពលរដ្ឋខ្មែរ ដែលមកពីខេត្តផ្សេងៗ និងខ្លះទៀតជាពលរដ្ឋក្នុងមូលដ្ឋាន។
លោក អែម ត្រាយ សាទរចំពោះលទ្ធផលការងាររបស់ប្រជាសហគមន៍ដែលសម្រេចបានក្នុងឆ្នាំ២០១៧ តែលោកនៅតែមានការបារម្ភចំពោះការកើនឡើងនូវបទល្មើសទាំងនេះ ថានៅតែកើតមានក្នុងដែនជម្រកសត្វព្រៃកែវសីមា៖ «ខ្ញុំមានអារម្មណ៍ថាសប្បាយចិត្តដែរ សប្បាយចិត្តដែលថាយើងធ្វើការជាមួយសហគមន៍ទៅ ហើយយើងបានចាប់រណារយន្ត អន្ទាក់ហ្នឹង ដែលជាឧបករណ៍ប្រព្រឹត្តបទល្មើស។ អ៊ីចឹងជាលទ្ធផលដែលយើងធ្វើទៅ យើងសប្បាយចិត្ត។ ប៉ុន្តែទន្ទឹមនឹងការសប្បាយចិត្ត យើងក៏មានការព្រួយបារម្ភដែរ ព្រួយបារម្ភទាក់ទងថា ប្រសិនបើយើងចាប់បានរណារយន្តហ្នឹងច្រើន មានន័យថា បទល្មើសហ្នឹង សកម្មភាពកាប់រាន និងអារព្រៃឈើហ្នឹង វានៅមានច្រើន។ ហ្នឹង! អារម្មណ៍ខ្ញុំអ៊ីចឹង!»។
ទោះយ៉ាងណា លោក អែម ត្រាយ ថ្លែងថា បទល្មើសព្រៃឈើ និងសត្វព្រៃក្នុងដែនជម្រកសត្វព្រៃកែវសីមា មានការថយចុះច្រើន បើប្រៀបធៀបកាលពីឆ្នាំមុនៗ ដែលមានក្រុមហ៊ុនសម្បទាន។
ដែនជម្រកសត្វព្រៃកែវសីមា ដែលស្ថិតក្នុងខេត្តមណ្ឌលគិរី និងខេត្តក្រចេះ ជាទីជម្រករបស់សត្វព្រៃ និងរុក្ខជាតិជាង ៦០ប្រភេទ។ ដែនជម្រកសត្វព្រៃមួយនេះ សំបូរដោយប្រភេទសត្វជិតផុតពូជជាច្រើន ដូចជាស្វាកន្ទុយស ទោចថ្ពាល់លឿង ពពួកខ្លា ដំរីព្រៃ និងសត្វស្លាបជាច្រើនប្រភេទទៀត៕