សហជីពសេរីកម្មករនៃព្រះរាជាណាចក្រកម្ពុជា ប្រារព្ធពិធីជួបជុំដាក់កម្រងផ្កា គោរពវិញ្ញាណក្ខន្ធលោក ជា វិជ្ជា គម្រប់ខួប១៤ឆ្នាំ នៅថ្ងៃទី២២ មករា នៅទីតម្កល់រូបសំណាកខាងមុខវត្តលង្កា រាជធានីភ្នំពេញ។ សង្គមស៊ីវិលធ្វើការលើកកម្ពស់សិទ្ធិកម្មករ សហជីពគ្រូបង្រៀន និងកម្មករបានចូលរួម ប៉ុន្តែ ពុំមានវត្តមានលោក ជា មុនី ប្អូនប្រុសលោក ជា វិជ្ជា ដូចរាល់ឆ្នាំឡើយ។ អ្នកចូលរួមបានជំរុញឲ្យរដ្ឋាភិបាលវែកមុខឃាតកពិតនិងអ្នកនៅពីក្រោយឃាតកម្មនេះយកមកផ្ដន្ទាទោស។
តំណាងសហភាពការងារកម្ពុជា រំពឹងថា គណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារ នឹងអាចជំរុញការអនុវត្តរបស់គណៈកម្មការអន្តរក្រសួងដែលបង្កើតឡើងសម្រាប់ស៊ើបអង្កេតសំណុំរឿងឃាតកម្មលោក ជា វិជ្ជា។
ប្រធានសហភាពការងារកម្ពុជា និងជាសមាជិកគណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារ លោក អាត់ ធន់ ចាត់ទុកថា លោក ជា វិជ្ជា គឺជាអ្នកបំបែកឯកត្តកម្មនៅកម្ពុជាក្នុងការតស៊ូមតិ និងធ្វើការយ៉ាងសកម្មជាមួយដៃគូពាក់ព័ន្ធបង្កើតឲ្យមានការជជែកពិភាក្សាពីបញ្ហាប្រាក់ឈ្នួលតាំងពីឆ្នាំ២០០០។ លោកថា លោក ជា វិជ្ជា ក៏ជាវីរជនមួយដ៏សំខាន់ដែលការពារសិទ្ធិសេរីភាពកម្មកររហូតដល់បាត់បង់ជីវិត ដូច្នេះមានតែរដ្ឋាភិបាលទេ ដែលមានកាតព្វកិច្ចរកឃាតកពិតដែលបានបាញ់សម្លាប់លោក ជា វិជ្ជា ប៉ុន្តែមកដល់ពេលនេះគណៈកម្មការអន្តរក្រសួងដែលបង្កើតឡើងដោយលោកនាយករដ្ឋមន្ត្រី ហ៊ុន សែន នៅតែមិនទាន់ឃើញបង្ហាញលទ្ធផលអ្វីឡើយ។ ក្នុងនាមលោកជាសមាជិកគណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារដែលទើបបង្កើតចុងឆ្នាំ២០១៧ លោកនឹងបន្តចូលរួមតាមដានសំណុំរឿងឃាតកម្មនេះ ដែលជាបណ្ដឹង១ ក្នុងចំណោមបណ្ដឹងនានា ដូចជាបញ្ហាបង្កើតច្បាប់សហជីព និងការរំលោភបំពានផ្សេងៗទៀត ដែលកំពុងមានការយកចិត្តទុកដាក់ពីអង្គការអន្តរជាតិខាងការងារ៖ «ល្អដែរដោយសារពីមុនយើងអត់មានរចនាសម្ព័ន្ធច្បាស់លាស់ ឥឡូវវាច្បាស់លាស់ហើយជាក់ច្បាស់លើរឿងអនុសញ្ញាអន្តរជាតិ ដោយសារសំណុំរឿងលោក ជា វិជ្ជា បានទៅដល់អង្គការILO ហើយ អង្គការនេះកំពុងតាមដាននិងទាមទារឲ្យរដ្ឋាភិបាលធ្វើរបាយការណ៍អំពីការវិវឌ្ឍនៃការរកឃាតកដែលសម្លាប់លោក ជា វិជ្ជា ទៅអង្គការនេះ។ ដូច្នេះនៅពេលគណៈកម្មការត្រួតពិនិត្យអនុសាសន៍ឬក៏ច្បាប់ ឬក៏អនុសញ្ញារបស់ILO មានន័យថាយើងមានឥទ្ធិពលនៅក្នុងការសួរឬផ្ដល់យោបល់ឬអាចទទួលបានរបាយការណ៍នេះពិនិត្យមើលបាន»។
ការលើឡើងនេះ នៅក្នុងពិធីជួបជុំដាក់កម្រងផ្កា គោរពវិញ្ញាណក្ខន្ធលោក ជា វិជ្ជា គម្រប់ខួប១៤ឆ្នាំ។ លោក ជា វិជ្ជា ដែលជាអតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតកបាញ់សម្លាប់នៅតូបលក់កាសែតជិតវត្តលង្កា ក្រុងភ្នំពេញ កាលពីព្រឹកថ្ងៃទី២២ ខែមករា ឆ្នាំ២០០៤។
អតីតប្រធានសហភាពសហជីពកម្ពុជា និងជាអតីតប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ថ្លែងថា លោកសង្វេគចិត្ត ១៤ឆ្នាំហើយ ដែលក្រសួងមហាផ្ទៃមិនអាចវែកមុខចាប់ជនដៃដល់ និងអ្នកពាក់ព័ន្ធដើម្បីផ្ដល់យុត្តិធម៌ឲ្យក្រុមគ្រួសារជនរងគ្រោះបាន។ ចំណែកលោក ជា មុនី ប្អូនប្រុសលោក ជា វិជ្ជា ក៏មិនអាចចូលរួមដូចឆ្នាំមុនឡើយ ដោយសារតែចំណាត់ការរបស់សាលាដំបូងរាជធានីភ្នំពេញ។ លោកចាត់ទុកថា ពេលនេះជាវេលាដ៏តានតឹងក្នុងសង្គមកម្ពុជា៖ «គាប់ជួនមែនទែនហើយថ្ងៃនេះក៏មិនមានវត្តមានឥស្សរជន នយោបាយមកចូលរួមដែរ ដោយសារទិដ្ឋភាពបរិយាកាសសង្គមមានការធ្លាក់ចុះមានការគំរាមកំហែងបំភិតបំភ័យទៅលើសិទ្ធិសេរីភាព»។
សាលាដំបូងរាជធានីភ្នំពេញនៅថ្ងៃទី២២ មករា បានកោះហៅលោក ជា មុន្នី ប្អូនប្រុសលោក ជា វិជ្ជា ជាអតីតប្រធានសហជីពសេរីកម្មករ ពីបទញុះញង់ របស់ដើមបណ្ដឹងសហភាពនិងសហព័ន្ធសហជីព ដែលបានប្ដឹងកាលពីថ្ងៃ១៥ ធ្នូ ឆ្នាំ២០១៧។
ប៉ុន្តែលោក ជា មុនី មិនបានបង្ហាញខ្លួននៅតុលាការទេ ដោយលោកដាក់ពាក្យពន្យារពេលនៅថ្ងៃដដែលដើម្បីរកមេធាវី។
សាធារណមតិជាតិ និងអន្តរជាតិ មើលឃើញថា នៅកម្ពុជា មានមនុស្សជាច្រើនដែលរងបណ្ដឹងនៅតុលាការ និងធ្វើឃាតដោយសារការបំពេញមុខងាររបស់ខ្លួន ការបញ្ចេញមតិរិះគន់រដ្ឋាភិបាល ការទាមទារសិទ្ធិ និងការធ្វើសកម្មភាពនយោបាយជាដើម។
ក្រោយឃាតកម្មលើលោក ជា វិជ្ជា មិនដល់៤ខែផង ក្នុងឆ្នាំ២០០៤ដដែល មេដឹកនាំសហជីពសេរីកម្មករមួយរូបទៀត គឺលោក រស់ សុវណ្ណារ៉េត អតីតប្រធានសហជីពសេរីកម្មករប្រចាំនៅរោងចក្រឈ្មោះ កុមារ ទុងហ្គា ត្រូវបានគេសម្លាប់ ហើយនៅថ្ងៃទី២៤ ខែកុម្ភៈ ឆ្នាំ២០០៧ លោក ហ៊ី វុទ្ធី អតីតប្រធានសហជីពសេរីកម្មករប្រចាំរោងចក្រសាន់តិច ក៏ត្រូវបានឃាតកបាញ់សម្លាប់ដូចគ្នា។
ប្អូនថ្លៃលោក រស់ សុវណ្ណារ៉េត បានទៅចូលរួមពិធីដាក់កម្រងលោក ជា វិជ្ជា និងឈរអោបរូបថតលោក រស់ សុវណ្ណារ៉េត និងកម្រងផ្កា។ លោកស្រី រឿន និមល ថ្លែងថា ជាង១០ឆ្នាំហើយក្រុមគ្រួសារអ្នកស្រីមិនបានទទួលយុត្តិធម៌ ចំណែកភរិយាលោក រស់ សុវណ្ណារ៉េត ជាបងស្រីគាត់ក៏ត្រូវភៀសខ្លួនទៅក្រៅប្រទេស៖ «និយាយទៅគឺឈឺចាប់មិនអាចបំភ្លេចបានទេនៅពេលមានគ្រួសារស្លាប់ទៅបែបនេះ ហើយរកភស្តុតាងអត់ទាន់ឃើញ បំបែកបំបាក់ក្រុមគ្រួសារមិនឲ្យជួបគ្នា»។
ជាង ១០ឆ្នាំក្រោយពេល ឃាតកម្មលើមេដឹកនាំសហជីពសេរីទាំងបីរូបនេះ លោកនាយករដ្ឋមន្ត្រី ហ៊ុន សែន គឺនៅឆ្នាំ២០១៥ បានតែងតាំងសមាសភាពពិសេសក្នុងគណៈកម្មការអន្តរក្រសួង ស៊ើបអង្កេត។ ប៉ុន្តែមកទល់ពេលនេះមិនទាន់ឃើញមានការវិវឌ្ឍអ្វីឡើយ។
រីឯភរិយាលោក ជា វិជ្ជា រស់នៅប្រទេសហ្វាំងឡង់ (Finland) ក្នុងខួប១៤ឆ្នាំនេះ បានទាមទារឲ្យលោក ហេង ពៅ អតីតស្នងការក្រុងភ្នំពេញ ដែលកំពុងជាប់ពន្ធនាគារ បកស្រាយការពិត ជុំវិញសំណុំរឿងធ្វើឃាតស្វាមីគាត់ ដោយអះអាងថា មានតែលោក ហេង ពៅ ទេដែលដឹងច្បាស់អ្នកបញ្ជាឲ្យមានឃាតកម្មនេះ៕