Clik here to view.
អាណាព្យាបាលរស់នៅខេត្តព្រះសីហនុ បង្ហាញការព្រួយបារម្ភជាថ្មីទៀត អំពីសុវត្ថិភាពកូនចៅ ដោយសារតែ បទល្មើសចាប់ជំរិត និងការវាយកាប់ចាក់គ្នា បង្កដោយជនជាតិចិន បានកើតមានជាបន្តបន្ទាប់។
មន្ត្រីឃ្លាំមើលការអភិវឌ្ឍសង្គម បានស្នើដល់សមត្ថកិច្ចស្ថាប័នពាក់ព័ន្ធ មានស្ថាប័នប្រដាប់អាវុធ និងតុលាការជាដើម ឲ្យរឹតបន្តឹងការអនុវត្តច្បាប់ ចំពោះជនប្រព្រឹត្តបទល្មើសជនជាតិចិន ឲ្យបានត្រឹមត្រូវ ដើម្បីទប់ស្កាត់បទល្មើសឲ្យថយចុះ។
ប្រជាពលរដ្ឋ រស់នៅខេត្តព្រះសីហនុ បានអះអាងថា បទល្មើសបង្កដោយជនជាតិចិន បានបន្តកើតមានជាបន្តបន្ទាប់ និងបង្កការភ័យខ្លាចដល់ពលរដ្ឋក្នុងមូលដ្ឋាន ពិសេសភ្ញៀវទេសចរជាតិអន្តរជាតិ ដែលចូលមកទស្សនាខេត្តនេះ។
ពួកគេបានស្នើឲ្យសមត្ថកិច្ចជំនាញគ្រប់ស្ថាប័ន ជួយកំណត់អត្តសញ្ញាណជនជាតិចិន ដែលចូលមករស់នៅ និងប្រកបរបរផ្សេងៗនាមូលដ្ឋាននេះ ឲ្យបានត្រឹមត្រូវ ព្រោះតាមការកត់សម្គាល់ឃើញថា ស្ទើរជារៀងរាល់ថ្ងៃ ជនជាតិចិន ដែលចូលមករស់នៅខេត្តព្រះសីហនុ តែងបង្កបទល្មើសផ្សេងៗ រួមមានបង្កើតឲ្យមានក្រុមបងតូចបងធំ បង្ករឿងវាយកាប់ចាក់ និងបង្កើតក្រុមចាប់ជំរិតមនុស្សទារប្រាក់ជាដើម។
កាលយប់ថ្ងៃចន្ទ ទី១៥ ខែមករា ឆ្នាំ២០១៨ មានជនជាតិចិនមួយក្រុមមានគ្នាជិត ២០នាក់ បានបង្កជម្លោះហិង្សា រវាងជនជាតិចិនគ្នាឯង បង្កការភ្ញាក់ផ្អើលដល់ប្រជាពលរដ្ឋ និងភ្ញៀវទេសចរ ស្ទើរមួយចំហៀងក្រុងព្រះសីហនុ មុនសមត្ថកិច្ចនគរបាលខេត្តព្រះសីហនុ ចុះមកដល់ទីតាំងបង្កជម្លោះ។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី ក៏ព្រួយបារម្ភចំពោះអំពើហិង្សាបង្កឡើងដោយជនជាតិចិន។ អ្នកស្រីកត់សម្គាល់ថា ចាប់តាំងពីជនជាតិចិន បានចូលមកវិនិយោគ ក្នុងប៉ុន្មានឆ្នាំមកនេះ គឺពួកគេបានបង្កើតក្រុមបងតូចបងធំ និងបង្កបទល្មើសវាយកាប់ចាក់ ព្រមទាំងបង្កើតក្រុមចាប់ជំរិតមនុស្ស ដើម្បីជំរិតទារប្រាក់ជាដើម ដែលបង្កការភ័យខ្លាចដល់ភ្ញៀវទេសចរ ពលរដ្ឋក្នុងមូលដ្ឋាន ពិសេសអ្នកវិនិយោគទុន។
អ្នកស្រី សុធារី បានស្នើដល់សមត្ថកិច្ចស្ថាប័នជំនាញនីមួយៗ ត្រូវកំណត់អត្តសញ្ញាណជនជាតិចិន ដែលចូលមករស់នៅ និងប្រកបការងារផ្សេងៗនាខេត្តព្រះសីហនុ ឲ្យបានច្បាស់លាស់ ដើម្បីងាយស្រួលក្នុងការគ្រប់គ្រង។ ជាងនេះ ក៏ស្នើដល់មន្ត្រីស្ថាប័នជំនាញមានកងកម្លាំងប្រដាប់អាវុធ និងតុលាការជាដើម ត្រូវអនុវត្តច្បាប់ទៅលើបទល្មើសបង្កដោយជនជាតិចិនឲ្យបានត្រឹមត្រូវ និងជៀសឲ្យផុតពីអំពើពុករលួយ ដែលអាចនឹងកើតមានឡើង៖ «ក្រសួងមហាផ្ទៃគួរតែបង្កើនកម្លាំងសន្តិសុខកម្លាំងនគរបាលយុត្តិធម៌យើងហ្នឹងឲ្យបានមួយទ្វេជាពីរ ឬជាបីថែមទៀត និងត្រូវមានសម្ភារៈឲ្យបានគ្រប់ចំនួនសម្រាប់ទប់ស្កាត់ ឬបង្ការបទល្មើសទាំងអស់ ដែលបង្កដោយជនជាតិចិន ឲ្យបានគ្រប់ចំនួន និងចុះបង្ក្រាប ឲ្យបានទាន់ពេលវេលាក្នុងករណីមានបទល្មើសកើតឡើង។ ក្នុងនោះកម្លាំងសមត្ថកិច្ចយើងត្រូវតែមានសមត្ថភាពគ្រប់គ្រាន់ និងត្រូវបង្កើនការចុះអនុវត្តការងារនេះជាប្រចាំផងដែរ ព្រោះសង្កេតឃើញថា ជនជាតិចិនភាគច្រើនមានសកម្មភាពដើរហើរសេរី ទាំងយប់កណ្ដាលអធ្រាត្រ និងស្រែកឡូឡាតាមផ្លូវសាធារណៈក៏មាន។ ជាងនេះ ជនជាតិចិនមួយចំនួន គឺចូលចិតប្រើអំពើហិង្សាដាក់គ្នាទៅវិញទៅមក និងមានចរិតឆេវឆាវ និងស្រែកឡូឡាបង្កឲ្យមានការភ្ញាក់ផ្អើលតែម្ដង»។
ព័ត៌មានទាក់ទងបទល្មើសវាយកាប់ចាក់ ជាពិសេសបទល្មើសចាប់ជំរិតមនុស្ស ដែលមានជនសង្ស័យជាជនជាតិចិន ចូលមករស់នៅខេត្តព្រះសីហនុ ប៉ុន្មានឆ្នាំចុងក្រោយនេះ គឺបានបង្កការភ័យខ្លាចដល់ប្រជាពលរដ្ឋ ឈ្មួញមានទ្រព្យ អ្នកវិនិយោគទុន និងភ្ញៀវទេសចរជាដើម។ ករណីនេះ ភ្ញៀវទេសចរជាតិ បានខ្លាចរអាមិនចង់ចូលមកទស្សនាខេត្តព្រះសីហនុទៀតទេ នៅឆ្នាំខាងមុខ ព្រោះបារម្ភពីសុវត្ថិភាពក្នុងការធ្វើដំណើរជាដើម។
ស្នងការនគរបាលខេត្តព្រះសីហនុ លោក ជួន ណារិន្ទ អះអាងថា កម្លាំងនគរបាលបានសហការជាមួយកម្លាំងកងរាជអាវុធហត្ថខេត្ត ចុះបង្ក្រាបមុខសញ្ញាប្រព្រឹត្តបទល្មើសបានទាន់ពេល និងទទួលបានផលវិជ្ជមានជាច្រើនករណីដូចជាការចាប់ខ្លួនជនសង្ស័យ ដែលបានប្រព្រឹត្តិបទល្មើស បញ្ជូនទៅតុលាការផ្ដន្ទាទោស៕