Clik here to view.
សាលាដំបូងរាជធានីភ្នំពេញ នៅថ្ងៃទី១៦ ខែមករា កោះហៅកម្មករ ១៦នាក់ ទៅបំភ្លឺពីបទញុះញង់ និងបង្កឲ្យរាំងស្ទះចរាចរណ៍ បន្ទាប់ពីពួកគេតវ៉ាបិទផ្លូវវ៉េងស្រេង។ កាលពីខែធ្នូ ឆ្នាំ២០១៧ កម្មកររោងចក្រស្បែកជើង ម៉េង ដា ហ្វូតវៀរ (Meng Da Footwear) ផលិតស្បែកជើងម៉ាកអាឌីដាស (Adidas) រាប់រយនាក់ បាននាំគ្នាធ្វើបាតុកម្មបិទផ្លូវវ៉េងស្រេង នាំឲ្យស្ទះចរាចរណ៍ជាច្រើនម៉ោងដើម្បីដាក់គំនាបឲ្យថៅកែរោងចក្រផ្ដល់ប្រាក់អត្ថប្រយោជន៍ឲ្យពួកគេ។
ក្នុងចំណោមកម្មករ ១៦នាក់ ដែលតុលាការកោះហៅតាមបណ្ដឹងរបស់ថ្នាក់ដឹកនាំរោងចក្រ ភាគច្រើនបានគេចខ្លួន និងខ្លះបានចូលទៅបំភ្លឺ។
កម្មករផ្នែកវាយពណ៌ស្បែកជើង លោក បូ អេម អាយុ ២៣ឆ្នាំ ថ្លែងថា គាត់មិនបានញុះញង់ឲ្យមានការតវ៉ាទេ ពោលគឺជាទឹកចិត្តកម្មករដែលចូលរួមតវ៉ារៀងៗខ្លួន ដើម្បីទាមទារប្រាក់អត្ថប្រយោជន៍ប៉ុណ្ណោះ។ លោកថា លោកចូលទៅបំភ្លឺនៅតុលាការរួចរាល់តាមបណ្ដឹងរបស់អគ្គនាយករោងចក្រ ប៉ុន្តែលោកបានដឹងថា កម្មករកម្មការិនីខ្លះមិនបានចូលខ្លួនបំភ្លឺនោះទេ ប្រហែលជាពួកគេភ័យខ្លាច ប៉ុន្តែលោកភ្ញាក់ផ្អើលនៅពេលឃើញឈ្មោះត្រូវតុលាការកោះហៅ៖ «ខ្ញុំទៅម្នាក់ឯង ទៅនិយាយជាមួយគេ ហើយខ្ញុំមិនសូវចេះច្បាប់។ ខ្ញុំជាកម្មករ ខ្ញុំធ្វើការដើម្បីលុយ លុយកាក់ក៏មិនបានណាស់ណាដែរ នៅថ្លៃផ្ទះ ទឹក ភ្លើងទៀតនោះ។ យើងធ្វើយ៉ាងណាក៏មិនឈ្នះគេដែរ ព្រោះយើងអត់មានលុយកាក់ផង។ គេសួរថា ប្អូនចូលធ្វើការវិញដែរ? ខ្ញុំឆ្លើយថា ខ្ញុំធ្វើការរាល់ថ្ងៃ កូដកម្មបាន ៥-៦ថ្ងៃ ខ្ញុំចូលធ្វើការ ហើយចូលហ្នឹងអត់មានរឿងធំដុំកើតឡើងផង បើកលុយធម្មតាបាន ១ខែជាងហើយទើបផ្អើល។ ធម្មតាកូដកម្មតែងតែមានការនិយាយគ្នា ប៉ុន្តែពុំមានការវាយទ្រព្យសម្បត្តិរោងចក្រឯណាតាមសន្តិវិធី ហើយបិទផ្លូវនោះនៅពេលអភិបាលក្រុងចុះមកមិនឲ្យបិទផ្លូវក៏កម្មករលែងឲ្យបិទ»។
ដីការបស់ព្រះរាជអាជ្ញារងដែលបានកោះហៅកម្មករឈ្មោះ លោក បូ អេម ត្រូវបានឈ្មោះ លី ចេងទី (Li Cheng Te) ចោទថា បាន «ញុះញង់ធ្វើឲ្យខូចខាតដោយចេតនា និងរាំងស្ទះដល់ចរាចរណ៍សាធារណៈ» កាលពីថ្ងៃទី១៣ ខែធ្នូ ឆ្នាំ២០១៧។
កាលពីថ្ងៃទី១ ខែធ្នូ ឆ្នាំ២០១៧ កម្មករជាច្រើនរយនាក់ដែលធ្វើការនៅរោងចក្រនេះ បានធ្វើកូដកម្មទាមទារលក្ខខណ្ឌការងារចំនួន ៥ចំណុច ដែលរួមមានលុយ ៥ភាគរយ លុយអតីតភាពការងារ លុយបំណាច់ឆ្នាំ លុយជូនដំណឹង និងលុយជំងឺចិត្ត។
ប្រធានសហជីពស៊ីខៅឌូ ប្រចាំរោងចក្រ ម៉េង ដា លោក យី រដ្ឋា ថ្លែងថា នៅថ្ងៃទី១៦ ខែមករា កម្មការិនី ២នាក់ទៀតក៏បានទៅបំភ្លឺតាមការកោះហៅដែរ ប៉ុន្តែពួកគេបានត្រឡប់មកវិញដោយសារអវត្តមានព្រះរាជអាជ្ញារង។ ចំណែកការតវ៉ារបស់កម្មករ លោកបានដឹងថា ពួកគេចេញធ្វើបាតុកម្មបន្ទាប់ពីបានដំណឹងថា រោងចក្រនេះមានគម្រោងផ្លាស់ប្ដូរអគ្គនាយកគ្រប់គ្រងរោងចក្រពីជនជាតិចិន ទៅវៀតណាមវិញ ទើបកម្មករជាច្រើនរយនាក់ចង់ឲ្យភាគីរោងចក្រទូទាត់សំណងឲ្យពួកគេមួយវគ្គសិន ព្រោះខ្លាចបាត់បង់ប្រាក់អត្ថប្រយោជន៍ និងប្រាក់អតីតភាពការងារ៖ «បងប្អូនកម្មករគាត់ចេញទាមទារខ្លួនគាត់។ ពួកខ្ញុំគិតថា ព័ត៌មាននេះវាអត់ជាក់លាក់ យើងអត់អាចចូលរួម ឬចរចាជាមួយពួកគាត់បាន»។
ពាក់ព័ន្ធបញ្ហានេះ ប្រធានសហភាពការងារកម្ពុជា លោក អាត់ ធន់ យល់ថា នេះហើយជាលទ្ធផលនៃច្បាប់សហជីពថ្មីដែលបន្ថយសិទ្ធិរបស់កម្មករ និងសហជីពក្នុងការធ្វើការងារជាមួយកម្មករ។ លោកមានប្រសាសន៍ថា កាលពីមុខមានច្បាប់សហជីពថ្មីនេះ សហជីពអាចចូលរួមសម្របសម្រួល និងដឹកនាំកម្មករធ្វើកូដកម្មឲ្យស្របច្បាប់ ប៉ុន្តែដោយសារច្បាប់ថ្មីមិនអនុញ្ញាតឲ្យសហជីពចូលរួម និងដឹកនាំធ្វើកូដកម្មនោះ បានធ្វើឲ្យកម្មករកាន់តែរងគ្រោះ ដោយសារការទាមទារគ្មានដំណោះស្រាយ ហើយរងបណ្ដឹងពីភាគីរោងចក្រថែមទៀត។
លោកស្នើឲ្យរដ្ឋាភិបាល និងក្រសួង គួរពិនិត្យមើលច្បាប់សហជីពឡើងវិញ ដើម្បីឲ្យសហជីពមានសិទ្ធិជាតំណាង និងឲ្យកម្មករមានសិទ្ធិក្នុងការចូលរួមសហជីពវិញទើបអាចដោះស្រាយបញ្ហាបាន៖ «នៅពេលដែលសិទ្ធិសហជីពត្រូវបានដកដោយច្បាប់សហជីព ដូចជាមាត្រា១៤ និងមាត្រា៥៤ ហ្នឹងហើយ អាជ្ញាធរគួរតែយកចិត្តទុកដាក់តំណាងឲ្យកម្មករដូចជា តុលាការ ឬក៏អាជ្ញាធរ ប៉ុន្តែទីបំផុតគឺពួកគាត់ចេញពីកូដកម្មមិនដឹងទៅណាវិញ ចូលទៅក្រុមហ៊ុនគេមិនឲ្យចូល ឥឡូវគេប្ដឹងទៅតុលាការទៀត ទីបំផុតអត់មាននរណាជួយគាត់ទៀត»។
លោក អាត់ ធន់ បន្តថា ថ្វីបើមានការរឹតបន្តឹងដោយច្បាប់សហជីពថ្មីបែបនេះក្ដី ប៉ុន្តែថ្នាក់ដឹកនាំសហជីពនៅតែត្រូវភាគីរោងចក្រប្ដឹងដូចគ្នា ចុះទម្រាំកម្មករដែលគាត់គ្មានប្រាក់កាស តើគាត់មានប្រាក់ឯណាជួលមេធាវី? លោកហាក់ពុំមានសង្ឃឹមសោះថា កម្មករនឹងទទួលបានយុត្តិធម៌។
ការតវ៉ារបស់កម្មករ រោងចក្រស្បែកជើង ម៉េង ដា ផលិតផលម៉ាកល្បី អាឌីដាស បានត្រឹមតែតវ៉ាគ្មានដំណោះស្រាយ រងបណ្ដឹង ១៦នាក់នៅតុលាការដោយភាគីក្រុមហ៊ុន និងប្រមាណ ១ពាន់នាក់ត្រូវរោងចក្របញ្ឈប់ពីការងារ៕