Clik here to view.
សាលារាជធានីភ្នំពេញ និងក្រុមហ៊ុនសាជីវកម្មវិនិយោគ អូ.ស៊ី.អាយ.ស៊ី (OCIC) នឹងចាប់ផ្ដើមសាងសង់ស្ពានអាកាសថ្មើរជើងមួយនៅជិតពហុកីឡាដ្ឋានជាតិអូឡាំពិក ដែលមានតម្លៃជាង ៣លានដុល្លារ នៅដើមឆ្នាំ២០១៨ នេះ។
អ្នកជំនាញផ្នែកសុវត្ថិភាពចរាចរណ៍គាំទ្រឲ្យប្រទេសកម្ពុជាមានស្ពានអាកាសថ្មើរជើងឲ្យបានច្រើន និងចំតំបន់សំខាន់ៗ ដើម្បីកាត់បន្ថយគ្រោះថ្នាក់ចរាចរណ៍ដល់អ្នកដើរឆ្លងកាត់ផ្លូវ។
មន្ត្រីជំនាញសុវត្ថិភាពចរាចរណ៍ កញ្ញា សាន់ សុជាតា ថ្លែងថា ស្ពានអាកាសសម្រាប់ថ្មើរជើង គឺជាមធ្យោបាយល្អ ដើម្បីកាត់បន្ថយការកកស្ទះចរាចរណ៍ និងគ្រោះថ្នាក់ចរាចរណ៍ សម្រាប់អ្នកថ្មើរជើងទាំងយប់ទាំងថ្ងៃ។ កញ្ញាបន្តថា អ្វីដែលសំខាន់ អាជ្ញាធរត្រូវជ្រើសរើសយកទីតាំងសង់ស្ពានឲ្យបានចំកន្លែងដែលមានភាពចាំបាច់ដូចជា កន្លែងសាលារៀន និងទីផ្សារជាដើម៖ «គោលបំណងដែលគាត់ធ្វើស្ពាននេះខ្ញុំគិតថា ល្អមែនទែន អ្វីដែលចាំបាច់ក្រៅពីស្ពានគឺហេដ្ឋារចនាសម្ព័ន្ធជុំវិញតំបន់នេះ ធម្មតាស្ពាននេះនឹងធ្វើលើកទឹកចិត្តឲ្យថ្មើរជើងគាត់ដើរនៅលើស្ពាននេះ បន្ទាប់ពីចុះមកវិញត្រូវមានហេដ្ឋារចនាសម្ព័ន្ធដែលអាចឲ្យគាត់ចុះដើរដោយសុវត្ថិភាពទៅដល់ទីតាំងដែលគាត់ចង់ទៅ។ សំដៅទៅលើចិញ្ចើមផ្លូវដោយមានសុវត្ថិភាព ព្រោះមិនអាចចុះនៅលើស្ពានអាកាសមកមិនអាចឲ្យគាត់ដើរនៅលើផ្លូវមានឡានដដែល ដោយសារចិញ្ចើមផ្លូវមានអ្វីនៅបាំង មានហាងមានអី ដែលសុវត្ថិភាពរបស់គាត់នៅប្រឈមដដែល»។
សាលារាជធានីភ្នំពេញ និងក្រុមហ៊ុន សាជីវកម្មវិនិយោគអូ.ស៊ី.អាយ.ស៊ី នឹងចាប់ផ្ដើមសាងសង់ស្ពានអាកាសថ្មើរជើងមួយនៅជិតពហុកីឡាដ្ឋានជាតិអូឡាំពិក ដែលមានតម្លៃជាង ៣លានដុល្លារ នៅដើមឆ្នាំ២០១៨ នេះ។
គេហទំព័រខ្មែរ បៀល មីឌា (Khmer Build Media) បានឲ្យដឹងថា ការសាងសង់ស្ពានអាកាសថ្មើរជើងនេះ នឹងធ្វើឡើងនៅទីតាំងផ្លូវប្រសព្វអតីតរង្វង់មូលនាងគង្ហីង ដែលស្ថិតនៅចន្លោះមហាវិថីហ្សាល ឌឺហ្គោល និងផ្លូវឧកញ៉ាទេពផន។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី សង្ឃឹមថា ស្ពានថ្មើរជើងនេះនឹងរួមចំណែកធ្វើឲ្យរាជធានីភ្នំពេញ ជាកន្លែងដែលមានសុវត្ថិភាពជាងមុនសម្រាប់អ្នកថ្មើរជើង និងជួយកាត់បន្ថយការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍។
អ្នកនាំពាក្យដដែលបន្តថា ផ្លូវថ្មើរជើងនេះ ជាផ្នែកមួយនៃគម្រោងទីក្រុងអូឡាំព្យា (Olympia City) នឹងត្រូវបញ្ចប់ការសាងសង់នៅត្រឹមខែមេសា ឆ្នាំ២០១៨ គឺនៅមុនពេលពិធីបុណ្យចូលឆ្នាំថ្មីប្រពៃណីជាតិខ្មែរ។
ប៉ុន្តែ នាយកគ្រប់គ្រងគម្រោងទីក្រុងអូឡាំព្យា លោក ម៉េង ចំរើន មិនទាន់សង្ឃឹមថា គម្រោងនេះ អាចបញ្ចប់ក្នុងរយៈពេល ៦ខែនោះទេ ដោយសារការសាងសង់ស្ពានអាចប៉ះពាល់ដល់ ការធ្វើចរាចរណ៍ ការប្រកបអាជីវកម្មនានា នៅតាមផ្លូវ និង ផ្ទះមួយចំនួនផង។
តម្លៃគម្រោងជាង ៣លានដុល្លារនេះ ត្រូវបានផ្ដល់ហិរញ្ញប្បទានដោយក្រុមហ៊ុន អូ.ស៊ី.អាយ.ស៊ី ទាំងស្រុង ដោយវាជាផ្នែកមួយនៃគម្រោងអភិវឌ្ឍន៍ទីក្រុងអូឡាំព្យាទាំងមូល។ គម្រោងទីក្រុងអូឡាំព្យា ដែលនឹងរួមមាន អាគារខ្ពស់ៗ អាគារការិយាល័យ និងផ្សារលក់ទំនិញផ្សេងៗ សង់លាតសន្ធឹងលើទំហំផ្ទៃដី ១១ហិកតារ នៅភាគខាងជើងឆៀងខាងកើត នៃដីរបស់ពហុកីឡាដ្ឋានជាតិអូឡាំពិក។
កន្លងមកមានការរិះគន់ពីអ្នកបច្ចេកទេសថា ការយកដីពហុកីឡាដ្ឋានជាតិអូឡាំពិក សាងសង់អគារព័ន្ធជុំវិញ បណ្ដាលឲ្យប៉ះពាល់ដល់សុវត្ថិភាពអ្នកប្រើប្រាស់ និងបរិស្ថានរបស់ពហុកីឡាដ្ឋានជាតិអូឡាំពិក។
គម្រោងសាងសង់ស្ពានអាកាសសម្រាប់ថ្មើរជើងនេះ គឺជាស្ពានទី៣ ហើយ បន្ទាប់ពីអាជ្ញាធររាជធានីភ្នំពេញបានសាងសង់ស្ពានប្រភេទនេះចំនួន ២ កាត់នៅលើផ្លូវជាតិលេខ ៤ ចំណុចផ្សារជំពូវ័ន្ត ក្នុងដង្កោ។ ប៉ុន្តែស្ពាននោះហាក់ពុំសូវមានអ្នកធ្វើដំណើរឆ្លងប៉ុន្មានទេ ដោយសារកន្លងមក មានការរិះគន់តាមបណ្ដាញសង្គមថា ស្ពាននេះធ្វើខុសបច្ចេកទេស ដោយសារតែអ្នកថ្មើរជើង ត្រូវដើរឆ្លងកាត់ផ្លូវដដែលបន្ទាប់ពីឆ្លងស្ពាន៕