លោក ស ខេង រដ្ឋមន្ត្រីក្រសួងមហាផ្ទៃ បានបញ្ជាឲ្យរំសាយ និងបញ្ឈប់ទាំងស្រុងនូវរាល់សកម្មភាពរបស់ប៉ុស្តិ៍ត្រួតពិនិត្យទាំងផ្លូវគោក និងផ្លូវទឹកទាំងអស់ដែលធ្លាប់មានការអនុញ្ញាតពីក្រសួង ស្ថាប័នជំនាញពាក់ព័ន្ធនៅពេលកន្លងមក។
លោក ស ខេង មើលឃើញថា ការដាក់ពង្រាយប៉ុស្ដិ៍ត្រួតពិនិត្យ និងការបង្កើតឲ្យមានការត្រួតពិនិត្យជាច្រើនទីតាំង មានសមត្ថកិច្ចច្រើនមុខជំនាញ ជាកត្តានាំឲ្យមានបញ្ហាប្រឈម ប៉ះពាល់ដល់សិទ្ធិសេរីភាព ផលប្រយោជន៍ និងសតិអារម្មណ៍ពលរដ្ឋ។ លោកបានអះអាងថា គោលបំណងនៃការបិទប៉ុស្ដិ៍ត្រួតពិនិត្យទាំងនេះ គឺដើម្បីជំរុញការអនុវត្តគោលនយោបាយ និងការប្ដេជ្ញាចិត្តមោះមុតរបស់រដ្ឋាភិបាលក្នុងការផ្ដល់សេវាបម្រើជូនប្រជាពលរដ្ឋក្នុងការធ្វើសកម្មភាពប្រកបមុខរបរលើកស្ទួយជីវភាពប្រចាំថ្ងៃ។
ទោះជាយ៉ាងនេះក្តី លោករដ្ឋមន្ត្រីក្រសួងមហាផ្ទៃ លើកឡើងថា ក្នុងករណីចាំបាច់ផ្នែកលើស្ថានការណ៍ជាក់ស្ដែង ដែលតម្រូវឲ្យបង្កើតប៉ុស្ដិ៍ត្រួតពិនិត្យឈរជើងអចិន្ត្រៃយ៍ ឬប៉ុស្ដិ៍ចល័តត្រួតពិនិត្យរបស់សា្ថប័នជំនាញ គណៈបញ្ជាការឯកភាពរាជធានី ខេត្ត ត្រូវធ្វើសំណើសុំការពិនិត្យសម្រេចពីប្រធានគណៈបញ្ជាការត្រួតពិនិត្យ និងលុបបំបាត់ប៉ុស្ដិ៍ត្រួតពិនិត្យអនាធិបតេយ្យតាមផ្លូវគោក និងផ្លូវទឹកសិន ទើបអាចអនុវត្តបាន៕