កម្ពុជា ដាក់តាំងពិព័រណ៍គ្រឿងអលង្ការខ្មែរសម័យបុរាណរយៈពេល ១ខែ ចាប់ពីថ្ងៃទី៤ ខែមករា ដល់ថ្ងៃទី៣ ខែកុម្ភៈ នៅសារមន្ទីរជាតិ។ កម្ពុជា បានទទួលគ្រឿងអលង្ការខ្មែរបុរាណទាំងនោះកាលពីថ្ងៃទី២ ខែធ្នូ ឆ្នាំ២០១៧ បន្ទាប់ពីបានស្នើសុំវត្ថុបុរាណទាំងនេះពីខាងភ្នាក់ងារលក់វត្ថុបុរាណក្នុងប្រទេសអង់គ្លេស អស់រយៈពេលមួយឆ្នាំ។
គ្រឿងអលង្ការទាំងនោះ រួមមាន មកុដមាស ខ្សែកមាស ក្រវិលមាស ស្នាប់ដៃមាស និងវត្ថុបុរាណផ្សេងៗមួយចំនួនទៀត។ ក្រៅពីនោះក៏មានតាំងពិព័រណ៍គ្រឿងអលង្ការធ្វើពីប្រាក់ និងស្ពាន់ជាច្រើនទៀតផងដែរ។
ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកស្រី ម៉ែន សំអន មានប្រសាសន៍ថា ពិព័រណ៍នេះបានបង្ហាញឲ្យឃើញនូវវត្ថុពិចិត្រៗ ជាគ្រឿងអលង្ការ និងគ្រឿងលំអធ្វើពីមាស និងប្រាក់ដែលជាស្នាដៃសិល្បៈខ្មែរបុរាណដ៏វិចិត្រ និងគំនិតឆ្នៃប្រឌិតនៃគ្រូ និងសិល្បករខ្មែរពីជំនាន់មួយទៅជំនាន់មួយ។
ក្រោយការតាំងពិព័រណ៍រួច សារមន្ទីរនឹងយកគ្រឿងអលង្ការទាំងនោះទៅថ្លឹងទម្ងន់វាស់វែងដាក់តាមប្រភេទនៃគ្រឿងអលង្ការ និងចុះបញ្ជីសារពើពន្ធ។ បន្ទាប់ពីរៀបចំរួចរាល់ សារមន្ទីរនឹងធ្វើពិធីប្រគល់ជូនក្រសួងវប្បធម៌ និងវិចិត្រសិល្បៈម្ដងទៀត ដើម្បីយកទៅរក្សាទុកនៅកន្លែងមានសុវត្ថិភាពបំផុត។ យោងតាមអនុសញ្ញាស្ដីពីការហាមឃាត់ និងការពារមិនឲ្យមានការនាំចេញ និងការនាំចូលវត្ថុបុរាណរបស់អង្គការយូណេស្កូ (UNESCO) ឆ្នាំ១៩៧០ បង្ហាញថា រាល់វត្ថុបុរាណទាំងឡាយត្រូវប្រគល់ជូនប្រទេសម្ចាស់ដើមវិញ៕