Clik here to view.
កសិករស្នើសុំឲ្យរដ្ឋាភិបាលគិតគូរពីបញ្ហាសុខភាពរបស់ពួកគាត់ផង ខណៈដែលពួកគាត់មើលឃើញថា រដ្ឋាភិបាលបានយកចិត្តទុកដាក់ខ្លាំង ចំពោះបញ្ហាសុខភាពរបស់មន្ត្រីរាជការ កីឡាករ កម្មកររោងចក្រ និងអ្នកប្រកបរបរសេដ្ឋកិច្ចក្រៅប្រព័ន្ធ។ ក្រុមកសិករប្រាប់ថា ពួកគាត់ចង់ទទួលបានសេវាថែទាំសុខភាព និងការព្យាបាល ដោយមិនអស់ប្រាក់ដែរ ដោយសារពួកគាត់ ជាអ្នករកចំណូលបានទាបបំផុត ហើយប្រឈមការទ្រុឌទ្រោមសុខភាពខ្លាំង។
កសិករ និងម្ចាស់កសិដ្ឋានលក្ខណៈគ្រួសារ សុទ្ធតែចង់ទទួលបានសេវាពិនិត្យព្យាបាលជំងឺដោយឥតគិតប្រាក់។ ពួកគាត់រៀបរាប់ថា ក្រុមកសិករដូចពួកគាត់ ប្រឈមនឹងការធ្លាក់ខ្លួនឈឺ សុខភាពទ្រុឌទ្រោមខ្លាំងជាងក្រុមមនុស្សដទៃ ដោយសារពួកគាត់ ប្រើកម្លាំងកាយសុទ្ធសាធ ក្នុងការធ្វើស្រែចម្ការ ចិញ្ចឹមសត្វ ដើម្បីផ្គត់ផ្គង់អ្នករស់នៅទីក្រុង។
ប្រធានសហគមន៍កសិករដាំបន្លែកុករវៀ ស្ថិតនៅភូមិកុករវៀ ឃុំរវៀង ស្រុកសំរោង ខែត្រតាកែវ លោក ផៃ ថា ត្អូញត្អែរថា ដោយសារតែកត្តាជីវភាពក្រីក្រ នៅពេលដែលកសិករក្នុងសហគមន៍ធ្លាក់ខ្លួនឈឺ ពួកគេត្រូវលក់ស្រូវ លក់ស្រែ លក់គោ និងចម្ការ ដើម្បីយកលុយទៅព្យាបាលជំងឺ។ ប៉ុន្តែ នៅពេលដែលខ្វះអង្ករបរិភោគ ឬដល់រដូវធ្វើស្រែចម្ការវិញ កសិករចាប់ផ្ដើមចងការប្រាក់ធនាគារ ឬខ្ចីបុលគេ ដើម្បីយកមកធ្វើចម្ការវិញ។ «»
នយោបាយគាំពារផ្នែកសង្គមកិច្ចថ្មី របស់លោកនាយករដ្ឋមន្ត្រី ហ៊ុន សែន គឺលោកបានអនុញ្ញាតឲ្យកម្មករ កម្មការិនី កីឡាករ កីឡាការិនី មន្ត្រីរាជការសាធារណៈ ប្រធានភូមិ អនុភូមិ ជំនួយការភូមិ ក្រុមប្រឹក្សាឃុំ និងអ្នកដែលប្រកបរបរសេដ្ឋកិច្ចក្រៅប្រព័ន្ធ ដូចជា អ្នករត់ម៉ូតូឌុប រ៉ឺម៉កកង់បី និងអ្នកធាក់ស៊ីក្លូ អាចទៅព្យាបាល និងពិនិត្យជំងឺនៅតាមមន្ទីរពេទ្យរដ្ឋដោយឥតគិតថ្លៃ បើទោះជាសេវា និងវិស័យសុខាភិបាលនៅរងការរិះគន់ខ្លះក៏ដោយ។ មិនតែប៉ុណ្ណោះ ចំពោះស្ត្រីក្នុងវិស័យទាំងនេះ ឆ្លងទន្លេ លោកបានប្រកាសផ្ដល់ប្រាក់ឧបត្ថម្ភពិសេសបន្ថែមទៀត។
កសិករម្នាក់ទៀត និងជាជំទប់ទី២ របស់គណបក្សសង្គ្រោះជាតិ ដែលទើបចេញពីដំណែង រស់នៅឃុំព្រែកស្លែង ស្រុកកណ្ដាលស្ទឹង ខែត្រកណ្ដាល គឺ អ្នកស្រី អឿង សារី ប្រាប់ថា កសិករនៅក្នុងសហគមន៍ដែលមានជម្លោះដីធ្លីជាមួយក្រុមហ៊ុន ហេង អភិវឌ្ឍន៍ របស់អ្នកស្រី សៀង ចាន់ហេង នៅស្រុកកណ្ដាលស្ទឹង សុទ្ធតែចង់បានគោលនយោបាយគាំពារសុខភាពដោយមិនគិតថ្លៃ។ អ្នកស្រី អឿង សារី ដែលសម្រេចចិត្តធ្វើជាកសិករវិញ ក្រោយតុលាការរំលាយបក្សប្រឆាំង រៀបរាប់ពីជីវភាព និងសុខភាពកសិករ នៅក្នុងសហគមន៍មានជម្លោះដីធ្លី ស្រុកកណ្ដាលស្ទឹង ថា មានភាពយ៉ាប់យឺនណាស់ ខណៈដែលកសិករបានលក់ដីស្រែ មើលជំងឺជារៀងរាល់ឆ្នាំ។ «»
បើទោះជាបែបនេះក្ដី កសិករប្រាប់ថា ក្រៅពីចង់ទទួលបានសេវាថែទាំ និងព្យាបាលជំងឺ ពួកគាត់ក៏ចង់ឃើញសេវា ដែលរដ្ឋផ្ដល់ឲ្យពួកគាត់ មិនមែនជាសេវាមានតែឈ្មោះ ឬត្រឹមតែឲ្យល្អមើលនោះទេ។ ពោល គឺសេវានោះ ត្រូវតែមានប្រសិទ្ធភាព ដែលកសិករតាមស្រុកស្រែចម្ការទទួលយកបាន។ ទន្ទឹមនឹងនេះ ពួកគាត់ចង់ឃើញមណ្ឌលសុខភាព នៅតាមឃុំ សង្កាត់ និងមន្ទីរពេទ្យបង្អែកស្រុក មានឧបករណ៍ គ្រឿងបរិក្ខារពេទ្យគ្រប់គ្រាន់។ ទោះជា មិនទាន់ទទួលបានសេវាថែទាំសុខភាព និងព្យាបាលជំងឺដោយឥតគិតថ្លៃក៏ដោយ ក៏ក្រុមកសិករ នៅតែស្នើយ៉ាងទទូចឲ្យគ្រូពេទ្យមួយចំនួន ដែលប្រើឥរិយាបថមិនល្អ កែប្រែឥរិយាបថ នៅពេលដែលពួកគាត់ទៅរកសេវាព្យាបាលជំងឺ។
វិស័យសុខាភិបាលកម្ពុជា មិនមែនមានតែកសិករ និងប្រជាពលរដ្ឋសាមញ្ញទេ ដែលរិះគន់។ កាលពីដើមឆ្នាំ២០១៦ លោកវេជ្ជបណ្ឌិត គួច ម៉េងលី ដែលមានងារជាឧកញ៉ាមួយរូប និងបានមករស់នៅកម្ពុជា ជាពេទ្យស្ម័គ្រចិត្ត ចាប់តាំងពីឆ្នាំ២០០២ ធ្លាប់បានថ្លែងរិះគន់វិស័យសុខាភិបាលនេះ ថា ក្នុងចំណោមគ្រូពេទ្យ ១០នាក់នៅកម្ពុជា មាន៩នាក់ទៅហើយ ដែលគ្មានក្រមសីលធម៌ ហើយព្យាបាលអ្នកជំងឺមិនត្រឹមត្រូវ។ លោកត្រូវបានដកស្រង់សម្ដីកាលនោះថា៖ «វិស័យសុខាភិបាលយើង បើខ្ញុំឲ្យពិន្ទុពី ១ ដល់១០ ខ្ញុំឲ្យ២ពិន្ទុ។ បើអ្នកក្រទៅពេទ្យ ខ្ញុំហ៊ានធានាគេនឹងដេកនៅចិញ្ចើមផ្លូវ។ នោះជាអ្វីដែលខ្ញុំឃើញទិដ្ឋភាពដោយផ្ទាល់។ ស្ត្រីសម្រាលកូនខ្លះកូនអាចស្លាប់ក្នុងពោះ បើគ្មានលុយវះ។ សំណួរដែលត្រូវសួរខ្លួនឯងពេលនេះ គឺថាក្នុងសតវត្សទី២១ តើកម្ពុជាយើងត្រូវឆ្លងកាត់ភាពវេទនានេះបន្តទៀត ឬយ៉ាងណា? ខ្ញុំអត់ដែលជួបពេទ្យណាអាក្រក់សែនអាក្រក់ ដូចពេទ្យនៅស្រុកខ្មែរយើងទេ»។
ក៏ប៉ុន្ដែ នៅថ្ងៃទី៤ មករា ឆ្នាំ២០១៨ លោកនាយករដ្ឋមន្ត្រី ហ៊ុន សែន បានទាត់ចោលការលើកឡើងនេះ។ លោកនាយករដ្ឋមន្ត្រី ហ៊ុន សែន ថ្លែងថាបែបវិភាគ ក្រោយពេលដែលលោកហៅអ្នកវិភាគនៅស្រុកខ្មែរថា ជាមនុស្សល្ងង់ខ្លៅ វិភាគបែបកន្ទុយអណ្ដើក ថា បើគ្រូពេទ្យ៩០ភាគរយអន់ មានន័យថា ក្នុងចំណោម១០០នាក់ មានតែ១០ទេ ដែលមានក្រមសីលធម៌ និងឥរិយាបថល្អ លោក មិនជឿនោះទេ ខណៈដែល លោកតែងទៅព្យាបាលជំងឺនៅប្រទេសសិង្ហបុរី។ លោកនាយករដ្ឋមន្ត្រី ហៅការលើកឡើងបែបនេះ ជាការប្រមាថ។ «»
ចំណែកអ្នកស្រាវជ្រាវបញ្ហាសង្គម និងជាអ្នកវិភាគនយោបាយ លោកបណ្ឌិត កែម ឡី កាលនៅមាន ជីវិត បានចេញផ្សាយនៅអត្ថបទស្រាវជាវមួយជុំវិញគុណភាពសេវាសុខាភិបាលចាំបាច់ត្រូវតែធ្វើបដិវត្ត មិនមែនធ្វើកំណែទម្រង់ទេ។ ជាអតីតគ្រូពេទ្យម្នាក់នៅខែត្រតាកែវ លោកបណ្ឌិត កែម ឡី រកឃើញថា កត្តាដែលគុណភាពនៅមានកម្រិតទាបដោយសារកត្តា ៨យ៉ាងរួមមាន៖ កត្តាថ្នាំពេទ្យ កត្តាបច្ចេកទេស កត្តាសម្ភារបរិក្ខារពេទ្យ កត្តាទំនាក់ទំនង និងអាកប្បកិរិយាពេទ្យ កត្តានីតិវិធី និងដំណើរការព្យាបាល កត្តាគ្រូពេទ្យព្យាបាលចល័ត កត្តាប្រាក់ខែទាបបំផុត និងការលើកទឹកចិត្តតិចតួច ព្រមទាំងមិនមានអភិបាលកិច្ចល្អ និងចុងក្រោយកត្តានៃអត្រាឈឺ និងអត្រាស្លាប់របស់អ្នកជំងឺ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន យល់ថា ក្រោយពេលឃើញលោកនាយករដ្ឋមន្ត្រី អំពាវនាវឲ្យពលរដ្ឋថែរក្សាសុខភាពដោយខ្លួនឯង ដោយពហិការឈប់បរិភោគបន្លែសាច់ដែលមានសារធាតុគីមី លោកស្នើឲ្យរាជរដ្ឋាភិបាល ជាពិសេសលោកនាយករដ្ឋមន្ត្រី ហ៊ុន សែន ផ្ដល់សេវាសង្គមផ្នែកគាំពារសុខភាពដល់ក្រុមកសិករផង ដើម្បីពួកគេមានលទ្ធភាពទៅព្យាបាលជំងឺ ដូចក្រុមមនុស្សក្នុងវិស័យផ្សេងៗទៀត។ «»
រដ្ឋធម្មនុញ្ញ មាត្រា ៧២ ចែងថា សុខភាពរបស់ប្រជារាស្ត្រត្រូវបានធានា រដ្ឋយកចិត្តទុកដាក់ដល់ការ ពារជំងឺ និងព្យាបាលជំងឺ។ កសិករថា នៅចំណុចនេះ រដ្ឋាភិបាលបានយកចិត្តទុកដាក់ខ្លះហើយ តែមិនទាន់បានអនុវត្តស្មើភាពគ្នាទេ ចំពោះការព្យាបាលជំងឺ និងប្រាក់ឧបត្ថម្ភដល់កសិករជាស្ត្រីឆ្លងទន្លេ។ កសិករចង់ឃើញ ពលរដ្ឋខ្មែរទាំងអស់ទទួលបានការព្យាបាលដោយមិនគិតប្រាក់ដូចៗគ្នា និងចង់ទទួលបានសេវាសុខាភិបាលមួយ ដែលមានប្រសិទ្ធភាព និងគុណភាពត្រឹមត្រូវ៕