Clik here to view.
ប្រធានវិទ្យុសំបុកឃ្មុំ លោក ម៉ម សូណង់ដូ ស្នើឲ្យតុលាការកោះហៅក្រសួងព័ត៌មាន និងក្រសួងមហាផ្ទៃ ទៅឆ្លើយបំភ្លឺបទល្មើសក្បត់ជាតិ របស់លោក កឹម សុខា ជំនួសលោក ព្រោះថា ការជួលម៉ោងផ្សាយរបស់លោក កឹម សុខា នៅវិទ្យុសំបុកឃ្មុំ អំឡុងពេលលោក កឹម សុខា ជាប្រធានមជ្ឈមណ្ឌលសិទ្ធិមនុស្សកម្ពុជា មានការអនុញ្ញាតពីក្រសួងព័ត៌មាន ឲ្យផ្សាយ និងក្រសួងមហាផ្ទៃ អនុញ្ញាតឲ្យបើកអង្គការ។
ថ្លែងប្រាប់អាស៊ីសេរី ពីទីក្រុងប៉ារីស ប្រទេសបារាំង លោក ម៉ម សូណង់ដូ ឆ្ងល់ថា តើតុលាការស្រុកខ្មែរកោះហៅលោកទៅបំភ្លឺរឿងអ្វី បើលោកមិនដែលមានទំនាក់ទំនងជាមួយលោក កឹម សុខា ប្រធានគណបក្សសង្គ្រោះជាតិ នោះទេ។ លោកបញ្ជាក់ថា លោកមិនចង់ដាក់បន្ទុក ឬដោះបន្ទុកសម្រាប់បទល្មើសដែលតុលាការចោទលោក កឹម សុខា នោះទេ។ លោក ម៉ម សូណង់ដូ អះអាងថា ការជួលម៉ោងផ្សាយរបស់លោក កឹម សុខា នៅវិទ្យុសំបុកឃ្មុំ សុទ្ធតែមានការដឹងឮ និងអនុញ្ញាតពីក្រសួងព័ត៌មាន។ ដូច្នេះ លោកស្នើឲ្យតុលាការ បើចង់ដឹងអំពីព័ត៌មាន លោក កឹម សុខា គួរតែកោះហៅក្រសួងព័ត៌មានទៅបំភ្លឺ។ ជាងនេះទៅទៀត លោកបញ្ជាក់ថា វិទ្យុសំបុកឃ្មុំ បានជួលម៉ោងឲ្យអង្គការដែលមានច្បាប់ពីក្រសួងមហាផ្ទៃ អនុញ្ញាតឲ្យបើកអង្គការត្រឹមត្រូវ ដូច្នេះគួរតែកោះហៅក្រសួងមហាផ្ទៃ៖ «បើគេហៅពូដើម្បីបំភ្លឺទាក់ទងនឹងបញ្ហាពីនេះពីនោះរបស់លោក កឹម សុខា ហ្នឹងមិនបញ្ហាទេ។ ប៉ុន្តែបើចាប់ពូដាក់គុក ពូនឹងមិនចូលទេ ពូមានសំណួរសួរថា មានរឿងអីបើឲ្យពូបំភ្លឺ ពូមានរឿងអី? បើចង់សួរ ហៅក្រសួងព័ត៌មាន ចូលផង ទាក់ទងជាមួយលោក កឹម សុខា ជាមួយការជួលវិទ្យុ ឲ្យតែប៉ុណ្ណោះ។ ក្រសួងមហាផ្ទៃ ជាអ្នកអនុញ្ញាតឲ្យបើក បើប៉ះពាល់ដល់បញ្ហាសន្តិសុខជាតិ គួរតែហៅក្រសួងពាក់ព័ន្ធ មកប្រជុំ មិនមែនរឿងធំរបស់ពូទេ»។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី បានកោះហៅ ប្រធានវិទ្យុសំបុកឃ្មុំ គឺលោក ម៉ម សូណង់ដូ ដើម្បីឲ្យចូលខ្លួនឆ្លើយបំភ្លឺអំពីដំណើររឿងក្បត់ជាតិរបស់លោក កឹម សុខា នៅព្រឹកថ្ងៃទី១១ ខែមករា។ ដីកាកោះអញ្ជើញលោក ម៉ម សូណង់ដូ ធ្វើឡើងក្រោយពេលដែលចៅក្រមស៊ើបសួរ លោក គី ឬទ្ធី បានទៅសាកសួរលោក កឹម សុខា នៅក្នុងពន្ធនាគារត្រពាំងផ្លុង ដោយគ្មានវត្តមានមេធាវី កាលពីថ្ងៃទី២១ និង២២ ខែធ្នូ។ លោក កឹម សុខា ប្រាប់មេធាវីថា លោកឈប់ឆ្លើយសំណួររបស់ចៅក្រមស៊ើបសួរទៀតហើយ ព្រោះការសួរចម្លើយលោកក្នុងពន្ធនាគារគឺជារូបភាពគំរាមកំហែងរូបលោក និងបាត់បង់ផលប្រយោជន៍ជនសង្ស័យ។
មេធាវីការពារក្ដីឲ្យលោក កឹម សុខា គឺលោកមេធាវី ហែម សុជាតិ ធ្លាប់ឱ្យអាស៊ីសេរី ដឹងថា ចៅក្រមស៊ើបសួរតុលាការក្រុងភ្នំពេញ កាលពីពាក់កណ្ដាលខែធ្នូ បានសួរលោក កឹម សុខា រួចហើយទាក់ទងនឹងការជួលវិទ្យុសំបុកឃ្មុំ ដើម្បីផ្សព្វផ្សាយពីគោលការណ៍សិទ្ធិមនុស្ស និងគោលការណ៍លទ្ធិប្រជាធិបតេយ្យ កាលពីលោកនៅជាប្រធានអង្គការសិទ្ធិមនុស្សកម្ពុជា៖ «បញ្ហានេះបើទោះបីជាហៅលោក ម៉ម សូណង់ដូ ជាសាក្សីក៏យើងមិនមានការព្រួយបារម្ភដែរ។ រឿងនេះជុំវិញតែករណីការជួលវិទ្យុស្របច្បាប់តែប៉ុណ្ណោះទេ។ ពាក់ព័ន្ធសិទ្ធិមនុស្ស និងប្រជាធិបតេយ្យទេ»។
លោក ម៉ម សូណង់ដូ ដែលជាអតីតអ្នកទោសនយោបាយផងនោះ ឲ្យដឹងបន្ថែមទៀតថា លោកមិនទាន់បដិសេធថា លោកមិនចូលខ្លួនឆ្លើយបំភ្លឺពីករណីបទល្មើសដែលតុលាការចោទលោក កឹម សុខា នោះទេ ដោយលោកកំពុងពិចារណាសិន។ លោកយល់ថា ដីកាកោះហៅរបស់តុលាការនេះ មិនមែនជាដីកាល្អសម្រាប់លោក ឬត្រឹមតែកោះហៅធ្វើជាសាក្សីនោះទេ។ លោកយល់ថា ដីកានេះមានចេតនាដើម្បីចាប់ខ្លួនលោក។ លោកថា មនុស្ស ៣នាក់ ដែលរដ្ឋាភិបាលអាចនឹងមិនចង់ឃើញក្នុងឆាកនយោបាយ គឺលោក កឹម សុខា លោក សម រង្ស៊ី និងរូបលោកផ្ទាល់ ព្រោះតែគេចង់បំបាត់ក្រុមអ្នកប្រជាធិបតេយ្យចេញពីឆាកនយោបាយ។
លោក ម៉ម សូណង់ដូ រំលឹកថា លោកមានបទពិសោធន៍ជាប់ពន្ធនាការ ៣ដងហើយ ព្រោះតែដីកាកោះហៅធ្វើជាសាក្សីនេះ។ លោកថា លោកមិនខ្លាចការកោះហៅ ឬពន្ធនាគារទេ ប្រសិនបើរដ្ឋាភិបាលកោះហៅលោកឲ្យច្បាំងជាមួយវៀតណាម ការពារពលរដ្ឋរងគ្រោះដីធ្លី ការពារធនធានធម្មជាតិ លោកនឹងចូលខ្លួនទៅការពារ។ ប៉ុន្តែករណីបទល្មើសដែលតុលាការចោទលោក កឹម សុខា លោក ម៉ម សូណង់ដូ យល់ថា ភាគរយនៃការចាប់ខ្លួនលោកខ្ពស់ដល់ ៩៩ភាគរយ។
ប្រធានសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា បើតុលាការឯករាជ្យពីឥទ្ធិពលនយោបាយ គេមិនបារម្ភពីការចាប់ខ្លួនអ្នកចូលបំភ្លឺក្នុងនាមសាក្សីនោះទេ តែពេលវេលានេះ អ្នកនយោបាយហាក់មានការបារម្ភច្រើនពីសុវត្ថិភាព និងសិទ្ធិសេរីភាពរបស់ខ្លួននៅពេលដែលតុលាការដំណើរការរឿងក្តីទាក់ទងនឹងអ្នកនយោបាយ ជាពិសេសសំណុំរឿងរបស់គណបក្សប្រឆាំង។
បើទោះលោកជាកំពុងប្រឈមនឹងដីការកោះហៅពីតុលាការយ៉ាងនេះក្ដី លោក ម៉ម សូណង់ដូ សន្យាថា លោកមិនឈប់ធ្វើនយោបាយនោះទេ។ លោកហៅអ្នកមិនធ្វើនយោបាយជាមនុស្សកំសាក៕
សូមស្ដាប់បទសម្ភាសន៍បន្ថែមរវាងលោក ជុន ច័ន្ទបុត្រ និងលោក ម៉ម សូណង់ដូ ជុំវិញរឿងនេះ៖