Clik here to view.
អតីតប្រធានគណបក្សសង្គ្រោះជាតិ លោក សម រង្ស៊ី បានសរសេរសារក្នុងគណនីហេ្វសប៊ុក (Facebook) របស់លោក ជូនពរដល់បងប្អូនជនរួមជាតិទាំងក្នុង និងក្រៅប្រទេស នៅក្នុងឱកាសឆ្នាំថ្មី ឆ្នាំសកល ២០១៨នេះ ឱ្យមានសុខភាពល្អ សុភមង្គលក្នុងគ្រួសារ ទទួលបានជោគជ័យក្នុងកិច្ចការ និងសូមឱ្យបានសម្រេចដូចសេចក្ដីប្រាថ្នា។
លោក សម រង្ស៊ី បានសរសេរសារជូនពរនេះតាមគណនីហេ្វសប៊ុករបស់លោក កាលពីថ្ងៃអាទិត្យ ទី៣១ ធ្នូ ឆ្នាំ២០១៧។ នៅក្នុងសារជូនពរដដែលនោះ លោកក៏បានសន្យា ជូនពលរដ្ឋកម្ពុជាគ្រប់រូបថា ខ្លួនលោកផ្ទាល់ និងសហការីក្នុងជួរគណបក្សសង្គ្រោះជាតិទាំងអស់ នឹងខិតខំធ្វើយ៉ាងណាឱ្យប្រជារាស្ត្រខ្មែរ ចាប់ផ្ដើមបានឃើញនូវពន្លឺប្រជាធិបតេយ្យ និងយុត្តិធម៌យ៉ាងពិតប្រាកដ ក្នុងឆ្នាំថ្មី២០១៨នេះ។ លោកបញ្ជាក់ទៀតថា ក្នុងកិច្ចការចំពោះមុខ លោកនឹងពង្រីក ហើយពង្រឹងការតស៊ូរបស់ទាំងនៅក្នុងស្រុក ទាំងនៅក្រៅប្រទេស ដើម្បីធ្វើឱ្យនយោបាយគាបសង្កត់ និងបង្ក្រាបរបស់រដ្ឋាភិបាលសព្វថ្ងៃទទួលបរាជ័យ ហើយត្រូវវិលបកថយក្រោយវិញ។ ក្នុងន័យនេះលោកចង់សង្កត់ធ្ងន់ថា គណបក្សសង្គ្រោះជាតិ នឹងដំណើរការឡើងវិញជាប្រក្រតីឡើងវិញ ហើយនឹងចូលរួមក្នុងការបោះឆ្នោតជាតិ នាឆ្នាំ ២០១៨នេះ។ បើមិនយ៉ាងដូច្នេះទេ ប្រទេសកម្ពុជានឹងឃើញព្រឹត្តិការណ៍ថ្មីកើតឡើង ដែលមិនធ្លាប់មានពីមុនមក។
តែទោះបីយ៉ាងណា លោក សម រង្ស៊ី មិនបញ្ជាក់ឲ្យច្បាស់ទេថា ព្រឹត្តិការណ៍ថ្មីនោះ ជាអ្វីពិតប្រាកដ ហើយវានឹងកើតឡើងរបៀបម៉េចនោះទេ ប៉ុន្តែលោកថា ព្រឹត្តិការណ៍ថ្មីទាំងនោះ នឹងនាំមកនូវស្ថានការណ៍ថ្មីមួយ ដែលអ្នកពាក់ព័ន្ធទាំងឡាយ នឹងប្រឈមមុខ ហើយដោះស្រាយ តាមការចាំបាច់ ដើម្បីឱ្យប្រជារាស្ត្រខ្មែរ រើបម្រះពីអំណាចផ្ដាច់ការប្រកបដោយជោគជ័យ ហើយឈានទៅរកភាពសម្បូរសប្បាយ និងរុងរឿងពិតប្រាកដ។
សារជូនពរក្នុងឱកាសឆ្នាំថ្មីរបស់ លោក សម រង្ស៊ី នេះធ្វើឡើង ក្រោយពេលដែលតុលាការក្រុងភ្នំពេញ កាលពីថ្ងៃទី២៩ ខែធ្នូ បានសម្រេចផ្ដន្ទាទោសលោកឱ្យបង់ប្រាក់ជូនលោក ហ៊ុន សែន រហូតដល់មួយលានដុល្លារអាមេរិក ពាក់ព័ន្ធនឹងរឿងក្តីបណ្ដឹងបរិហារកេរ្តិ៍ ដែលលោក ហ៊ុន សែន ប្ដឹងលោក សម រង្ស៊ី ពីបទបរិហារកេរ្តិ៍ ថា លោក ហ៊ុន សែន សូកប៉ាន់កញ្ញា ធី សុវណ្ណថា ចំនួនមួយលានដុល្លារអាមេរិក ជាថ្នូរនឹងការវាយប្រហារបក្សប្រឆាំង បន្ទាប់ពីនាងឈប់គាំទ្របក្សសង្គ្រោះជាតិ ហើយងាកមកស្និទ្ធជាមួយលោក ហ៊ុន សែន និងចាប់ផ្ដើមវាយប្រហារបក្សសង្គ្រោះជាតិ ឥតសំចៃមាត់។
រហូតមកទល់នឹងពេលនេះ លោក សម រង្ស៊ី កំពុងជាប់បណ្ដឹងនៅតុលាការជិត ១០បណ្ដឹង ដែលភាគច្រើន ជាបណ្ដឹងបរិហារកេរ្តិ៍ លើមន្ត្រីជាន់ខ្ពស់រដ្ឋាភិបាលកម្ពុជា។ អ្នកវិភាគនយោបាយចាត់ទុកបណ្ដឹងខាងលើថា ជាសម្ពាធសម្រាប់លោក សម រង្ស៊ី ក្នុងការបន្តជីវិតនយោបាយនៅកម្ពុជា។ ពួកគេមើលឃើញថា ចំណាត់ការរបស់តុលាការ គឺជាបំណងប្រាថ្នារបស់បក្សកាន់អំណាច ដើម្បីរារាំងកុំឲ្យលោក សម រង្ស៊ី វិលចូលស្រុក ប៉ុន្តែវិធានការទាំងនេះនឹងកាន់តែធ្វើឱ្យប្រជាប្រិយភាពបក្សកាន់អំណាចធ្លាក់ចុះខ្លាំង៕
