ក្រសួងទេសចរណ៍ ណែនាំដល់ប្រតិបត្តិករទេសចរណ៍ កុំឲ្យដំឡើងថ្លៃសេវាកម្ម និងផលិតផល ព្រមទាំងថែរក្សាបរិស្ថាន អនាម័យ ក្នុងឱកាសបុណ្យឆ្លងឆ្នាំសកល។ រីឯសង្គមស៊ីវិលយល់ថា ការ អំពាវនាវនេះ មិនសូវបានផលឡើយ ប្រសិនបើមិនមានវិធានការជាប្រព័ន្ធទេនោះ។
ដូចរាល់ឆ្នាំដែរ ក្រសួងទេសចរណ៍ តែងតែចេញសេចក្ដីណែនាំឲ្យប្រតិបត្តិករទេសចរណ៍ កុំឲ្យដំ ឡើងថ្លៃសេវាកម្ម និងផលិតផលជ្រុលហួសហេតុ ប៉ុន្តែសេចក្ដីណែនាំនោះ មិនត្រូវបានក្រុមអ្នករកស៊ី យកចិត្តទុកដាក់អនុវត្តបានប៉ុន្មានឡើយ ហើយតែងតែទទូលបាននូវការរិះគន់ពីសំណាក់ភ្ញៀវទេសចរណ៍ជាតិ និងអន្តរជាតិ។ ក្នុងឱកាសពិធីបុណ្យឆ្លងឆ្នាំសកលឆ្នាំនេះ ក្រសួងទេសចរណ៍ បានចេញនៅសេចក្ដីណែនាំមួយដល់មន្ទីរទេសចរណ៍រាជធានី-ខេត្ត អាជ្ញាធរពាក់ព័ន្ធ និងប្រតិបត្តិករទេសចរណ៍ ឲ្យពង្រឹងពង្រឹង គុណភាពផលិតផល និងសេវាកម្មទេសចរណ៍។
សេចក្ដីណែនាំនោះ ក៏ស្នើកុំឲ្យដំឡើងថ្លៃសេវាកម្ម និងផលិតផល ដោយរក្សាតម្លៃឲ្យបានសមរម្យ។ រាល់សេវាស្នាក់នៅ និងតម្លៃម្ហូបអាហារ ត្រូវកំណត់ឲ្យបានច្បាស់ក្នុងតារាងតម្លៃ ដើម្បីឲ្យភ្ញៀវបានជ្រាបជាមុន ចៀសវាងការកំណត់តម្លៃហួសហេតុ។ ចំពោះករណីម្ចាស់អាជីវកម្មមិនអនុវត្តតាមតារាងតម្លៃដែលបានកំណត់ និងបិទផ្សាយ ម្ចាស់មូលដ្ឋានអាជីវកម្ម ឬសេវាកម្ម ត្រូវទទួលខុសត្រូវចំពោះមុខច្បាប់។
ជាមួយគ្នានេះ ក្រសួងជំរុញឲ្យមន្ទីរទេសចរណ៍រាជធានី-ខេត្ត ត្រូវសហការជាមួយសាលារាជធានី-ខេត្ត និងសមត្ថកិច្ចគ្រប់លំដាប់ថ្នាក់ ដើម្បីធានាសន្តិសុខ សុវត្ថិភាព ថែរក្សាបរិស្ថាន អនាម័យ និង ផ្សព្វផ្សាយចលនាប្រឡងប្រណាំង«ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ឲ្យកាន់តែទូលំទូលាយ។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការអំពាវនាវនេះ មានប្រសិទ្ធិតិចតូចប៉ុណ្ណោះ។ លោកថា ការដំឡើងថ្លៃសេវាកម្ម និងផលិតផលក្នុងឱកាសបុណ្យទាននេះ គឺតែងកើតមានជាទម្លាប់ និងបានធ្វើឲ្យប៉ះពាល់ដល់អារម្មណ៍ភ្ញៀវទេសចរណ៍ ព្រមទាំងប៉ះពាល់ដល់មុខមាត់ប្រទេសជាតិទៀតផង។ លោកបន្តថា ក្រសួងទេសចរណ៍ មិនគួរធ្វើការអំពាវនាវតែក្នុងឱកាសបុណ្យទាននោះទេ គឺត្រូវតែមានវិធានការជាដរាប ហើយសហការគ្នាឲ្យ ហ្មត់ចត់ និងត្រូវទប់ស្កាត់ការទាមទារយកផលប្រយោជន៍ពីក្រុមអ្នករកស៊ី ដោយក្រុមអាជ្ញាធរ ឬ មន្ត្រីទេសចរណ៍ដែលនាំឲ្យមានការដំឡើងថ្លៃ។ «»
ក្នុងឱកាសពិធីឆ្លងឆ្នាំសកលឆ្នាំ២០១៧ ចូលឆ្នាំ២០១៨ នៅថ្ងៃទី៣១ ខែធ្នូ គឺភ្ញៀវទេសចរណ៍ជាតិ និងអន្តរជាតិ នឹងសម្រុកទៅលេងរាជធានីភ្នំពេញ ខេត្តសៀមរាប និងខេត្តកំពង់សោម ដែលសុទ្ធតែជាតំបន់មានទេសចរណ៍សំខាន់ជាងគេនៅក្នុងប្រទេសកម្ពុជា។ ទោះយ៉ាងណា ភ្ញៀវទេសចរភាគច្រើនតែងរអ៊ូរទាំថា ពួកគេមានការខ្លាចរអាចំពោះការដំឡើងតម្លៃសេវាស្នាក់នៅ ថ្លៃជួលទីកន្លែងអង្គុយ និងតម្លៃម្ហូបអាហារ ដែលក្រុមអាជីវករ កំណត់តម្លៃខ្ពស់ខុសពីថ្ងៃធម្មតាមួយជាពីរ ឬជាប្រាំ នៅពេលមានពិធីបុណ្យជាតិធំៗ ឬពិធីបុណ្យឆ្លងឆ្នាំសកលចូលមកដល់ម្ដងៗ៕