សហគមន៍បឹងកក់ នៅថ្ងៃសៅរ៍ ទី៣០ ខែធ្នូ បាននាំគ្នាទៅសួរសុខទុក្ខអ្នកស្រី ទេព វន្នី នៅឯពន្ធនាគារព្រៃស។ ក្រុមសហគមន៍បានអះអាងថា អ្នកស្រី ទេព វន្នី មានសុខភាពល្អប្រសើរ និងអារម្មណ៍ធូរស្រាលច្រើនដោយបានទទួលដំណឹងថា អ្នកបឹងកក់ ២២គ្រួសារបន្ថែមទៀតទើបបានទទួលប្លង់កម្មសិទ្ធិថ្មីៗ ហើយអ្នកស្រីសង្ឃឹមថា រដ្ឋាភិបាលនឹងបញ្ចប់ជម្លោះនៅតំបន់បឹងកក់ ឲ្យបានឆាប់។
សហគមន៍បឹងកក់ កញ្ញា សុង ស្រីលាភ ដែលបានទៅសួរសុខទុក្ខអ្នកស្រី ទេព វន្នី នៅឯពន្ធនាគារព្រៃស នៅថ្ងៃទី៣០ ធ្នូ ថ្លែងថា សហគមន៍បានទៅសួរសុខទុក្ខអ្នកស្រី ទេព វន្នី ក្នុងគោលបំណងលើកទឹកចិត្ត និងផ្ដល់កម្លាំងចិត្ត រួមទាំងយកអាហារឲ្យអ្នកស្រីទទួលទាន។ កញ្ញាថា អ្នកស្រី ទេព វន្នី បានផ្ដែផ្ដាំថា សុំឲ្យរដ្ឋាភិបាលបញ្ចប់ការប្ដឹងផ្ដល់ពលរដ្ឋក្នុងសហគមន៍តាមប្រព័ន្ធតុលាការ និងសុំឲ្យដោះលែងអ្នកស្រីឲ្យមានសេរីភាពវិញ។
កាលពីថ្ងៃទី២៣ ខែកុម្ភៈ សាលាដំបូងរាជធានីភ្នំពេញ បានសម្រេចផ្ដន្ទាទោស អ្នកស្រី ទេព វន្នី ឲ្យជាប់ពន្ធនាគារចំនួន ២ឆ្នាំកន្លះ ពីបទហិង្សាដោយចេតនាមានស្ថានទម្ងន់ទោស លើសន្តិសុខសណ្ដាប់ធ្នាប់សាលាខណ្ឌដូនពេញ កាលពីថ្ងៃទី១៣ ខែមីនា ឆ្នាំ២០១៣។ ប៉ុន្តែអ្នកស្រីបានបដិសេធនៅមុខតុលាការថា អ្នកស្រីមិនបានដឹកនាំសហគមន៍ប្រើអំពើហិង្សានោះទេ។
កញ្ញា សុង ស្រីលាភ បន្តថា អ្នកស្រីមានសុខភាពល្អជាធម្មតា។ ប៉ុន្តែអ្នកស្រី ទេព វន្នី បានស្នើឲ្យរដ្ឋាភិបាលមេត្តាដោះលែងអ្នកស្រីឲ្យមានសេរីភាពវិញ។ អ្នកស្រីសង្ឃឹមថា រដ្ឋាភិបាលនឹងឈរលើគោលការណ៍ដោះស្រាយបញ្ចប់ជម្លោះតំបន់បឹងកក់ ហើយសហគមន៍នឹងមិនភ្លេចអ្នកស្រីដែលកំពុងជាប់ពន្ធនាគារដែរ៖ «ជាពិសេសដើម្បីឲ្យចប់សព្វគ្រប់នោះគឺការបញ្ចប់ប្រព័ន្ធតុលាការជាមួយប្រជាពលរដ្ឋដែលមានបញ្ហាជាមួយប្រព័ន្ធតុលាការរហូតដល់រាល់ថ្ងៃ ជាពិសេសដោះលែងគាត់ឲ្យមានសេរីភាព ការជាប់ទោសអត់មានយុត្តិធម៌ ហើយការដែលយកសំណុំរឿងដែលដាក់បន្ទុកគាត់នោះគឺជាសំណុំរឿងដែលផ្ទុយស្រលះនៃរឿងដែលកើតឡើងកាលពីថ្ងៃនោះខ្លាំងមែនទែន ជាក់ស្ដែងថ្ងៃនោះពលរដ្ឋទេជាអ្នករងគ្រោះ។ គាត់សង្ឃឹមថា រាជរដ្ឋាភិបាលឈរក្នុងការដោះស្រាយ និងដោះលែងគាត់ឲ្យមានសេរីភាពជួបជុំកូនគាត់វិញ»។
មេធាវីការពារក្ដីនៃអង្គការសិទ្ធិមនុស្សលីកាដូ បានដាក់ពាក្យបណ្ដឹងប្ដឹងទាស់ទៅនឹងសាលក្រមសាលាដំបូងរាជធានីភ្នំពេញ ទៅតុលាការកំពូល ជាច្រើនខែមកហើយ ប៉ុន្តែតុលាការកំពូល មិនទាន់កំណត់ថ្ងៃបើកសវនាការនៅឡើយទេ។
សហគមន៍បឹងកក់ម្នាក់ទៀត គឺលោក ចាន់ ពុទ្ធិស័ក្ដិ ដែលបានទៅសួរសុខទុក្ខអ្នកស្រី ទេព វន្នី មានប្រសាសន៍ថា លោកបានពាំនាំនូវដំណឹងល្អប្រាប់អ្នកស្រីឲ្យសប្បាយចិត្ត ព្រោះសាលារាជធានីបានផ្ដល់ប្លង់កម្មសិទ្ធិដល់ពួកគាត់បន្ថែមទៀត ហើយនេះក៏ជាការខិតខំប្រឹងប្រែង និងការលះបង់របស់អ្នកស្រី ទេព វន្នី មកដល់ថ្ងៃនេះ៖ «អ្នកស្រី ទេព វន្នី ជាក្រុមការងារដែលយើងធ្វើការជាមួយគ្នាកន្លងមក គឺដើម្បីបុព្វហេតុសិទ្ធិដីធ្លីជូនប្រជាសហគមន៍។ អ្វីដែលយើងតវ៉ាកន្លងមកគឺយើងចង់បានប្លង់កម្មសិទ្ធិជូនប្រជាពលរដ្ឋ។ គាត់ថា គាត់អរ គាត់សប្បាយចិត្ត យើងអត់មានអីទេ មានតែអ្នកស្រី ផាន់ ឈុនរ៉េត និងប្រជាសហគមន៍ប៉ុន្មានគ្រួសារទៀតហ្នឹងចប់ហើយ និងសេរីភាពសម្រាប់អ្នកស្រី ដូច្នេះសហគមន៍បឹងកក់ មិនមានអ្វីតវ៉ាទៀតទេបើមានប្លង់កម្មសិទ្ធិជូនពលរដ្ឋគ្រប់គ្នាអស់ហើយ រួមនឹងសេរីភាពសម្រាប់អ្នកស្រីទៀត ហើយពួកយើងក៏មានគំនិតដូចគ្នាអ៊ីចឹងដែរ»។
កាលពីថ្ងៃទី២៧ ធ្នូ អាជ្ញាធររាជធានីភ្នំពេញផ្ដល់ប័ណ្ណកម្មសិទ្ធិឲ្យពលរដ្ឋដែលមានជម្លោះដីធ្លីរ៉ាំរ៉ៃរាប់ឆ្នាំនៅតំបន់បឹងកក់ ចំនួន ២២គ្រួសារ ក្រោយពួកគេចេញតវ៉ាជាច្រើនឆ្នាំ។ ប៉ុន្តែសហគមន៍បញ្ជាក់ថា នៅសល់ពលរដ្ឋជិត ២០គ្រួសារទៀតដែលមិនទាន់ទទួលបានការដោះស្រាយ និងទទួលប្លង់ ប៉ុន្តែតួលេខពីសាលារាជធានីប្រាប់ពលរដ្ឋថា នៅសល់តែ ៧គ្រួសារទៀតប៉ុណ្ណោះ។ ពលរដ្ឋមានជម្លោះដីធ្លីនៅតំបន់បឹងកក់ ដែលទើបទទួលបានប័ណ្ណកម្មសិទ្ធិ ហៅលទ្ធផលនេះថា ជាការប្រឹងប្រែង តស៊ូ ទាមទារដីរបស់ពួកគេមកវិញ។ អ្នកបឹងកក់អះអាងថា ដីនោះមិនមែនសាលាក្រុងផ្ដល់ឲ្យនោះទេ តាមពិតដីមានជម្លោះជាដីរបស់ពួកគេតាំងពីដើមមក ប៉ុន្តែក្រុមហ៊ុនបានទៅរំលោភបំពានដីរបស់ពួកគាត់ក្រោមលេសថា អភិវឌ្ឍន៍។
សហគមន៍អះអាងថា អាជ្ញាធររាជធានីភ្នំពេញ បានអំពាវនាវឲ្យអ្នកបឹងកក់ ទាំង ២២គ្រួសារ ដែលទទួលបានប័ណ្ណកម្មសិទ្ធិដីធ្លីរួចហើយ ឈប់ដើរតវ៉ាតទៅទៀត។ ប៉ុន្តែពលរដ្ឋបឹងកក់ ប្ដេជ្ញាថា ពួកគាត់នៅបន្តគាំទ្រអ្នកតវ៉ាដែលមិនទាន់បានប្លង់ដទៃទៀត និងទាមទារឲ្យដោះលែងតំណាងសហគមន៍បឹងកក់ អ្នកស្រី ទេព វន្នី រហូតទទួលបានសេរីភាព និងបញ្ចប់ជម្លោះតំបន់បឹងកក់។
បណ្ដាញភាពជាមេដឹកនាំស្ត្រីសាកលនៃអង្គការវ៉ាយថល វ៉យស៊ីស (Vital Voices) ដែលមានមូលដ្ឋាននៅរដ្ឋធានីវ៉ាស៊ីនតុន កាលពីខែសីហា សន្យាថា នឹងបន្តឃ្លាំមើលករណីអ្នកស្រី ទេព វន្នី និងសហគមន៍បឹងកក់ យ៉ាងយកចិត្តទុកដាក់ជាទីបំផុត។ អង្គការVital Voices ប្ដេជ្ញាថា ពួកគេនឹងនៅតែបន្តពាំនាំរឿងរ៉ាវរបស់អ្នកស្រី ហើយនិងរឿងរ៉ាវនៃពលរដ្ឋក្នុងសហគមន៍អ្នកស្រី ទៅប្រាប់ពិភពលោក និងមនុស្សគ្រប់គ្នាឲ្យបានដឹងឮពីសេចក្ដីក្លាហានរបស់អ្នកស្រី ទេព វន្នី។ អ្នកស្រី ទេព វន្នី ត្រូវបានអង្គការ Vital Voices ប្រគល់ពានរង្វាន់ភាពជាអ្នកដឹកនាំសាកលឆ្នាំ២០១៣ និងផ្ដល់កិត្តិយសឲ្យធ្វើជាសមាជិកបណ្ដាញភាពជាអ្នកដឹកនាំសាកលរបស់អង្គការនេះផងដែរ៕