លោក សម រង្ស៊ី ស្វាគមន៍សាលក្រមផ្តន្ទាទោសលោក រឿងបរិហារកេរ្តិ៍ ដែលលោក ហ៊ុន សែន ប្តឹងលោក ព្រោះជាឱកាស ឲ្យលោកបានលាតត្រដាង ការពិតកាន់តែច្រើន អំពីអំពើអាក្រក់របស់លោក ហ៊ុន សែន និង រដ្ឋាភិបាលកម្ពុជា។ អ្នកវិភាគនយោបាយ ចាត់ទុកចំណាត់ការរបស់តុលាការ គឺជាបំណងប្រាថ្នា របស់បក្សកាន់អំណាច ដើម្បីរារាំងកុំឲ្យលោក សម រង្ស៊ី វិលចូលស្រុកវិញ តែប៉ុណ្ណោះ។
អតីតប្រធានគណបក្សសង្គ្រោះជាតិ លោក សម រង្ស៊ី មិនខ្វល់នឹងសាលក្រមតុលាការ ដែលផ្តន្ទាទោសលោក ឲ្យបង់ប្រាក់ជូនលោកនាយករដ្ឋមន្រ្តី ហ៊ុន សែន រហូតដល់លានដុល្លារ ក្នុងបណ្តឹងបរិហារកេរ្តិ៍ ដែលលោក ហ៊ុន សែន ប្តឹងលោកនោះទេ ព្រោះលោកចាត់ទុកថា មន្រ្តីតុលាការកម្ពុជា គ្មានឯករាជ្យ និង មិនសូវដឹងអ្វីនោះទេ ដោយធ្វើអ្វីៗ តាមតែបញ្ជាថ្នាក់លើ <<ហើយថ្នាក់លើហ្នឹង ធ្វើអ្វីតាមតែអំពើចិត្ត ហើយខ្លួនស្មានថាអាចបិទការពិតបាន។ អ៊ីចឹងខ្ញុំសប្បាយចិត្តទៅវិញទេ។ ជាឱកាសមួយ ដើម្បីយើងលាតត្រដាង ឲ្យបានកាន់តែច្បាស់លាស់ថែមទៀត អ្វីដែលថ្នាក់ដឹកនាំប្រទេស និង គូកនរបស់គេធ្វើប៉ះពាល់ដល់ថវិកាជាតិ កិត្តិយសរបស់ប្រទេសជាតិ គេនឹកស្មានថាធ្វើអ្វីបានតាមចិត្ត ប៉ុន្តែ បន្តិចទៀតនេះ នឹងកាន់តែខ្មាស់គេទៅៗ>>។
បណ្តឹងបរិហារកេរ្តិ៍នេះ ត្រូវមេធាវីតំណាងដោយអាណត្តិរបស់លោក ហ៊ុន សែន គឺលោក គី តិច ប្ដឹងលោក សម រង្ស៊ី ទៅតុលាការក្រុងភ្នំពេញ កាលពីថ្ងៃទី១៨ ខែមករា ឆ្នាំ២០១៧ ក្រោយពីលោក សម រង្ស៊ី បានថ្លែងថា លោក ហ៊ុន សែន សូកប៉ាន់កញ្ញា ធី សុវណ្ណថា ចំនួន ១លានដុល្លារ ជាថ្នូរនឹងការវាយប្រហារបក្សប្រឆាំង បន្ទាប់ពីនាងឈប់គាំទ្របក្សសង្គ្រោះជាតិ ហើយងាកមកស្និទ្ធជាមួយលោក ហ៊ុន សែន និងចាប់ផ្ដើមវាយប្រហារបក្សសង្គ្រោះជាតិ ឥតសំចៃមាត់។ កញ្ញា ធី សុវណ្ណថា ក៏បានប្ដឹងប្រធានគណបក្សសង្គ្រោះជាតិ លោក កឹម សុខា ពីបទបរិហារកេរ្តិ៍មួយទៀតផងដែរ។ ក្រោយគណបក្សសង្គ្រោះជាតិ ត្រូវបានរម្លាយបានសម្រេចដោយលោក ហ៊ុន សែន កញ្ញា ធី សុវណ្ណថា បានគ្រោងដាក់ពាក្យប្ដឹង សមាជិកក្រុមប្រឹក្សាឃុំ-សង្កាត់គណបក្សសង្គ្រោះជាតិ ទាំងជាង ៥,០០០នាក់ ក្រោយអ្នកទាំងនោះក្រាញននៀល មិនព្រមចុះចូលគណបក្សប្រជាជនកម្ពុជា។
ការសម្រេចរបស់សាលាដំបូងរាជធានីភ្នំពេញ លើសំណុំរឿង អតីតប្រធានគណបក្សសង្គ្រោះជាតិលើកនេះ គឺនរណាក៏ដឹងដែរថា មិនមានលទ្ធផលប្លែកខុសគ្នា ពីសំណុំរឿងជាច្រើនផ្សេងទៀតនោះទេ ដ្បិតអីឲ្យតែលោក ហ៊ុន សែន និងមន្ត្រីរបស់គណបក្សប្រជាជនកម្ពុជា ប្ដឹងទៅតុលាការហើយ ជាទូទៅគឺសេចក្ដីសម្រេចរបស់តុលាការ មិនដែលឃើញធ្វើឲ្យដើមបណ្ដឹង ខកចិត្តម្ដងណាឡើយ ព្រោះតុលាការ តែងតែមានចំណាត់ការយ៉ាងលឿន និងផ្ដន្ទាទោសលើថ្នាក់ដឹកនាំបក្សប្រឆាំង យ៉ាងធ្ងន់ធ្ងរតាមការចង់បានរបស់ភាគីអ្នកប្ដឹង។
មេធាវីការពារក្តីឱ្យលោក សម រង្ស៊ី គឺលោក សំ សុគង់ ថ្លែងថា លោកមិនអាចទទួលយកសាលក្រមនេះបានទេ ព្រោះពុំបានផ្ដល់យុត្តិធម៌ ជូនកូនក្ដីរបស់លោក។ មេធាវីរូបនេះបន្តថា ការចោទប្រកាន់ពីបទបរិហារកេរ្តិ៍នេះ គឺគ្មានភស្តុតាងគ្រប់គ្រាន់ឡើយ ហើយការទាមទារសំណង គឺមានលក្ខណៈធ្ងន់ធ្ងរបំផុត។ លោក សំ សុគង់ បញ្ជាក់ថា លោកនឹងពិចារណាជាមួយកូនក្ដី អំពីការប្ដឹងឧទ្ធរណ៍ប្រឆាំងនឹងការសម្រេចនេះ៖ «ចំពោះមេធាវីការពារឯកឧត្តម សម រង្ស៊ី យើងមិនអាចទទួលយកបានទេ ដោយសារសាលក្រមមិនបានផ្តល់ភាពយុត្តិធម៌ដល់លោក សម រង្ស៊ី។ ជំហានបន្ទាប់ទៀត មេធាវីការពារនឹងពិភាក្សា ឬ ពីបញ្ហាផ្លូវច្បាប់ ជាពិសេសសិទ្ធិក្នុងធ្វើបណ្តឹងឧទ្ធរណ៍ ដើម្បីសាលាឧទ្ធរណ៍ពិនិត្យអំពីសេចក្តីនេះឡើងវិញ ទាំងអង្គហេតុ និង អង្គច្បាប់»។
កាលពីចុងឆ្នាំ ២០១៦ សារឆ្លើយឆ្លងគ្នាជាច្រើន ត្រូវបានផ្សព្វផ្សាយតាមបណ្តាញសង្គម ដែលជាការសន្ទនាគ្នារវាង “តានិងចៅ” អំពីយុទ្ធសាស្រ្តបំបែកបំបាក់គណបក្សសង្គ្រោះជាតិ។ តា នៅក្នុងសារនេះ គឺសំដៅលើលោក ហ៊ុន សែន ចំណែកឯចៅ គឺកញ្ញា ធី សុវណ្ណថា ដែលតាបានផ្តល់លុយជិត ១ លាន ដុល្លារ ឲ្យកញ្ញា ធី សុវណ្ណថា ដើម្បីធ្វើឲ្យមេដឹកនាំទាំងពីររបស់គណបក្សសង្គ្រោះជាតិ បែកបាក់គ្នា។
លោក សម រង្ស៊ី បញ្ជាក់កាលពីថ្ងៃម្សិលមិញនេះ ថាលោកនឹងលាតត្រដាងសារឆ្លើយឆ្លងគ្នារវាង តា និង ចៅនេះ នៅលើទំព័រហ្វេសប៊ុករបស់លោក << ដូច្នេះរឿងនេះ ជារឿងពិតទាំងអស់។ យើងក៏មានមធ្យោបាយ និង បច្ចេកទេស ឲ្យក្រុមហ៊ុន ឲ្យអ្នកជំនាញខាងហ្វេសប៊ុក ខាងសារឆ្លើយឆ្លងគ្នា ដើម្បីគេអាចស្រាវជ្រាវ និង បញ្ជាក់អំពីភាពពិតរបស់សារនេះ។ អ្នកដែលចង់ប្តឹងខ្ញុំ ប្រហែលមិនសូវយល់ ឬ ស្មានថាអ្នកដទៃទៀតល្ងង់។ សម័យនេះ អ្នកបច្ចេកទេស អ្នកវិទ្យាសាស្រ្ត អាចបញ្ជាក់ការពិត រឿងលោក ហ៊ុន សែន ឧបត្ថម្ភ ១ លានដុល្លារ ឲ្យនាង ធី សុវណ្ណថា ធ្វើសកម្មភាពប្រឆាំងគណបក្សសង្គ្រោះជាតិ >>។
រហូតមកទល់នឹងពេលនេះ លោក សម រង្ស៊ី កំពុងជាប់បណ្ដឹងនៅតុលាការជិត ១០បណ្ដឹង ដែលភាគច្រើន ជាបណ្ដឹងបរិហារកេរ្តិ៍ លើមន្ត្រីជាន់ខ្ពស់រដ្ឋាភិបាលកម្ពុជា។ អ្នកវិភាគនយោបាយចាត់ទុកបណ្ដឹងខាងលើថា ជាសម្ពាធសម្រាប់លោក សម រង្ស៊ី ក្នុងការរឹតត្បិតជីវិតនយោបាយនៅកម្ពុជា។ ពួកគេមើលឃើញថា ចំណាត់ការរបស់តុលាការ គឺជាបំណងប្រាថ្នារបស់បក្សកាន់អំណាច ដើម្បីរារាំងកុំឲ្យលោក សម រង្ស៊ី វិលចូលស្រុកវិញតែប៉ុណ្ណោះ។ ប៉ុន្តែវិធានការទាំងនេះនឹងកាន់តែធ្វើឲ្យប្រជាប្រិយភាពបក្សកាន់អំណាចធ្លាក់ចុះខ្លាំង៕