Clik here to view.
ប្រជាសហគមន៍ការពារព្រៃឡង់ ស្រុកសណ្ដាន់ ខេត្តកំពង់ធំ ត្អូញត្អែរពីបញ្ហាប្រឈមមួយចំនួនក្នុងការបំពេញភារកិច្ចរបស់ខ្លួនក្នុងមួយរយៈពេលចុងក្រោយនេះ។ បញ្ហាប្រឈមទាំងនោះ មានដូចជាអាជ្ញាធរតម្រូវឱ្យពួកគាត់សុំច្បាប់ មុនពេលចុះល្បាតព្រៃជាដើម។ បន្ថែមលើសពីនេះទៀត អាជ្ញាធរតាមបានដានសកម្មភាពប្រជាសហគមន៍ និងចោទប្រកាន់ពួកគាត់ថា ជាក្រុមបដិវត្តពណ៌ ឬមានបំណងចង់បង្កើតតំបន់អបគមន៍ជាដើម។
ប្រជាសហគមន៍ការពារព្រៃឡង់នៅខេត្តកំពង់ធំ មានបំណងចង់ជួបពិភាក្សាគ្នាជាមួយអាជ្ញាធរដែនដី មន្ត្រីជំនាញ និងអង្គការក្រៅរដ្ឋាភិបាល ដើម្បីបញ្ជាក់ឱ្យច្បាស់ពីការងាររបស់ខ្លួន។ មិនតែប៉ុណ្ណោះពួកគាត់ចង់ឱ្យមានកិច្ចសហការល្អរវាងសហគមន៍ ជាមួយអាជ្ញាធរដែនដី និងមន្ត្រីជំនាញ។ ជាមួយគ្នានេះដែរ សហគមន៍ស្នើឱ្យអាជ្ញាធរទាំងអស់ បញ្ឈប់ការលាបពណ៌មកលើពួកគាត់តាមរូបភាពផ្សេងៗ ហើយនាំគ្នាចូលរួមថែរក្សាធនធានធម្មជាតិនៅតំបន់ព្រៃអភិរក្សមួយនេះប្រសើរជាង។
បណ្ដាញស្នូលការពារព្រៃឡង់ ស្រុកសណ្ដាន់ ខេត្តកំពង់ធំ លោក មិញ នី លើកឡើងថា មួយរយៈពេលចុងក្រោយនេះ ពួកគាត់តែងរងការគំរាមកំហែងដោយប្រយោល និងរងការចោទប្រកាន់ថា ជាក្រុមគណបក្សប្រឆាំង ឬជាក្រុមបដិវត្តន៍ពណ៌។ លោកបារម្ភចំពោះការចោទប្រកាន់មកលើពួកគាត់បែបនេះ និងនាំឲ្យធ្វើឱ្យប្រជាសហគមន៍មួយចំនួនញញើត មិនមានសេរីភាពក្នុងការបំពេញភារកិច្ចរបស់ខ្លួន៖ «បើនិយាយពីសហគមន៍ខ្ញុំចង់ឱ្យរដ្ឋាភិបាល និងបណ្ដាញសហគមន៍ព្រៃឡង់ទាំងបួនខេត្ត ឬទូទាំងប្រទេស ដើម្បីឱ្យក្រសួងបរិស្ថាននិយាយគ្នាថា ពួកយើងធ្វើដើម្បីគណបក្សណាឬក្រោមបញ្ជានយោបាយរបស់នរណាទេ»។
កាលពីថ្ងៃទី៩ ខែឧសភា ឆ្នាំ២០១៦ រាជរដ្ឋាភិបាលបានប្រកាសបង្កើតតំបន់ព្រៃឡង់ជាតំបន់ដែនជម្រកសត្វព្រៃមានផ្ទៃដីជាង ៤៣ម៉ឺនហិកតារ (៤៣១.៦៨៣ហិកតារ) គ្របដណ្ដប់លើខេត្តចំនួន៤ រួមមានខេត្តព្រះវិហារ ខេត្តកំពង់ធំ ក្រចេះ និងខេត្តស្ទឹងត្រែង ដែលក្រោមការគ្រប់គ្រងរបស់ក្រសួងបរិស្ថាន។
អភិបាលខេត្តកំពង់ធំ លោក សុខ លូ មានប្រសាសន៍កាលពីកន្លងទៅថា ចាប់តាំងពីលោកទទួលតំណែងជាអភិបាលខេត្តមក លោកមានទិសដៅសំខាន់មួយ គឺការពារព្រៃឈើ ហើយតែងតែសហការជាមួយប្រជាសហគមន៍ជានិច្ច។
លោកថា រយៈពេលចុងក្រោយនេះ រាជរដ្ឋាភិបាលយកចិត្តទុកដាក់ចំពោះការងាររបស់ពួកគាត់ ហើយកន្លងមកអាជ្ញាធរខេត្តតែងតែចូលរួម និងសហការជាមួយសហគមន៍ទាំងនេះ ព្រោះទាំងអាជ្ញាធរខេត្ត និងប្រជាពលរដ្ឋ គឺមានទិសដៅការពារព្រៃឈើដូចគ្នា។ លោកចាត់ទុកការចូលរួមរបស់បងប្អូនប្រជាសហគមន៍ ថាជាកត្តាល្អណាស់។ ចំណែកការគំរាមកំហែងណាមួយទៅលើសហគមន៍ លោកបដិសេធថា មិនដឹងកើតឡើងពីពេលណានោះទេ។
លេខាធិការដ្ឋានបណ្ដាញការពារព្រៃឡង់ លោក សេង សុខហេង អះអាងថា ប្រជាសហគមន៍ពិតជាលំបាកបំពេញការងាររបស់ខ្លួនក្នុងមួយរយៈពេលចុងក្រោយនេះមែន ដូចជាការតម្រូវឱ្យពួកគាត់សុំច្បាប់ទៅមន្ត្រីជំនាញមុនពេលចុះល្បាតព្រៃ។ មិនតែប៉ុណ្ណោះ អាជ្ញាធរដែនដីតែងតាមដានសកម្មភាពប្រជុំ ឬជួបជុំរបស់សហគមន៍ និងលាបពណ៌ផ្សេងៗ ជាដើម។ រូបភាពចោទប្រកាន់ និងលាបពណ៌ គឺកើតឡើងទៅលើប្រជាសហគមន៍ទាំងបួនខេត្ត ដែលនៅជុំវិញតំបន់ព្រៃឡង់តែម្ដង៖ «តួនាទីសហគមន៍ សង្គមស៊ីវិល គឺយើងធ្វើការដោយឯករាជ្យ ហើយអង្គការទាំងអស់នោះ សង្គមស៊ីវិលទាំងអស់នោះ គឺគាត់បានចុះឈ្មោះក្នុងបញ្ជីនៅក្រសួងត្រឹមត្រូវយើងមានបេសកកម្ម យើងមានផែនការច្បាស់លាស់។ អីចឹងហេតុផលការពារព្រៃឈើគឺមិនមែនជាហេតុផលណាមួយដែលទាក់ទងបដិវត្តន៍ពណ៌ទេ»។
លោក សេង សុខហេង បញ្ជាក់ថា ការចោទប្រកាន់ ឬលាបពណ៌ និងការរឹតត្បិតសកម្មភាពរបស់ប្រជាសហគមន៍ គឺមិនអាចទប់ស្កាត់បទល្មើសព្រៃឈើបានទេ ប៉ុន្តែផ្ដល់ភាពងាយស្រួលដល់ក្រុមជនល្មើសក្នុងការបំផ្លិចបំផ្លាញព្រៃឈើតែប៉ុណ្ណោះ។
មន្ត្រីកម្មវិធីសិទ្ធិអំណាចសហគមន៍ នៃសមាគមការពារសិទ្ធិមនុស្សអាដហុក (Adhoc) លោក ប៉ែន ប៊ុណ្ណារ៍ មានប្រសាសន៍ថា បញ្ហាប្រឈម ឬការចោទប្រកាន់ផ្សេងៗ ទៅលើសហគមន៍ មិនមែនទើបតែកើតមានពេលនេះទេ គឺកើតមានជាយូរមកហើយ។ ពិសេសបញ្ហាប្រឈមជាមួយក្រុមជនល្មើស អាជ្ញាធរដែនដី មន្ត្រីជំនាញ សមត្ថកិច្ច ដែលពាក់ព័ន្ធនឹងអំពើពុករលួយ ឬឃុបឃិតជាមួយឧក្រិដ្ឋជន។ ជាក់ស្ដែងពេលថ្មីៗ នេះ ដោយសារប្រទេសកម្ពុជាមានវិបត្តិនយោបាយ ធ្វើឱ្យមន្ត្រីខិលខូចមួយចំនួន ភ្ជាប់ចលនាផ្សេងៗ ឬយករឿងនយោបាយទៅដាក់សម្ពាធលើប្រជាសហគមន៍តែម្ដង៖ «យើងគិតថា ប្រជាសហគមន៍យើង គាត់ធ្វើការត្រឹមត្រូវ ហើយគាត់គ្មានបំណងបង្កើតតំបន់អបគមន៍អ្វីទេបាទ ព្រោះពាក្យអបគមន៍មួយជាពាក្យធ្ងន់ធ្ងរណាស់»។
លោក ប៉ែន ប៊ុណ្ណារ៍ បន្ថែមថា ប្រជាសហគមន៍ អាចប្រើយុទ្ធសាស្ត្រមួយទៀត គឺរួមគ្នាដាក់បណ្ដឹងបរិហារ ដោយប្ដឹងអាជ្ញាធរដែនដី មន្ត្រីជំនាញ សមត្ថកិច្ច ដែលបណ្ដែតបណ្ដោយឱ្យមានបទល្មើស ឬវិនាសកម្មព្រៃឈើកើតឡើងនៅក្នុងដែនគ្រប់គ្រងរបស់ខ្លួន៕