រដ្ឋមន្ត្រីក្រសួងមហាផ្ទៃ លោក ស ខេង សម្រេចដាក់លិខិតស្នើសុំទៅប្រមុខរដ្ឋាភិបាល ដើម្បីបង្កើតមាត្រាថ្មីមួយទៀតដាក់បញ្ចូលទៅក្នុងក្រមព្រហ្មទណ្ឌដើម្បីដាក់ទោសទណ្ឌអ្នកទាំងឡាយណាដែលប្រមាថព្រះមហាក្សត្រ។ អ្នកនាំពាក្យក្រសួងមហាផ្ទៃ ឲ្យអាស៊ីសេរី ដឹងថ្ងៃទី២១ ខែធ្នូ ថា កន្លងមកមានអ្នកប្រមាថព្រះមហាក្សត្រ ប៉ុន្តែគ្មានច្បាប់ចែងដាក់ទោសទណ្ឌ ទើបធ្វើឲ្យជនប្រព្រឹត្តអាចនៅក្រៅសំណាញ់ច្បាប់បាន។
អ្នកនាំពាក្យក្រសួងមហាផ្ទៃ លោក ខៀវ សុភ័គ អះអាងថា កម្ពុជា មានច្បាប់ដាក់ទោសទណ្ឌចំពោះជនណាដែលប្រមាថព្រះមហាក្សត្រ ដូច្នេះអាជ្ញាធរត្រូវតែអនុវត្ដច្បាប់៖ «»។
ចំណាត់ការរបស់ក្រសួងមហាផ្ទៃ ខណៈដែលមានជនអនាមិកមួយចំនួនប្រើប្រាស់បណ្តាញទំនាក់ទំនងសង្គមហ្វេសប៊ុក (Facebook) ប្រមាថអង្គព្រះមហាក្សត្រ។
ការសម្រេចបែបនេះ កើតមានបន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង បើកកិច្ចប្រជុំមួយកាលពីថ្ងៃទី២០ ខែធ្នូ ដោយពិភាក្សាអំពីបញ្ហាពាក់ព័ន្ធនឹងសកម្មភាពទាំងឡាយដែលធ្វើឱ្យប៉ះពាល់ដល់អង្គព្រះមហាក្សត្រ។ ក្នុងពេលនោះដែរ ក្រសួងមហាផ្ទៃ សម្រេចបិទហ្វេសប៊ុកមួយឈ្មោះ "សមាគមវៀតណាមនៅកម្ពុជា" ដែលបានប្រមាថដល់ព្រះមហាក្សត្រ។
ចំពោះបញ្ហានេះ មន្ត្រីសង្គមស៊ីវិល លោក សន ជ័យ យល់ថា ចំណាត់ការរបស់ក្រសួងត្រឹមបិទហ្វេសប៊ុកមួយឈ្មោះ "សមាគមវៀតណាមនៅកម្ពុជា" ដែលប្រមាថព្រះមហាក្សត្រមិនទាន់គ្រប់គ្រាន់ទេ ក្រសួងត្រូវរកឲ្យឃើញថា អ្នកណានៅពីក្រោយហ្វេសប៊ុក នោះ។
ទាក់ទងនឹងសំណើរសុំរបស់ក្រសួងមហាផ្ទៃ ស្នើសុំបន្ថែមមាត្រានៃក្រមព្រហ្មទណ្ឌដើម្បីដាក់ទោសអ្នកប្រមាថព្រះមហាក្សត្រនេះដែរ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ គាំទ្រការបង្កើតមាត្រានេះ។ ប៉ុន្តែ មន្ត្រីអង្គការសង្គមស៊ីវិលរូបនេះស្នើសុំឲ្យការអនុវត្តច្បាប់ត្រូវអនុវត្តឲ្យបានទូលំទូលាយ មិនមែនអនុវត្តចំពោះបុគ្គលមួយក្រុមនោះឡើយ៖ «»។
ប៉ុន្តែ លោក ជូង ជូងី មេធាវី មេធាវីការពារក្តីគណបក្សប្រឆាំង ផ្តល់ការអត្ថាធិប្បាយយ៉ាងខ្លីថា ក្រមព្រហ្មទណ្ឌបានចែងរួចហើយពីការដាក់ទោសអ្នកប្រមាថព្រះមហាក្សត្រ ដូច្នេះលោកយល់ថា មិនចាំបាច់បន្ថែមមាត្រាថ្មីនោះទេ៖ «»។
ដោយឡែកអ្នកនាំពាក្យក្រសួងមហាផ្ទៃ លោក ខៀវ សុភ័គ និយាយថា ច្បាប់រដ្ឋធម្មនុញ្ញបានចែងថា ព្រះមហាក្សត្រមិនអាចនរណារំលោភបំពានបានឡើយ ប៉ុន្តែគ្មានមាត្រាណាចែងដាក់ទោសលើអ្នកប្រមាថព្រះមហាក្សត្រទេ។ ដំណើរការនៃការស្នើសុំនេះ នឹងត្រូវជជែកជាមួយស្ថាប័នពាក់ព័ន្ធផ្សេងទៀតនៅពេលណាប្រមុខរដ្ឋាភិបាលយល់ស្របនឹងសំណើសុំរបស់រដ្ឋមន្ត្រីក្រសួងមហាផ្ទៃ៕