លោកនាយករដ្ឋមន្ត្រី ហ៊ុន សែន ប្រកាសថា តម្លៃផ្ទះជួលសម្រាប់កម្មកររោងចក្រនៅឆ្នាំ២០១៨ គឺមិនមានការដំឡើងឡើយ។ រីឯអង្គការសង្គមស៊ីវិល យល់ថា ការហាមមិនឲ្យដំឡើងថ្លៃផ្ទះជួលនេះ នឹងមិនបានផលដល់កម្មករឡើយ ប្រសិនបើរដ្ឋាភិបាល មិនដោះស្រាយរឿងអាមេរិក និងសហគមន៍អឺរ៉ុប បិទទីផ្សារមិនឲ្យនាំទំនិញពីកម្ពុជាទេនោះ។
លោកនាយករដ្ឋមន្ត្រី ហ៊ុន សែន អំពាវនាវជាថ្មីដល់ម្ចាស់ផ្ទះជួល កុំឲ្យដំឡើងថ្លៃឈ្នួលផ្ទះនៅពេល ដែលកម្មករនឹងត្រូវដំឡើងប្រាក់ខែគោលដល់ ១៧០ដុល្លារ នៅឆ្នាំ២០១៨ ខាងមុខនេះ។
ថ្លែងក្នុងពិធីសំណេះសំណាលជាមួយកម្មកររោងចក្រនៅតំបន់ទួលពង្រ ក្នុងខណ្ឌពោធិ៍សែនជ័យ រាជធានីភ្នំពេញ នៅថ្ងៃទី២០ ខែធ្នូ លោក ហ៊ុន សែន បន្តថា ការដំឡើងប្រាក់ខែដល់កម្មករនេះ គឺដើម្បីជួយដោះស្រាយបញ្ហាជីវភាពរបស់ពួកគេ។ ដូច្នេះម្ចាស់ផ្ទះជួលមិនត្រូវដំឡើងថ្លៃផ្ទះតាមការដំឡើងប្រាក់ខែនេះឡើយ។
បន្ថែមពីនេះ លោក ហ៊ុន សែន ក៏បង្គាប់ឲ្យកម្មកររោងចក្រទាំងអស់ បង់ថ្លៃឈ្នួលផ្ទះតាមតម្លៃធម្មតាក្នុងឆ្នាំ២០១៧ប៉ុណ្ណោះ ហើយបើសិនជាម្ចាស់ដំឡើងថ្លៃផ្ទះក្នុងឆ្នាំ២០១៨ ទុកឲ្យលោកជាអ្នកចេញប្រាក់ជំនួស។ «»
ការលើកឡើងរបស់លោក ហ៊ុន សែន នេះ គឺបន្ទាប់ពីមេដឹកនាំសហជីព និងកម្មកររោងចក្រ បានឲ្យដឹងកាលពីសប្ដាហ៍មុនថា តម្លៃផ្ទះជួលរបស់កម្មករ ត្រូវបានម្ចាស់ផ្ទះ ជូនដំណឹងពីការដំឡើងថ្លៃ ចន្លោះពី ៥ទៅដល់ ២០ដុល្លារ ក្នុង ១ខែ ចាប់ពីខែក្រោយនេះតទៅ។ តែមួយថ្ងៃ បន្ទាប់ពីការទាមទាររបស់សហជីព និងកម្មករនោះ ការិយាល័យ ផ្ទះជួលដែលមានទីតាំងស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ក៏បានចេញលិខិតបដិសេធថា ការិយាល័យរបស់ខ្លួនពុំមានការទ្បើងថ្លៃបន្ទប់ជួល សម្រាប់កម្មកររោងចក្រនាឆ្នាំ២០១៨ ខាងមុខនេះទេ។
រីឯនាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ទាក់ទងនឹងការដំឡើងថ្លៃផ្ទះជួលនេះ គឺមានច្បាប់ភតិសន្យាពិសេស ឬហៅថាច្បាប់ជួលផ្ទះ ដែលត្រូវបានអនុម័ត កាលពីឆ្នាំ២០១៥ ដើម្បីបញ្ចៀសការដំឡើងថ្លៃផ្ទះជួលនានាស្រេចតែចិត្ត ដែលនាំឲ្យប្រជាពលរដ្ឋរអ៊ូរទាំ។ ប៉ុន្តែដោយសារច្បាប់នេះ មិនសូវមានឥទ្ធិពលទៅលើម្ចាស់ផ្ទះ ទើបបានជាលោក ហ៊ុន សែន អំពាវនាវបន្ថែមទៀត។ លោកចង់ឃើញមានការពង្រឹង និងការអនុវត្តច្បាប់ភតិសន្យាពិសេស ឬជាជាងការអំពាវនាវរបស់ លោក ហ៊ុន សែន ដដែល។
ម្យ៉ាងវិញទៀត លោកថា ប្រសិនបើរដ្ឋាភិបាលយកចិត្តទុកដាក់លើកម្មកររោងចក្រមែននោះ គឺត្រូវតែពិចារណាដោះស្រាយនូវការដាក់ទណ្ឌកម្មរបស់អាមេរិក និងសហគមន៍អឺរ៉ុប ដែលបានដកប្រព័ន្ធអនុគ្រោះពន្ធ ផ្នែកពាណិជ្ជកម្មជាមួយកម្ពុជា រួមទាំងការនាំចេញផលិតផលពីវិស័យរោងចក្រកាត់ដេរសំលៀកបំពាក់ និងស្បែកជើង និងទំនិញដទៃទៀត។ «»
ដោយសារតែរដ្ឋាភិបាលលោក ហ៊ុន សែន រំលោភសិទ្ធិមនុស្ស និងសម្លាប់ប្រជាធិបតេយ្យនៅកម្ពុជានោះ សភាអឺរ៉ុបកាលពីថ្ងៃទី១៤ ខែធ្នូ សម្រេចផ្អាកជំនួយទាំងអស់ក្នុងក្របខ័ណ្ឌនៃកិច្ចសន្យាសហប្រតិបត្តិការរវាងសហភាពអឺរ៉ុប និងកម្ពុជា ដោយបិទទីផ្សារមិនឲ្យនាំទំនិញពីកម្ពុជា ចូលមកលក់នៅក្នុងប្រទេសទាំង ២៧ នៃសហភាពអឺរ៉ុប។
លោក សន ជ័យ បន្ថែមថា ការប្រកាសរបស់រដ្ឋាភិបាលមិនឲ្យដំឡើងថ្លៃផ្ទះជួលនៅពេលនេះ គឺជាការជួយសម្រួលដល់ស្ថានភាពរស់នៅរបស់កម្មករផង និងដើម្បីកេងចំណេញប្រជាប្រិយភាពនយោបាយផង។
សមាគមរោងចក្រកាត់ដេរនៅកម្ពុជា (GMAC) អោយដឹងថា ខ្លួនមានសមាជិកដែលជារោងចក្រកាត់ដេរចំនួន ៦០០ ដែលទ្រទ្រង់សេដ្ឋកិច្ចដល់កម្មករជាង ៧០ម៉ឺននាក់ ក្នុងនោះភាគច្រើនជាស្ត្រី និងប្រជាពលរដ្ឋប្រមាណ ២លាននាក់ ព្រមទាំងសមាជិកគ្រួសាររបស់ពួកគេផងដែរ។
កន្លងទៅ កម្មកររោងចក្រកាត់ដេរតែងតែរអ៊ូរទាំ អំពីម្ចាស់ផ្ទះជួលមួយចំនួន បានដំឡើងថ្លៃឈ្នួលស្រេចតែចិត្ត ខណៈប្រាក់ឈ្នួលរបស់កម្មករត្រូវបានដំឡើង។ កាលពីឆ្នាំ២០១៥ លោកនាយករដ្ឋមន្ត្រី ហ៊ុន សែន ធ្លាប់អះអាងថា កម្មករប្រមាណ ១៥ម៉ឺននាក់ ដែលបានជួលផ្ទះ ដើម្បីស្នាក់នៅពេលបំពេញការងារក្នុងវិស័យកាត់ដេរ៕