ក្រុមអ្នកអភិរក្សចម្រុះបានរកឃើញសំបុកសត្វកន្ធាយក្បាលកង្កែបនៅតាមដងទន្លេមេគង្គ។ កន្ធាយប្រភេទនេះ ស្ថិតក្នុងបញ្ជីឈ្មោះសត្វដែលជិតផុតពូជនៅក្នុងពិភពលោក។
ព័ត៌មានពីគេហទំព័ររបស់អង្គការសមាគមអភិរក្សសត្វព្រៃនៅកម្ពុជា (WCS) បានដកស្រង់ប្រសាសន៍លោក សោម ស៊ីថា ទីប្រឹក្សាបច្ចេកទេសគម្រោងអភិរក្សសត្វអណ្ដើករបស់អង្គការសមាគមអភិរក្សសត្វព្រៃនៅកម្ពុជានេះ ដោយលើកឡើងថា ចាប់ពីឥឡូវនេះរហូតដល់ខែមិថុនា គឺជាកំឡុងពេលសត្វកន្ធាយក្បាលកង្កែបពងកូន។ នេះជាលើកទី០១ហើយដែលក្រុមអ្នកអភិរក្សរកឃើញសំបុកសត្វកន្ធាយក្បាលកង្កែបនៅក្នុងឆ្នាំនេះ។
លោក សោម ស៊ីថា បញ្ជាក់ទៀតថា អង្គការរបស់លោកនឹងសហការជាមួយរដ្ឋបាលជលផល និងប្រជាសហគមន៍ដើម្បីស្វែងរកសំបុកសត្វកម្របែបនេះបន្ថែមទៀតនៅតាមដងទន្លេមេគង្គ ដើម្បីការពារកុំឲ្យគេប្រមូលយកពងកូនរបស់វា។ លោកបន្តថា កន្ធាយក្បាលកង្កែបអាចផុតពូជទៅថ្ងៃមុខ បើយើងគ្មានវិធានការសមស្របណាមួយដើម្បីអភិរក្សវា។ ប្រជាពលរដ្ឋគ្រប់រូបអាចចូលរួមការពារប្រភេទសត្វដ៏កម្រមួយនេះ ដោយបញ្ឈប់ការទិញ ឬក៏បរិភោគសាច់ ឬពងរបស់វា។
ប្រភពដដែលអះអាងថា សំបុកកន្ធាយនេះ គេប្រទះឃើញនៅទីតាំងមួយតាមដងទន្លេមេគង្គ ចន្លោះខេត្តក្រចេះ និងស្ទឹងត្រែង។ តាំងពីឆ្នាំ២០០៧ រហូតមកដល់ពេលនេះ សំបុកពងចំនួន ៣៧៨សំបុកត្រូវបានការពារ ហើយជាលទ្ធផលមានកូនញាស់ចំនួន ៨.៥២៨កូន ដែលត្រូវបានពន្លែងទៅក្នុងបឹងធម្មជាតិទាំងអស់៕