តំណាងពលរដ្ឋមានទំនាស់ដីធ្លីរ៉ាំរ៉ៃ រស់នៅសហគមន៍អូរខ្សាច់ ស្រុកស្ទឹងហាវ ខេត្តព្រះសីហនុ កំពុងទន្ទឹងរង់ចាំយុត្តិធម៌លើវិវាទដីធ្លីផ្ដល់ជូនដោយថ្នាក់ដឹកនាំនៃរដ្ឋបាលខេត្តព្រះសីហនុ ពិសេសសាលាដំបូងខេត្តនេះ ក្នុងពេលដ៏ឆាប់ខាងមុខ។
មន្ត្រីសង្គមស៊ីវិល ក៏ចង់ឲ្យជម្លោះដីធ្លីដែលអូសបន្លាយពេលជាង ១០ឆ្នាំមកហើយនេះ ត្រូវបានដោះស្រាយចប់ឲ្យបានឆាប់ៗដែរ។
តំណាងសហគមន៍អូរខ្សាច់ លោកស្រី ឡុច ទូច បានឲ្យដឹងកាលពីថ្ងៃព្រហស្បតិ៍ ទី១៤ ខែធ្នូ ថា ការស្វែងរកយុត្តិធម៌ដីធ្លីរបស់ប្រជាពលរដ្ឋនៅសហគមន៍ពួកគាត់បានអូសបន្លាយជាង ១០ឆ្នាំមកហើយ នៅមិនទាន់មានពន្លឺយុត្តិធម៌នៅឡើយទេ។ ទោះជាបែបនេះក្តី តំណាងរូបនេះមានជំនឿទៅលើអាជ្ញាធរខេត្ត និងតុលាការថា អាចដោះស្រាយជម្លោះពួកគេបាន។
កាលពីថ្ងៃទី១៤ ខែធ្នូ មន្ត្រីសាលាដំបូងខេត្តព្រះសីហនុ និងមន្ត្រីមន្ទីរសុរិយោដីខេត្ត ព្រមទាំងមន្ត្រីជំនាញស្ថាប័នពាក់ព័ន្ធ នៃរដ្ឋបាលខេត្តព្រះសីហនុ បានចុះទៅវាស់កំណត់ព្រំ ឬក្បាលដីមានទំនាស់រវាងប្រជាពលរដ្ឋសហគមន៍អូរខ្សាច់ ជាមួយភាគី លោក ប៉ុន សារឿន និងលោក សុខ ងួន មានទំហំផ្ទៃដីសរុបចំនួន ២៧ហិកតារ។
លោកស្រី ឡុច ទូច បន្តទៀតថា លោក ហេង សំរិន ប្រធានរដ្ឋសភា ក៏ធ្លាប់ចេញលិខិតអន្តរាគមន៍ទៅកាន់លោក យន្ត មីន អភិបាលខេត្តព្រះសីហនុ ឲ្យបន្តជួយដោះស្រាយវិវាទដីធ្លីជូនពលរដ្ឋនៅសហគមន៍អូរខ្សាច់នេះរួចហើយ ប៉ុន្តែលទ្ធផលមិនទាន់ជោគជ័យទេ។
តំណាងរូបនេះស្នើដល់លោក យន្ត មីន និងលោក ម៉ុង មុន្នីចរិយា ប្រធានសាលាដំបូងខេត្តព្រះសីហនុ ពិសេសប្រមុខដឹកនាំរដ្ឋាភិបាល ជួយដោះស្រាយបញ្ចប់រឿងលើវិវាទដីធ្លីរ៉ាំរ៉ៃជូនពលរដ្ឋនៅសហគមន៍អូរខ្សាច់ ឲ្យបានឆាប់ ដើម្បីមានសុវត្ថិភាពដូចដើមវិញ។
អ្នកស្រី ឡុច ទូច មានប្រសាសន៍ដូច្នេះ៖ «លោក ប៉ុន សារឿន និងលោក សុខ ងួន បានមករំលោភយកដីប្រជាពលរដ្ឋសហគមន៍អូរខ្សាច់ ដែលបានមករស់នៅតាំងពីឆ្នាំ១៩៩២ មកម្ល៉េះ។ ដីទំនាស់នេះពលរដ្ឋពួកខ្ញុំបានមករស់នៅរហូតមកដល់ឆ្នាំ២០១៧ នេះ ហើយលោក សុខ ងួន បានមកលួចដីខ្ញុំនៅឆ្នាំ២០០៧ ហើយលោក ប៉ុន សារឿន បានមកលួចដីពួកខ្ញុំនៅឆ្នាំ២០០៨។ ខាងភាគី លោក សុខ ងួន និងលោក ប៉ុន សារឿន បានចោទពលរដ្ឋពួកខ្ញុំថា ដីពួកខ្ញុំអត់មានផ្ទះអត់មានរបង និងអត់មានដាំដំណាំ គឺពួកគាត់ហ្នឹងបានភូតកុហកផ្លូវច្បាប់។ ដីពួកខ្ញុំមានផ្ទះ មានរបង និងមានដាំដំណាំ ប៉ុន្តែដីរបស់លោក ប៉ុន សារឿន និងលោក សុខ ងួន អត់មានអ្វីទាំងអស់»។
អ្នកស្រី ឡុច ទូច ឲ្យដឹងទៀតថា ពលរដ្ឋសហគមន៍អូរខ្សាច់ភាគច្រើនបានចូលមករស់នៅលើដីមានវិវាទនេះ ក្រោយឆ្នាំ១៩៩០ ហើយក៏ធ្លាប់ដាក់ពាក្យបណ្ដឹងរដ្ឋប្បវេណីទៅសាលាដំបូងខេត្តព្រះសីហនុ កាលពីឆ្នាំ២០១៤ ស្នើសុំមោឃៈ និងរំលាយប័ណ្ណកម្មសិទ្ធិដីធ្លីដែលត្រូវភាគីទំនាស់ លោក ប៉ុន សារឿន និងលោក សុខ ងួន បានឃុបឃិតលួចធ្វើប្លង់រំលោភដីពលរដ្ឋមានផ្ទៃដីសរុបចំនួន ២៧ហិកតារនេះដែរ។
អាស៊ីសេរី មិនទាន់អាចទាក់ទងភាគី លោក ប៉ុន សារឿន និងលោក សុខ ងួន ដើម្បីបំភ្លឺលើវិវាទដីធ្លីនៅសហគមន៍អូរខ្សាច់ បានទេ កាលពីថ្ងៃព្រហស្បតិ៍ ទី១៤ ខែធ្នូ។ ប៉ុន្តែតាមឯកសារច្បាប់បង្ហាញថា ខាងភាគីលោក ប៉ុន សារឿន បានឈ្នះក្ដីជាបន្តបន្ទាប់ទៅលើសំណុំរឿងដីធ្លីជាមួយពលរដ្ឋចំនួន ៣២គ្រួសារនៅសហគមន៍អូរខ្សាច់។ វិវាទនេះភាគីលោក ប៉ុន សារឿន ក៏ធ្លាប់ប្តឹងពលរដ្ឋសហគមន៍នេះចំនួន ៤នាក់ ទៅកាន់សាលាដំបូងខេត្តព្រះសីហនុ ដោយចោទពីបទប្រើអំពើហិង្សាដោយទុច្ចរិតទៅលើអ្នកកាន់កាប់អចលនវត្ថុ ប្រព្រឹត្តនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីឆ្នាំ២០០៨។
តំណាងពលរដ្ឋទាំង ៤នាក់ ដែលលោក ប៉ុន សារឿន ប្ដឹងមាន ឈ្មោះ ឡុច ទូច ឃឹម មុំ អេង វ៉ាន់ និង កៅ ហួរ ហើយក្នុងចំណោមនេះភាគច្រើនជាស្ត្រីមេម៉ាយមានវ័យចំណាស់ និងមានជំងឺប្រចាំកាយថែមទៀត។
លោក យន្ត មីន មានប្រសាសន៍ថា លោកនឹងសម្របសម្រួលដោះស្រាយទំនាស់ដីធ្លីរវាងពលរដ្ឋសហគមន៍អូរខ្សាច់ ជាមួយភាគីលោក ប៉ុន សារឿន និងលោក សុខ ងួន ជាដើម ឲ្យស្របតាមច្បាប់ និងអាចឲ្យគ្រប់ភាគីទំនាស់អាចទទួលយកលទ្ធផលឈ្នះៗទាំងអស់គ្នា។
អ្នកស្រី ជៀប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ បានចុះពិនិត្យផ្ទាល់ដល់ទីតាំងដីទំនាស់សហគមន៍អូរខ្សាច់ កាលពីព្រឹកថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧។ អ្នកស្រីបានទទូចដល់អភិបាលខេត្តព្រះសីហនុ ឲ្យជួយសម្របសម្រួលដោះស្រាយទំនាស់ដីធ្លីជូនប្រជាពលរដ្ឋរស់នៅសហគមន៍នេះចប់ឲ្យបានឆាប់។
អ្នកឃ្លាំមើលសង្គមរូបនេះក៏ស្នើដល់មន្ត្រីជំនាញនៅតាមមន្ទីរ ឬស្ថាប័នរដ្ឋនីមួយៗ ពិសេសសាលាដំបូងខេត្តព្រះសីហនុ មុននឹងចេញប្លង់កម្មសិទ្ធិដីធ្លីជូនបុគ្គល ឬកាត់ក្តីទៅលើសំណុំរឿងដីធ្លីត្រូវចុះស៊ើបអង្កេតដល់ទីតាំងកើតមានទំនាស់ជាក់ស្ដែងឲ្យបានត្រឹមត្រូវជាមុនសិន ទើបវិនិច្ឆ័យក្តីជាក្រោយ។
យ៉ាងនេះក្តី តំណាងពលរដ្ឋសហគមន៍អូរខ្សាច់ លោកស្រី ឡុច ទូច បានចោទភាគីលោក ប៉ុន សារឿន រួមជាមួយលោក សុខ ងួន ថាពិតជាបានឃុបឃិតជាមួយមន្ត្រីមន្ទីរពាក់ព័ន្ធ និងអាជ្ញាធរមូលដ្ឋានមួយចំនួននាខេត្តព្រះសីហនុ លួចធ្វើប្លង់កម្មសិទ្ធិទៅលើដីលំនៅឋាន និងដីចម្ការដំណាំកសិកម្ម ទាំងពួកគាត់មិនបានដឹងខ្លួនជាមុនទេ៕