Clik here to view.
សហជីពសេរីកម្មករនៃព្រះរាជាណាចក្រកម្ពុជា អំពាវនាវសុំឲ្យរដ្ឋាភិបាលដោះស្រាយវិបត្តិនយោបាយនៅកម្ពុជា ដោយសន្តិវិធី ដើម្បីបញ្ចៀសការដាក់ទណ្ឌកម្មសេដ្ឋកិច្ចពីសហរដ្ឋអាមេរិក និងសហភាពអឺរ៉ុប។
អនុប្រធានសហជីព លោក ម៉ាន់ សេងហាក់ បានប្រាប់អាស៊ីសេរី តាមទូរស័ព្ទនៅល្ងាចថ្ងៃទី១៣ ខែធ្នូ ថា សហជីពលោកដែលមានកម្មករជាសមាជិកចំនួនជាង ១ម៉ឺននាក់ ស្នើរដ្ឋាភិបាលកម្ពុជា ត្រូវស្តារស្ថានការណ៍នយោបាយឲ្យវិលមករកភាពប្រក្រតីឡើងវិញ ដើម្បីបន្តទទួលបានការអនុគ្រោះពន្ធទៅលើការនាំចេញផលិតផលក្នុងវិស័យកាត់ដេរនៅកម្ពុជា៖ «យើងអត់មានប្រតិកម្មអ្វីទេចំពោះបណ្ដាប្រទេសដែលបញ្ជាទិញទំនិញពីកម្ពុជា នោះ។ ប្រទេសកាលណាគោរពច្បាប់ គឺសហគមន៍អន្តរជាតិគេជួយ។ ប្រមុខរដ្ឋាភិបាលគាត់បាននិយាយថា គេដាក់ទណ្ឌកម្មអ្វីក៏ដាក់ចុះ ប៉ុន្តែឃើញសហជីពកម្មករនោះគាត់ស្នើឲ្យគេបន្តការលើកពន្ធ»។
ការលើកឡើងរបស់អនុប្រធានសហជីពសេរីកម្មករនៅកម្ពុជា លោក ម៉ាន់ សេងហាក់ នេះ ធ្វើឡើងបន្ទាប់ពីក្រុមសហជីពចំនួន៣ ដែលគេជឿជាក់ថា ជាសហជីពស្និទ្ធនឹងរដ្ឋាភិបាលលោក ហ៊ុន សែន នៅថ្ងៃទី១៣ ខែធ្នូ នេះ បានសរសេរលិខិតស្នើសុំទៅស្ថានទូតសហរដ្ឋអាមេរិក និងសហភាពអឺរ៉ុប ឲ្យបន្តទិញសំលៀកបំពាក់ និងអនុគ្រោះពន្ធដល់ការនាំចូលពីកម្ពុជា។ ក្រុមសហជីពទាំងបីនេះ រួមមានសហព័ន្ធសហជីពមិត្តភាពកម្មករ (WFUF) សម្ព័ន្ធសហជីពជាតិ (NTUC) និងសហព័ន្ធសហជីពដើម្បីកម្មករ (TUFW)។
មេដឹកនាំសហជីពទាំងបីនេះក៏បានបញ្ជាក់ក្នុងលិខិតដដែលថា ខ្លួនមានការព្រួយបារម្ភជាខ្លាំងចំពោះស្ថានការណ៍នយោបាយពេលនេះ ដែលនឹងជះឥទ្ធិពលអាក្រក់មកលើវិស័យកាត់ដេរសំលៀកបំពាក់ និងស្បែកជើងជាដើម ក្រោយដែលសហរដ្ឋអាមេរិក និងសហភាពអឺរ៉ុប បញ្ឈប់ការអនុគ្រោះពន្ធនៃការនាំចេញផលិតផលកាត់ដេរសំលៀកបំពាក់ចេញពីកម្ពុជា។ បញ្ហានេះ នឹងនាំឲ្យប៉ះពាល់ការងារដល់កម្មករនិយោជិត និងប្រជាពលរដ្ឋខ្មែររាប់លាននាក់ដែលអាស្រ័យផលលើវិស័យកាត់ដេរនេះ។
ប្រទេសមហាអំណាចធំៗ រួមទាំងអង្គការសហប្រជាជាតិទទួលបន្ទុកសិទ្ធិមនុស្ស បានចេញសេចក្ដីថ្លែងការណ៍ថ្កោលទោសលោក ហ៊ុន សែន ជាបន្តបន្ទាប់ ក្រោយពីចាប់ខ្លួនលោក កឹម សុខា និងរំលាយគណបក្សសង្គ្រោះជាតិ ក្នុងនោះមានសហភាពអន្តរសភា ហៅកាត់ថា IPU ដែលមានសមាជិកមកពី ១៧៣ប្រទេសនៅលើសកលលោក ប្រទេសអូស្ត្រាលី ស៊ុយអែត សហភាពអឺរ៉ុប ប្រទេសបារាំង និងអាមេរិក។ ក្រុមប្រទេសទាំងនេះក៏បានអំពាវនាវឲ្យលោក ហ៊ុន សែន ធ្វើឲ្យស្ថានការណ៍វិលមកដូចដើមជាបន្ទាន់ រួមមានការដោះលែងលោក កឹម សុខា អ្នកជាប់ឃុំដទៃទៀត និងបើកឲ្យមានវត្តមានបក្សប្រឆាំងចូលរួមបោះឆ្នោតនៅឆ្នាំ២០១៨ បើពុំនោះទេ សហគមន៍អន្តរជាតិនឹងដាក់ទណ្ឌកម្មបន្ថែមទៀតលើរដ្ឋាភិបាលលោក ហ៊ុន សែន៕
