សហគមន៍អឺរ៉ុប គ្រោងចាត់វិធានការទណ្ឌកម្មធ្ងន់ៗលើរដ្ឋាភិបាលលោក ហ៊ុន សែន តាមរយៈការបោះឆ្នោតលើសេចក្ដីសម្រេចមួយនៅថ្ងៃ១៤ ខែធ្នូ នេះ ដែលអាចប៉ះពាល់ដល់វិស័យកាត់ដេរដែលមានកម្មករជិតមួយលាននាក់។ ទណ្ឌកម្មនេះ នឹងចៀសមិនផុត បើលោក ហ៊ុន សែន នៅតែមិនព្រមធ្វើតាមសំណូមពររបស់អន្តរជាតិ។
សភាអឺរ៉ុប នៅថ្ងៃទី១៤ ខែធ្នូ នេះ គ្រោងបោះឆ្នោតអនុម័តសេចក្ដីសម្រេចមួយស្ដីពីការបញ្ឈប់ការអនុគ្រោះពន្ធនាំចេញទំនិញពីប្រទេសកម្ពុជា មកកាន់ទីផ្សារអឺរ៉ុប បើរដ្ឋាភិបាលលោក ហ៊ុន សែន នៅតែព្រងើយកន្តើយមិនធ្វើតាមសំណូមពររបស់សហគមន៍អន្តរជាតិ ដែលស្នើឲ្យលុបចោលសេចក្ដីសម្រេចរម្លាយគណបក្សសង្គ្រោះជាតិ និងបញ្ឈប់ការបង្កឧបសគ្គជាបន្តបន្ទាប់ដែលរារាំងដល់គណបក្សប្រឆាំង ដោយត្រូវបញ្ឈប់ឲ្យបានឆាប់តាមដែលអាចធ្វើបានដើម្បីឲ្យបក្សប្រឆាំងអាចចូលរួមក្នុងជីវភាពនយោបាយស្មើភាពគ្នាក្នុងដំណើរការបោះឆ្នោតជាតិខាងមុខ។
សេចក្ដីសម្រេចនេះសង្កត់ធ្ងន់ថា រដ្ឋាភិបាលលោក ហ៊ុន សែន ត្រូវចងចាំថា កិច្ចព្រមព្រៀងនៃការអនុគ្រោះពន្ធនាំចេញផលិតផលពីកម្ពុជា ទៅកាន់ទីផ្សារអឺរ៉ុបនេះ អាចបន្តទៅទៀតបាន តែក្នុងករណីដែលរដ្ឋាភិបាលកម្ពុជា គោរពសិទ្ធិមនុស្ស និងប្រជាធិបតេយ្យប៉ុណ្ណោះ។ ប៉ុន្តែ សភាអឺរ៉ុបសង្កេតឃើញថា លក្ខខណ្ឌដែលមិនអាចខ្វះបានទាំងអស់នេះ មិនត្រូវបានគោរពនោះឡើយ ដោយសារតែចំណាត់ការរបស់រដ្ឋាភិបាលក្នុងការធ្វើទុក្ខបុកម្នេញគណបក្សសង្គ្រោះជាតិ យ៉ាងដំណំរហូតដល់ការរម្លាយគណបក្សប្រឆាំង ការចាប់ប្រធានគណបក្សនេះដាក់ពន្ធនាគារ និងការធ្វើទុក្ខបុកម្នេញលើអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យជាដើម។ សេចក្ដីសម្រេចដដែលនេះក៏ស្នើឲ្យស្ថាប័នប្រតិបត្តិរបស់សហភាពអឺរ៉ុបទាំងក្នុង និងក្រៅប្រទេស រៀបចំបញ្ជីឈ្មោះជនទាំងឡាយណាដែលចូលដៃក្នុងការម្លាយគណបក្សសង្គ្រោះជាតិ និងរំលោភសិទ្ធិមនុស្ស និងប្រជាធិបតេយ្យធ្ងន់ធ្ងរ ដើម្បីបង្កកទ្រព្យសម្បត្តិ និងហាមឃាត់មិនឲ្យចូលសហគមន៍អឺរ៉ុប។
ជាចុងក្រោយសេចក្ដីសម្រេចនេះ បង្គាប់ឲ្យប្រធានសភាអឺរ៉ុប បញ្ជូនសេចក្ដីសម្រេចនេះទៅគណៈកម្មការក្រុមប្រឹក្សាស្ថាប័នប្រតិបត្តិរបស់ប្រទេសអឺរ៉ុបនៅក្រៅប្រទេសរដ្ឋជាសមាជិករដ្ឋាភិបាល និងរដ្ឋសភាកម្ពុជា និងរដ្ឋាភិបាលប្រទេសអាស៊ានទាំងអស់ និងតម្រូវឲ្យរដ្ឋាភិបាលលោក ហ៊ុន សែន ដោះលែងប្រធានគណបក្សសង្គ្រោះជាតិ លោក កឹម សុខា និងអ្នកទោសនយោបាយដទៃទៀតជាបន្ទាន់ និងដោយឥតលក្ខខណ្ឌ ហើយរៀបចំការបោះឆ្នោតមួយដោយសេរី ត្រឹមត្រូវ និងយុត្តិធម៌ ដោយមានការចូលរួមពីគណបក្សសង្គ្រោះជាតិ អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ បើមិនចង់រងទណ្ឌកម្មបែបនេះនោះទេ។ សភាអឺរ៉ុប ស្នើឲ្យរដ្ឋាភិបាលឆាប់ស្វះស្វែងរកកិច្ចចរចាជាមួយគណបក្សប្រឆាំង ដើម្បីរកដំណោះស្រាយនយោបាយមួយ។
ទោះជាមានទណ្ឌកម្មបណ្ដើរៗក្តី ក៏លោកនាយករដ្ឋមន្ត្រី ហ៊ុន សែន ថ្លែងបញ្ជាក់ជាច្រើនលើកច្រើនគ្រា រួមទាំងថ្ងៃម្សិលមិញ (១៣ ធ្នូ) ផង ថាលោកមិនខ្វល់អំពីទណ្ឌកម្មទាំងនេះនោះទេ ហើយការបោះឆ្នោតនៅកម្ពុជា នៅតែប្រព្រឹត្តទៅដូចធម្មតា ទោះគ្មានបក្សប្រឆាំងចូលរួម។ លោក ហ៊ុន សែន ថ្លែងទៀតថា ភាពស្របច្បាប់នៃការបោះឆ្នោតនៅកម្ពុជា មិនត្រូវការបរទេសណាទទួលស្គាល់នោះទេ។ ប៉ុន្តែ អ្នកវិភាគ និងមន្ត្រីសិទ្ធិមនុស្សយល់ឃើញថា បើនៅតែគ្មានវត្តមានគណបក្សប្រឆាំង និងនៅតែមានការធ្វើទុក្ខបុកម្នេញសំឡេងប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យបែបនេះ នោះសហគមន៍អន្តរជាតិ នឹងមិនទទួលស្គាល់លទ្ធផលបោះឆ្នោតជាតិ ឆ្នាំ២០១៨ ខាងមុខនេះទេ។ ជាលទ្ធផល ប្រទេសកម្ពុជា នឹងឯកោខ្លាំងពីពិភពលោក។ ម្យ៉ាងទៀត អ្នកវិភាគបញ្ជាក់ថា លោក ហ៊ុន សែន កំពុងតែព្រួយបារម្ភ គ្រាន់តែខំព្យាយាមមិនបង្ហាញឲ្យឃើញចំណុចខ្សោយនេះតែប៉ុណ្ណោះ៕