Clik here to view.
អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋខេត្តព្រះសីហនុ បង្ហាញការព្រួយបារម្ភ ទៅលើបទល្មើសចាប់ជំរិត និងវាយកាប់ចាក់គ្នា បង្កដោយជនល្មើសជនជាតិចិនបានបន្តកើតមានជាបន្តបន្ទាប់នាមូលដ្ឋានជាប់ឆ្នេរសមុទ្រមួយនេះ។
ប៉ុន្តែ បញ្ហានេះសមត្ថកិច្ចនគរបាលខេត្តព្រះសីហនុ ប្ដេជ្ញាថា នឹងមិនអនុញ្ញាតឲ្យបទល្មើសគ្រប់ប្រភេទ អាចធ្វើសកម្មភាពនាមូលដ្ឋាននេះបានដោយស្រួលនោះទេ។
មន្ត្រីសង្គមស៊ីវិល ភ្ញៀវទេសចរជាតិ ពិសេសប្រតិបត្តិករទេសចរខេត្តព្រះសីហនុ ស្នើឲ្យសមត្ថកិច្ចជំនាញគ្រប់ស្ថាប័នជួយកំណត់អត្តសញ្ញាណជនជាតិចិន ដែលចូលមករស់នៅ និងប្រកបរបរផ្សេងៗនាមូលដ្ឋាននេះ ឲ្យបានត្រឹមត្រូវ ព្រោះបានបង្កបទល្មើសផ្សេងៗ រួមមានបង្កើតឲ្យមានក្រុមបងតូចបងធំ បង្ករឿងវាយកាប់ចាក់ និងបង្កើតក្រុមចាប់ជំរិតមនុស្សទារប្រាក់ បានបន្តកើតមានជាបន្តបន្ទាប់ និងគួរឲ្យព្រួយបារម្ភបំផុត។
ប្រតិបត្តិករទេសចរ និងប្រជាពលរដ្ឋ ខេត្តព្រះសីហនុ ព្រួយបារម្ភថា នៅថ្ងៃអនាគតភ្ញៀវទេសចរជាតិ ពិសេសភ្ញៀវអឺរ៉ុប នឹងឈប់មកទស្សនាខេត្តទេសចរណ៍ជាប់ឆ្នេរសមុទ្រមួយនេះទៀតទេ ព្រោះពួកគេបារម្ភអំពីបញ្ហាសុវត្ថិភាពផ្ទាល់ខ្លួន។
ការព្រួយបារម្ភនេះ បានកើតមានជាថ្មីទៀត ក្រោយពេលសមត្ថកិច្ចនគរបាលខេត្តព្រះសីហនុ បានបង្ក្រាបបទល្មើសចាប់ជំរិតមនុស្ស បង្កដោយជនសង្ស័យជាជនជាតិចិនមួយក្រុមមានគ្នា ៣នាក់ ប្រដាប់ដោយកាំភ្លើងខ្លីទំនើប បានចាប់ជំរិតអ្នកជំនួញជនជាតិចិនដូចគ្នា ដែលចូលមករស់នៅ និងធ្វើជំនួញក្នុងខេត្តព្រះសីហនុ គំរាមទារលុយជិត ១លានដុល្លារសហរដ្ឋអាមេរិក កាលពីថ្ងៃទី៩ ខែធ្នូ ឆ្នាំ២០១៧។
ទាក់ទិនបញ្ហានេះ អ្នកស្រី ជៀប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ក៏ព្រួយបារម្ភចំ ពោះវត្តមានជនជាតិចិន ដែលបានបង្ហាញខ្លួននៅមូលដ្ឋានខេត្តទេសចរណ៍មួយនេះប៉ុន្មានឆ្នាំចុងក្រោយនេះ បានបង្កើតក្រុមបងតូចបងធំ ហើយបានបង្កបទល្មើសវាយកាប់ចាក់ និងបង្កើតក្រុមចាប់ជំរិតមនុស្សទាំងតាមប្រព័ន្ធអ៊ីនធើណេត និងជំរិតទារប្រាក់ដោយផ្ទាល់ជាដើម។
អ្នកស្រី សុធារី ព្រួយបារម្ភថា បើអាជ្ញាធរកំណត់អត្តសញ្ញាណជនជាតិចិន ដែលចូលមករស់នៅ និងប្រកបការងារផ្សេងៗ នាមូលដ្ឋានខេត្តព្រះសីហនុ មិនបានច្បាស់លាស់ទេ នឹងមានបញ្ហាអសន្តិសុខធ្ងន់ធ្ងរកើតឡើងនាថ្ងៃអនាគត។ ហើយពេលនេះ ទាំងភ្ញៀវទេសចរមកពីអឺរ៉ុប និងភ្ញៀវជាតិ ក៏លែងឈប់ចូលមកទស្សនាខេត្តព្រះសីហនុទៀតដែរ៖ «សមត្ថកិច្ចនគរបាលខេត្តព្រះសីហនុ បានសហការគ្នាបង្ក្រាបបានបទល្មើសចាប់ជំរិតប្រាក់បាន ១ករណី ដែលទាំងជនសង្ស័យ និងជនរងគ្រោះ គឺជាជនជាតិចិនគ្នាគាត់។ ហើយជនរងគ្រោះគឺជាពាណិជ្ជករ និងជនសង្ស័យ គឺជាយុវវ័យមានអាយុត្រឹមជាង ២០ឆ្នាំ បានធ្វើសកម្មភាពបទល្មើសចាប់ជំរិតមនុស្ស។ ព័ត៌មានចាប់ជំរិតមនុស្សនេះ បានបង្កឲ្យប្រជាពលរដ្ឋខេត្តព្រះសីហនុ មានការភ្ញាក់ផ្អើលខ្លាំង ដោយសារតែវត្តមានជនជាតិចិន ចូលមកខេត្តព្រះសីហនុ មិនទាន់បានប៉ុន្មានឆ្នាំផង គឺក្នុងចំណោមជនជាតិចិន ទាំងនោះ បានបង្កបងល្មើសចាប់ជំរិត ដែលបទល្មើសនេះ នៅក្នុងខេត្តព្រះសីហនុ មិនធ្លាប់កើតមានពីមុនមកទេ។ ហើយទាំងជនសង្ស័យ និងជនរងគ្រោះជាជនជាតិចិនដូចគ្នានេះ គឺពួកគាត់មានវត្តមាន នៅក្នុងខេត្តព្រះសីហនុទាំងអស់គ្នា ដោយចូលមកមូលដ្ឋាននេះមិនទាន់បានប៉ុន្មានផង គឺហ៊ានធ្វើសកម្មភាពចាប់ជំរិតមនុស្ស ក្នុងទឹកដីខេត្តព្រះសីហនុ»។
ចំណែក មន្ត្រីអង្កេតអង្គការលីកាដូ (Licadho) ប្រចាំខេត្តព្រះសីហនុ លោក ស្រេង វ៉ាន់លី ក៏ព្រួយបារម្ភអំពីបទល្មើសផ្សេងៗ បង្កបទល្មើសដោយជនជាតិចិននេះដែរ។ លោកស្នើដល់កម្លាំងសមត្ថកិច្ចគ្រប់ស្ថាប័នជំនាញ ជួយបន្តយកចិត្តទុកដាក់ទៅលើវត្តមានជនជាតិចិន ដែលចូលមករស់នៅ និងប្រកបរបរផ្សេងៗនាមូលដ្ឋាននេះ ហើយតែងបង្កបទល្មើសវាយកាប់ចាក់ និងចាប់ជំរិតជាបន្តបន្ទាប់មកនេះ៖ «មួយរយៈពេលកន្លងមកនេះ គឺមានជនជាតិចិនជាច្រើន ដែលមានជាប់ពាក់ព័ន្ធបទល្មើសវាយតប់គ្នា និងបង្កបទល្មើសពាក់ព័ន្ធគាត់អាចបើកបររថយន្តតាមផ្លូវសាធារណៈ ដោយខ្លួនឯង ក្នុងល្បឿនលឿន ហើយបង្កឲ្យមានគ្រោះថ្នាក់ចរាចរណ៍ នាំឲ្យបាត់បង់អាយុជីវិតប្រជាពលរដ្ឋខ្មែរអស់ជាច្រើននាក់។ បទល្មើសផ្សេងទៀត គឺថ្មីៗកន្លងមកនេះ ជនជាតិចិនដែលចូលមករស់នៅខេត្តព្រះសីហនុ បានជាប់ពាក់ព័ន្ធបទល្មើស ចាប់ជំរិតជនជាតិចិនគ្នាឯង ដែលចូលមករស់នៅ និងធ្វើការងារនៅក្នុងខេត្តព្រះសីហនុតែម្ដង។ ករណីចាប់ជំរិតនេះ គឺខុសប្លែកបទល្មើសចាប់ជំរិតមនុស្ស កាលពីពេលមុន គឺជនល្មើស បានយកទឹកដីខេត្តព្រះសីហនុ សម្រាប់ចាប់ជំរិតមនុស្ស ឬចាប់ជំរិតជនជាតិចិនគ្នាឯង ជំរិតទារលុយតាមប្រព័ន្ធអ៊ីនធើណេត ដែលជនរងគ្រោះ រស់នៅក្រៅប្រទេស»។
កាលពីថ្ងៃទី៩ ខែធ្នូ ឆ្នាំ២០១៧ កម្លាំងនគរបាលខេត្តព្រះសីហនុ បានបើកប្រតិបត្តិការបង្ក្រាបបទល្មើស អំពើចាប់ជំរិតជនជាតិចិន ១ករណី ដោយចាប់បានជនសង្ស័យជនជាតិចិនចំនួន ៣នាក់ បញ្ជូនទៅសាលាដំបូងខេត្តនេះ បន្តនីតិវិធី។
លោក ជួន ណារិន្ទ ស្នងការនគរបាលខេត្តព្រះសីហនុ ផ្ទល់សម្ភាសឲ្យអ្នកកាសែតដឹងថា ក្រុមចាប់ជំរិតបានជួលផ្ទះមួយកន្លែង ក្នុងបុរី ប៊ីអេស (BS) មានទីតាំងនៅក្រុមទី១ ភូមិ៥ សង្កាត់លេខ៤ ក្រុងព្រះសីហនុ។ អំពើចាប់ជំរិតជនជាតិចិន ដែលជនសង្ស័យក៏ជាជនជាតិចិនដូចគ្នានេះ ក្រុមជនល្មើសបានរៀបផែនការយ៉ាងល្អិតល្អន់ មុនធ្វើសកម្មភាពចាប់ជំរិតជនរងគ្រោះ។
យ៉ាងនេះក្តី ពលរដ្ឋរស់នៅខេត្តព្រះសីហនុ អះអាងថា ទីតាំងដែលជនសង្ស័យធ្វើសកម្មភាពចាប់ជំរិតនេះ គឺស្ថិតនៅជាប់ខាងក្រោយរបង នៃបញ្ជាការដ្ឋានកងរាជអាវុធហត្ថខេត្តព្រះសីហនុ ដោយជនសង្ស័យ ធ្វើសកម្មភាពនៅពេល ជនរងគ្រោះបើករថយន្តម្នាក់ឯង មកដល់ចំណុចជិតស្ថានីយអាងចម្រោះទឹកស្អាត នៅម្ដុំអូរឈើទាល ក៏ត្រូវក្រុមជនសង្ស័យ មានគ្នាចំនួន ៣នាក់ បើករថយន្តកៀរស្ទាក់ និងដកភ្ជង់កាំភ្លើងភ្ជង់ ចាប់ក្រៀកដាក់បញ្ចូលឡានយកទៅបង្ខាំងទុកនៅផ្ទះជួល របស់ជនសង្ស័យ ស្ថិតក្នុងបុរី ប៊ីអេស (BS) ម្តុំអូរទី១ សង្កាត់លេខ៤ ក្រុងព្រះសីហនុ។
យ៉ាងណាក៏ដោយចុះ លោក ជួន ណារិន្ទ បានឲ្យដឹងថា ប្រមាណជិត ២ម៉ោង ក្រោយចាប់ជំរិត គឺក្រុមជនសង្ស័យ ក៏បានទូរស័ព្ទជំរិតទារប្រាក់ ពីប្អូនជនរងគ្រោះចំនួន ៨០ម៉ឺនដុល្លារសហរដ្ឋអាមេរិក ហើយឈានដល់សមត្ថកិច្ចជំនាញ របស់លោកចុះបង្ក្រាប និងចាប់ខ្លួនជនសង្ស័យចំនួន៣នាក់ រួមមាន៖ ឈ្មោះ ZHENG RONGMAO ភេទប្រុស ជនជាតិចិន អាយុ ២៦ឆ្នាំ។ ឈ្មោះ DAI HONGDA ភេទប្រុស ជនជាតិចិន អាយុ ២៣ឆ្នាំ និង ឈ្មោះ LIN JINPEI ភេទប្រុស ជនជាតិចិន អាយុ ២៤ឆ្នាំ។
យុទ្ធនាការនេះ សមត្ថកិច្ចចាប់បានវត្ថុតាងមួយចំនួនរួមមាន៖ កាំភ្លើងខ្លីម៉ាក BERITA STOM ១ដើម មានបង់ ២ មានគ្រាប់ចំនួន ១០គ្រាប់។ កូនកាំបិត ១ ខ្សែចងរឹត (ស៊ីល) ២ដុំ ទូរស័ព្ទដៃ ៦គ្រឿង និង រថយន្ត ១គ្រឿង និងរំដោះជនរងគ្រោះ បានដោយសុវត្ថិភាព គឺ មានឈ្មោះ LI FUJIE ជនជាតិចិន ភេទប្រុស អាយុ៤៧ឆ្នាំ។
ករណីនេះ លោក ជួន ណារិន្ទ បញ្ជាក់ថា ជនសង្ស័យជំរិតទារប្រាក់ទាំង ៣នាក់នេះ មកពីប្រទេសចិន បានប្រើប្រាស់លិខិតឆ្លងដែន ២ផ្សេងៗគ្នា គឺលិខិតឆ្លងដែនពិតប្រាកដ ទុកសម្រាប់ការធ្វើដំណើរ និងលិខិតក្លែងក្លាយ ទុកសម្រាប់ការជួលរថយន្ត និងជួលផ្ទះ ដើម្បីអាចងាយឲ្យពួកគេផ្លាស់ប្ដូរអត្តសញ្ញាណ ទីតាំងគេចខ្លួន ក្រោយពេលបែកការណ៍។ លោកថា ក្រុមនេះចូលមកប្រទេសកម្ពុជា ក៏ដើម្បីតាមសម្គាល់ អ្នកវិនិយោគទុកជនជាតិចិន ដែលមានលុយច្រើន ដោយពួកគេបានកត់លេខរថយន្តចំនួន ៦គ្រឿង ក្នុងបំណងចាប់ជំរិត ប៉ុន្តែទើបចេញធ្វើសកម្មភាពបាន ១លើក ក៏ត្រូវសមត្ថកិច្ចលោកបង្ក្រាបបានទាំងស្រុង៕