ប្រជាពលរដ្ឋនៅស្រុកសំឡូត ខេត្តបាត់ដំបង អះអាងថា ករណីឈូសឆាយដីព្រៃនៅតំបន់ព្រៃអភិរក្សប្រើប្រាស់ច្រើនយ៉ាងសំឡូត កាន់តែមានសកម្មភាពច្រើនឡើង។ ការអះអាងនេះ ក្រោយពេលពួកគេចុះទៅឃើញមានការនាំគ្រឿងចក្រចូលទៅឈូសឆាយបន្ថែមទៀតដោយពុំទាន់មានការទប់ស្កាត់នៅឡើយ។ អភិបាលខេត្តបាត់ដំបង បញ្ជាក់ថា បានបញ្ជូនមន្ត្រីជំនាញចុះស្រាវជ្រាវករណីនេះជាបន្ទាន់ហើយ។
ពលរដ្ឋនៅតំបន់ព្រំដែននៃស្រុកសំឡូត លើកឡើងថា ក្រោយពេលរាយការណ៍ផ្សាយព័ត៌មានស្ដីពីការឈូសឆាយដីធ្វើជាកម្មសិទ្ធិនៅតំបន់អភិរក្សព្រៃឈើប្រើប្រាស់ច្រើនយ៉ាង គឺមិនបានធ្វើឱ្យសកម្មភាពល្មើសច្បាប់នោះថយចុះឡើយ។ ផ្ទុយទៅវិញ សកម្មភាពឈូសឆាយកាន់តែមានច្រើនជាងមុន។ ជាក់ស្ដែងមានគ្រឿងចក្រចូលទៅឈូសឆាយដីព្រៃភ្នំ តំបន់អភិរក្ស នៅក្បែរច្រក ៤០០ ព្រំដែនកម្ពុជា-ថៃ រហូតដល់ទៅ ៤គ្រឿងនៅថ្ងៃទី១១ ខែធ្នូ។
ប្រជាពលរដ្ឋនៅស្រុកសំឡូត សុំមិនបញ្ចេញឈ្មោះ និងសំឡេង ឲ្យដឹងនៅថ្ងៃទី១១ ខែធ្នូ ថា ទំហំនៃការឈូសឆាយដីព្រៃភ្នំធ្វើជាកម្មសិទ្ធិផ្ទាល់ខ្លួន គឺអស់ប្រមាណ ១ហិកតារ។ ពលរដ្ឋរូបនេះអះអាងទៀតថា ការឈូសឆាយនោះ គឺអាចមានមន្ត្រីតុលាការខេត្តបាត់ដំបង ជាអ្នកនៅពីក្រោយខ្នងថែមទៀតផង។ ពលរដ្ឋដដែលបារម្ភថា តំបន់អភិរក្សព្រៃឈើប្រើប្រាស់ច្រើនយ៉ាងសំឡូត នឹងវិនាសហិនហោចប្រសិនបើអាជ្ញាធរមិនអាចទប់ស្កាត់ឲ្យមានប្រសិទ្ធភាពទេ។
ទាក់ទងបញ្ហានេះ អភិបាលខេត្តបាត់ដំបង លោក ងួន រតនៈ មានប្រសាសន៍ថា ខាងលោកបានទទួលព័ត៌មាននេះហើយ ព្រមទាំងបានបញ្ជូនមន្ត្រីជំនាញដើម្បីស្រាវជ្រាវជាបន្ទាន់ថែមទៀតផង។ លោកបញ្ជាក់ទៀតថា ប្រសិនបើរកឃើញថា សកម្មភាពឈូសឆាយនោះខុសច្បាប់ប្រាកដមែន នឹងចាត់វិធានការតាមច្បាប់ ដោយមិនគិតថា អ្នកប្រព្រឹត្តនោះមានអំណាច ឬមានខ្នងប៉ុណ្ណាទេ៖ «បាទ!បានទទួលដំណឹងថា មានការទន្ទ្រានខ្លះ។ អ៊ីចឹងខ្ញុំក៏មានការប្រជុំគណៈបញ្ជាការឯកភាព ក៏បានដាក់ផែនការឱ្យមន្ត្រីសមត្ថកិច្ចហ្នឹងគាត់ចុះទៅ ពីព្រោះតំបន់នោះជាតំបន់ការពារធនធានធម្មជាតិមួយរបស់ក្រសួងបរិស្ថាន នៅក្នុងខេត្តបាត់ដំបង»។
តំបន់ការពារព្រៃឈើប្រើប្រាស់ច្រើនយ៉ាងសំឡូត មានផ្ទៃដីប្រមាណ ៤ម៉ឺនហិកតារ គឺមួយផ្នែកស្ថិតនៅខេត្តប៉ៃលិន និងស្រុកសំឡូត ខេត្តបាត់ដំបង។
តំបន់នេះ ជាជំនួយអភិរក្សឧបត្ថម្ភដោយតារាភាពយន្តល្បីឈ្មោះហូលីវូដ (Hollywood) របស់អាមេរិក ឈ្មោះ អែនជេលីណា ចូលី (Angelina Jolie) ដែលអភិរក្សដោយអង្គការ អិម.ជេ.ភី (MJP)។
របាយការណ៍របស់អង្គការ អិម.ជេ.ភី បង្ហាញថា នៅឆ្នាំ១៩៩៣ ចំនួនផ្ទៃដីព្រៃឈើនៅតំបន់អភិរក្សប្រមាណ ៦ម៉ឺនហិកតារ ហើយផ្ទៃដីមួយចំនួនបានបាត់បង់ដោយសារការកាប់ព្រៃឈើយកដីធ្វើជាកម្មសិទ្ធិខុសច្បាប់ប្រមាណ ៣០០ហិកតារក្នុងមួយឆ្នាំ។ បច្ចុប្បន្ន ព្រៃឈើដែលនៅសេសសល់មានប្រមាណ ៤ម៉ឺនហិកតារ។
មន្ត្រីសម្របសម្រួលសមាគមអាដហុក (ADHOC) ខេត្តបាត់ដំបង លោក យិន ម៉េងលី លើកឡើងថា តំបន់មួយនេះ បើនិយាយតាមផ្លូវច្បាប់ គឺជាដែនគ្រប់គ្រង ឬទទួលខុសត្រូវរបស់រដ្ឋដែលមានមន្ត្រីតាមស្ថាប័នពាក់ព័ន្ធនីមួយៗ ជាអ្នកមើលការខុសត្រូវ ហើយមិនអាចបុគ្គលណាម្នាក់យកធ្វើជាកម្មសិទ្ធិបានទេ។ លោកថា មន្ត្រីដែលមានតួនាទីទប់ស្កាត់ការទន្ទ្រានព្រៃឈើតំបន់អភិរក្សបែរជាឃុបឃិតបំផ្លិចបំផ្លាញទៅវិញនោះ គឺជាអំពើផ្ទុយទៅនឹងការប្ដេជ្ញាចិត្តរបស់រាជរដ្ឋាភិបាល៖ «ប្រឆាំងរដ្ឋាភិបាល ព្រោះរាជរដ្ឋាភិបាលបានប្ដេជ្ញាប្រឆាំងឧក្រិដ្ឋកម្មព្រៃឈើ ប្រឆាំងឧក្រិដ្ឋកម្មផ្សេងៗទៀត បែរនាំគ្នាបំផ្លិចបំផ្លាញ អ៊ីចឹងមានន័យថា កំពុងប្រឆាំងរាជរដ្ឋាភិបាល ហើយអ្នកទាំងអស់នេះត្រូវមានទោស»។
មន្ត្រីសង្គមស៊ីវិលរូបនេះស្នើឱ្យរាជរដ្ឋាភិបាលអនុវត្តច្បាប់ឱ្យបានស្មើភាពគ្នា ជៀសវាងអនុវត្តបានចំពោះតែពលរដ្ឋក្រីក្រ ទន់ខ្សោយ ហើយមន្ត្រីធំៗ និងមានអំណាច ឬជនល្មើសដែលជាប់ពាក់ព័ន្ធ មន្ត្រីខិលខូចមួយចំនួនដែលបានបំផ្លិចបំផ្លាញធនធានធម្មជាតិទ្រង់ទ្រាយធំ បែរជាគ្មានការផ្ដន្ទាទោស។ ការអនុវត្តច្បាប់ដែលមានស្តង់ដារពីរបែបនេះ លោកថា មិនមែនជាប្រទេសនីតិរដ្ឋទេ៕