Clik here to view.
ប្រជាសហគមន៍ នៅតាមតំបន់មួយចំនួនក្នុងខេត្តត្បូងឃ្មុំ លើកឡើងពីបញ្ហាប្រឈមផ្សេងៗ ក្នុងការប្រកបមុខរបរប្រចាំថ្ងៃ ដោយសារអស្ថិរភាពនយោបាយ។ ការលើកឡើងនេះ ដោយសារអាជីវកម្ម តម្លៃផលិតផលកសិកម្មរបស់ពួកគាត់ រដ្ឋមិនសូវបានគិតគូរនោះឡើយ។ ពលរដ្ឋអះអាងថា បញ្ហាទាំងនេះកើតឡើង ចាប់តាំងពីមានការចាប់ខ្លួនមេបក្សប្រឆាំង ហើយឈានដល់ការរំលាយគណបក្សសង្គ្រោះជាតិមក។
ប្រជាសហគមន៍រស់នៅក្នុងស្រុកមេមត់ បារម្ភថា ប្រសិនបើស្ថានភាពនយោបាយគ្មានលំនឹង ហើយមានសភាពអាក្រក់បែបនេះ មិនបានវិលត្រឡប់ទៅរកភាពប្រសើរវិញទេ ថ្ងៃក្រោយទៅ ពលរដ្ឋនឹងកាន់តែពិបាករស់នៅ ពិសេសពិបាកក្នុងការប្រកបមុខរបរប្រចាំថ្ងៃតែម្ដង។
ពួកគាត់អះអាងថា មិនត្រឹមតែការប្រកបមុខរបរជួបការលំបាកប៉ុណ្ណោះទេ ប៉ុន្តែសូម្បីស្ថានភាពសន្តិសុខផ្ទាល់ខ្លួន ពេលខ្លះក៏ត្រូវប្រឈម ឬភិតភ័យដោយសារមានការឃ្លាំមើលពីសំណាក់អាជ្ញាធរមូលដ្ឋាន។
អាជីវករលក់ដូរគ្រឿងទេសនៅឃុំត្រមូង ម្នាក់ថ្លែងក្នុងលក្ខខណ្ឌមិនបញ្ចេញឈ្មោះនិយាយថា ការលក់ដូរទំនិញរបស់ពួកគាត់បច្ចុប្បន្នត្រូវប្រឈមបញ្ហាផ្សេងៗ ដោយសារលក់មិនដាច់។ ជាក់ស្ដែងកាលពីមុនមានការចាប់ខ្លួនប្រធានគណបក្សសង្គ្រោះជាតិ និងមុនការរំលាយគណបក្សប្រឆាំងមួយនេះ លោកអាចលក់បានជាង ២០ម៉ឺន ទៅ ៣០ម៉ឺនរៀលក្នុងមួយថ្ងៃ ប៉ុន្តែបច្ចុប្បន្នលក់មិនបាន ១០ម៉ឺនរៀលផងក្នុងមួយថ្ងៃ។ ប្រភពដដែល អះអាងទៀតថា បញ្ហានេះមិនមែនកើតឡើងចំពោះគ្រួសារលោកនោះទេ ប៉ុន្តែអាជីវករក្នុងផ្សារមេមត់ ព្រមទាំងប្រជាកសិករផង ក៏បានត្អូញត្អែរពីស្ថានភាពលំបាកនេះដែរ៖ «បញ្ហាហ្នឹងវាធំ តែម្ដងរឿងនយោបាយហ្នឹងធំហ្មង។ អាហ្នឹងគេមិនទាន់ផ្ដាច់សេដ្ឋកិច្ចអីផង ប៉ុណ្ណឹង ទម្រាំគេផ្ដាច់ទៀតទៅជាយ៉ាងណា?»។
វិបត្តិនយោបាយក្នុងប្រទេសកម្ពុជា ចាប់ផ្ដើមកើតឡើងខ្លាំងក្រោយពេលរដ្ឋាភិបាលបំបាត់សំឡេងឯករាជ្យ ហើយកម្លាំងសមត្ថកិច្ចបានចាប់ខ្លួនប្រធានគណបក្សសង្គ្រោះជាតិ លោក កឹម សុខា កាលពីថ្ងៃទី៣ កញ្ញា ដោយចោទប្រកាន់ពីបទក្បត់ជាតិ តាមប្រសាសន៍លោកនាយករដ្ឋមន្ត្រី ហ៊ុន សែន។ ចុងក្រោយ គឺការចាប់ខ្លួនអតីតបុគ្គលិកអាស៊ីសេរីពីររូប និងការរំលាយចោលគណបក្សសង្គ្រោះជាតិ ដែលជាគណបក្សប្រឆាំងដ៏ធំជាងគេនៅកម្ពុជា ហើយហាមឃាត់មន្ត្រីគណបក្សមួយនេះជាង ១០០រូបមិនឱ្យធ្វើនយោបាយរយៈពេល៥ឆ្នាំ ព្រមទាំងយកអាសនៈតំណាងរាស្ត្រ និង អាសនៈថ្នាក់ក្រោមជាតិ ទៅបែងចែកឱ្យគណបក្សផ្សេងទៀត។
ប្រជាសហគមន៍មួយរូបទៀត រៀបរាប់ថា ខ្សែចង្វាក់ផលិតកម្ម ឬសេដ្ឋកិច្ចនៅមូលដ្ឋានរបស់គាត់គឺដំណើរការមិនបានល្អ ដូចកាលពីមិនទាន់ចាប់មេគណបក្សប្រឆាំង និងរំលាយគណបក្សមួយនេះទេ។ លោកបន្ថែមថា ផលិតផលកសិកម្មរបស់ពលរដ្ឋ ដូចជា ដំឡូង ពោត ជ័រកៅស៊ូ ចុះថោកបណ្ដាលឱ្យពួកគាត់បាត់បង់ប្រាក់ចំណូល ដូច្នេះការចាយវាយក៏មិនដូចកាលពីមុនដែរ។ លើសពីនេះ លោកសង្កេតឃើញថា ការបញ្ចេញមតិ និងការដើរហើររបស់ពលរដ្ឋ គឺមានការព្រួយបារម្ភពីសុវត្ថិភាពផ្ទាល់ខ្លួនច្រើនជាងកាលពីមុន៖ «សម្រាប់ខ្ញុំៗ ព្រួយបារម្ភខ្លាំងមែនទែន សម្រាប់សុវត្ថិភាព ពិសេសជាងគេប្រជាពលរដ្ឋដែលហ៊ានបញ្ចេញមតិរិះគន់ទៅលើមន្ត្រីរាជរដ្ឋាភិបាល និងរិះគន់ទៅលើសង្គម និងមានការគំរាមកំហែងដល់អាយុជីវិត និងការចាប់ដាក់គុកជាដើម»។
ទាក់ទងបញ្ហានេះ អភិបាលស្រុកមេមត់ លោក ចេង ប៊ុណ្ណារ៉ា មិនទាន់ឆ្លើយតបយ៉ាងណានៅឡើយដោយលោកថាជាប់រវល់ ហើយចុចផ្ដាច់ទូរស័ព្ទតែម្ដង។
កន្លងមក លោកនាយករដ្ឋមន្ត្រី ហ៊ុន សែន ធ្លាប់អះអាងថា ប្រទេសកម្ពុជា គ្មានវិបត្តិនយោបាយទេ គឺមានតែអ្នកនយោបាយមានវិបត្តិប៉ុណ្ណោះ។ ជាងនេះទៀត លោកបានរុញការទទួលខុសត្រូវទៅឱ្យគណបក្សប្រឆាំង នៅពេលបរទេសដាក់ទណ្ឌកម្មសេដ្ឋកិច្ចមកលើប្រទេសកម្ពុជាទៀតផង។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បញ្ហាប្រឈមទាំងនេះពិតជាកើតឡើងចំពោះកសិករ និងអាជីវករ ព្រមទាំងអ្នកវិនិយោគក្នុងការរកស៊ីប្រចាំថ្ងៃប្រាកដមែន ដោយសារតែវិបត្តិនយោបាយនៅកម្ពុជាបច្ចុប្បន្ន។ ជាងនេះទៀត បញ្ហាប្រឈមនឹងកាន់តែកើនឡើង ពិសេសកសិករដែលជំពាក់បំណុលធនាគារ ឬគ្រឹះស្ថានហិរញ្ញវត្ថុតែម្ដង៖ «មួយវិញទៀតអ្នកជំនួញគ្រប់ប្រភេទ ចង់មិនចង់ នៅពេលគាត់ឃើញស្ថានភាពនយោបាយមិនសូវល្អ ក៏ដូចជាទំនាស់នយោបាយកើតឡើង គាត់មិនសូវហ៊ានវិនិយោគ ឬក៏មិនសូវហ៊ានទិញដែរ ពីព្រោះខ្លាចមានបញ្ហាដោយប្រការណាមួយ»។
មន្ត្រីសង្គមស៊ីវិលដដែលបារម្ភថា ប្រសិនបើស្ថានភាពនេះ មិនបានវិលត្រឡប់ទៅរកភាពប្រសើរទេ ការដាក់ទណ្ឌកម្មសេដ្ឋកិច្ចនឹងកើតមានសម្រាប់កម្ពុជា ពីសំណាក់បណ្ដាប្រទេសដែលបញ្ជាទិញផលិតផលពីស្រុកខ្មែរ។ លោកយល់ថា ដើម្បីដោះស្រាយបញ្ហានេះ រាជរដ្ឋាភិបាលត្រូវកែសម្រួលបរិយាកាសនយោបាយនិង រក្សាទំនាក់ទំនងការទូតឱ្យបានប្រសើរឡើងវិញ។ លើកទឹកចិត្តដល់កសិករ និងគាំទ្រដល់ពួកគាត់ក្នុងការរកទីផ្សារលក់ផលិតផល ព្រមទាំងបង្កើនថវិកាជាតិលើវិស័យកសិកម្មដើម្បីជួយកសិករ ពិសេសធានាសន្តិសុខក្នុងការរស់នៅជូនពលរដ្ឋ៕