Clik here to view.
សមាគមអ្នកចិញ្ចឹមជ្រូកនៅកម្ពុជាបារម្ភថា កសិដ្ឋាន និងការចិញ្ចឹមជ្រូកតាមទ្រុងជាលក្ខណៈគ្រួសារ របស់ពលរដ្ឋកម្ពុជា ប្រឈមការបិទទ្វារ ការខាតបង់ខ្ពស់ ដោយសារបច្ចុប្បន្នការនាំចូលសាច់ជ្រូកយ៉ាងអនាធិបតេយ្យពីប្រទេសជិតខាង ពិសេសគឺការនាំចូលជ្រូកពីប្រទេសវៀតណាម។
ក្រុមអ្នកចិញ្ចឹមជ្រូក ត្អូញត្អែរថា ជ្រូកដែលពួកគាត់ចិញ្ចឹមបាន គ្មានទីផ្សារ សម្រាប់លក់នៅក្នុងស្រុកនោះទេ ដោយសារ ការនាំចូលជ្រូកពីប្រទេសជិតខាង ចូលមកកម្ពុជា គ្មានអាជ្ញាប័ណ្ណ និងគ្មានការត្រួតពិនិត្យត្រឹមត្រូវ ដែលនាំឲ្យជ្រូកក្នុងស្រុកគ្មានទីផ្សារសម្រាប់លក់។
តំណាងប្រជាពលរដ្ឋក្រុមអ្នកចិញ្ចឹមជ្រូកលក្ខណៈគ្រួសារ អ្នកស្រី ឃួន ណារី បានរៀបរាប់ នៅព្រឹកថ្ងៃទី៤ ធ្នូថា បច្ចុប្បន្ននេះ ពួកគាត់ជាអ្នកចិញ្ចឹមជ្រូក ខាតដើមស្ទើរតែរាល់ថ្ងៃ ដោយសារតែជ្រូក មានតែតម្លៃជាង ៥ពាន់រៀលក្នុង១គីឡូ។ តម្លៃនេះ អ្នកចិញ្ចឹមជ្រូក អះអាងថា ធ្វើឲ្យពួកគាត់ខាតដើម ក្នុងជ្រូកមួយក្បាលពី ១០ម៉ឺន ទៅ១៥ម៉ឺនរៀល។ អ្នកស្រីអះអាងថា បើទោះជាដឹងថា ខាតដើម ក្រុមអ្នកចិញ្ចឹមជ្រូក គ្មានជម្រើសអ្វីក្រៅពីលក់ ឲ្យឈ្មួញនោះទេ ព្រោះពួកគាត់ នឹងគ្មានលទ្ធផលក្នុងការសងបំណុលធនាគារឡើយ ប្រសិនបើមិនទ្រាំលក់ជ្រូកក្នុងតម្លៃថោកជាងជ្រូក នាំចូលពីប្រទេសវៀតណាមនោះ។ «»
ការលើកឡើងពីកង្វល់របស់ក្រុមអ្នកចិញ្ចឹមជ្រូក ធ្វើឡើងនៅក្នុងសន្និសីទសារព័ត៌មានមួយស្ដីពី «ការនាំចូលដោយអនាធិបតេយ្យ ពីប្រទេសជិតខាង និងផលប៉ះពាល់អ្នកចិញ្ចឹមជ្រូក ដោយសារតម្លៃជ្រូករស់ធ្លាក់ចុះ» នៅទីស្នាក់ការសមាគមអ្នកចិញ្ចឹមសត្វកម្ពុជា ស្ថិតនៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញនាថ្ងៃទី០៤ ខែធ្នូ ឆ្នាំ២០១៧។
អនុប្រធានសមាគមអ្នកចិញ្ចឹមសត្វកម្ពុជា លោក ជេត ភារម្យ អះអាងថា កសិដ្ឋានចិញ្ចឹមជ្រូក ទាំងលក្ខណៈគ្រួសារ និងលក្ខណៈឧស្សាហកម្មនៅកម្ពុជា កំពុងតែប្រឈមមុខ នឹងការបិទទ្វារកសិដ្ឋាន និងជំពាក់បំណុលធនាគារវ័ណ្ឌក ដោយសារការនាំចូលជ្រូកដ៏ច្រើនពីប្រទេសជិតខាង និងតម្លៃជ្រូករស់នៅកម្ពុជាធ្លាក់ថ្លៃខ្លាំង។
លោក ជេត ភារម្យ ព្រមានថា បើនៅតែពុំមានវិធានការឲ្យមានប្រសិទ្ធភាព និងទាន់ពេលវេលា ពីសំណាក់អាជ្ញាធរ ក្នុងការទប់ស្កាត់ ការនាំចូលជ្រូកខុសច្បាប់ ពីប្រទេសជិតខាង មកលក់ក្នុងប្រទេសកម្ពុជានោះទេ កសិដ្ឋានចិញ្ចឹមជ្រូក ជាច្រើននៅកម្ពុជានឹងត្រូវបិទទ្វារជាបន្តបន្ទាប់។ អនុប្រធានសមាគមអ្នកចិញ្ចឹមសត្វ អះអាងថា ជ្រូកនៅកម្ពុជា មានគុណភាព មិនចាញ់ជ្រូកនាំចូលនោះទេ។ «»
សមាគមអ្នកចិញ្ចឹមជ្រូកកម្ពុជាអះអាងថា បានផ្ញើលិខិតជាបន្តបន្ទាប់ទៅក្រសួងកសិកម្ម អគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វជាដើម ដើម្បីជួបទប់ស្កាត់ការនាំចូលជ្រូក ពីប្រទេសជិតខាង ខណៈដែលសមាគមមួយនេះ រកឃើញថា ជ្រូកដែលនាំចូលរាល់ថ្ងៃ លើសពីគោលការកំណត់របស់ក្រសួងកសិកម្ម ដោយកំណត់ត្រឹម ១.២៥០ក្បាលក្នុង១ថ្ងៃ។ ប៉ុន្តែ លិខិតទាំងនោះ ហាក់មិនមានប្រសិទ្ធភាពនោះទេ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីថ្ងៃទី២៥ ខែមេសា ឆ្នាំ២០១៧ បានដាក់ចេញនូវលក្ខខណ្ឌចំនួន ៦ចំណុច សម្រាប់ឲ្យក្រុមហ៊ុន និងអាជីវករ នាំចូលសត្វរស់ សាច់សត្វ និងផលិតផលសត្វ ដើម្បីផ្គត់ផ្គង់ទីផ្សារកម្ពុជា ទប់ស្កាត់លំហូរសត្វ និងសាច់សត្វពីក្រៅប្រទេស ចំនួន ៦លក្ខខណ្ឌដូចជា៖ ត្រូវជាក្រុមហ៊ុនស្របច្បាប់ ដែលបានចុះបញ្ជីពាណិជ្ជកម្ម និងមានប័ណ្ណប៉ាតង់នៅមានសុពលភាព។ ត្រូវមានទីតាំងប្រមូលផ្តុំ សត្វនៅចំណុចដើមទី និងចំណុចចុងទី ដែលទទួលស្គាល់ដោយសមត្ថកិច្ចជំនាញ នៃក្រសួងកសិកម្ម រុក្ខាប្រមាញ់ និងនេសាទ។ ត្រូវមានកិច្ចសន្យាផ្គត់ផ្គង់សត្វរស់ ឬសាច់សត្វ ឬផលិតផលសត្វពីកសិដ្ឋាន ឬក្រុមហ៊ុនស្របច្បាប់ នៃប្រទេសនាំចេញ។ ត្រូវអនុវត្តតាមប្រកាស ចុះថ្ងៃទី២៣ ខែមិថុនា ឆ្នាំ២០០៨ ស្ដីពីបែបបទ នៃការត្រួតពិនិត្យអនាម័យសត្វ និងផលិតផលមានដើមកំណើត ពីសត្វក្នុងស្រុក។ ត្រូវចុះកិច្ចសន្យាបច្ចេកទេសជាមួយអគ្គនាយកដ្ឋានសុខភាពសត្វ និងផលិតកម្មសត្វ និងត្រូវធានាអនុវត្ត កិច្ចសន្យានេះ ឲ្យបានត្រឹមត្រូវតាមស្តង់ដារបច្ចេកទេស។ ត្រូវដាក់ពាក្យស្នើសុំត្រួតពិនិត្យប្រភពដើមនៃសត្វរស់ សាច់សត្វ និងផលិតផលសត្វ។
អ្នកជំនាញផ្នែកកសិកម្ម លោកបណ្ឌិត យ៉ង សាំងកុមារ ទទួលស្គាល់ថា ជ្រូកនៅក្នុងស្រុកធ្លាក់ថ្លៃ គឺដោយសារតែលំហូរចូលនៃជ្រូកនាំចូលពីប្រទេសជិតខាងច្រើនពេក។ អ្នកជំនាញផ្នែកកសិកម្មរូបនេះ ថា រដ្ឋាភិបាលគួរប្រើយុទ្ធសាស្ត្រដៃម្ខាងបិទការនាំចូលជ្រូកពីក្រៅប្រទេស ដៃម្ខាងទៀតគឺការបំពេញផ្គត់ផ្គង់តម្រូវការក្នុងស្រុក ឲ្យបានគ្រប់គ្រាន់។ «»
ក្រុមអ្នកចិញ្ចឹមជ្រូកអះអាងថា ប្រសិនបើរដ្ឋាភិបាលមានវិធានការរឹតបន្តឹងការនាំចូលជ្រូក ពួកគេមានលទ្ធភាពគ្រប់គ្រាន់ ក្នុងការចិញ្ចឹមជ្រូក ផ្គត់ផ្គង់ទីផ្សារក្នុងស្រុក៕