Clik here to view.
ពលរដ្ឋខ្មែរក្នុងប្រទេសអូស្ត្រាលីប្រមាណពី ៤០០ ទៅ ៥០០នាក់ គ្រោងធ្វើមហាបាតុកម្មមួយនៅថ្ងៃទី៥ ខែធ្នូ នៅខាងមុខអាគារវិមានរដ្ឋសភារបស់ប្រទេសអូស្ត្រាលី ក្នុងរដ្ឋធានីកង់ប៊ែររ៉ា (Canberra) ដើម្បីជំរុញឲ្យរដ្ឋាភិបាល របស់ប្រទេសមួយនេះ ស្វែងរកការដោះលែងលោក កឹម សុខា និងដាក់សម្ពាធដល់រដ្ឋាភិបាលក្រុងភ្នំពេញ ឲ្យគោរពកិច្ចព្រមព្រៀងសន្តិភាពទីក្រុងប៉ារីស។
លោក ជា យូហ៊ន ប្រធានសហព័ន្ធខ្មែរអូស្ត្រាលីសាជីវកម្ម និងជាអភិបាលក្រុងគ្រីត ដង់ដឺណង់ (Great Dangdenong) នៃរដ្ឋវីតូរីយ៉ា (Victoria) ដែលទើបជាប់ឆ្នោតថ្មី ថ្លែងប្រាប់អាស៊ីសេរី កាលពីថ្ងៃទី៣ ខែធ្នូ ថា សហព័ន្ធរបស់លោកជាអ្នកដឹកនាំធ្វើបាតុកម្មនេះដោយផ្ទាល់។
លោក ជា យូហ៊ន ជឿជាក់ថា ស្ថានការណ៍នយោបាយក្នុងប្រទេសកម្ពុជា នឹងមានភាពប្រែប្រួល ប្រសិនបើមានសម្ពាធពីរដ្ឋាភិបាលប្រទេសម្ចាស់ជំនួយធំៗ រួមទាំងប្រទេសអូស្ត្រាលីជាដើម ដោយតម្រូវឲ្យរដ្ឋាភិបាលក្រុងភ្នំពេញ ដោះលែងប្រធានគណបក្សសង្គ្រោះជាតិ លោក កឹម សុខា គោរពកិច្ចព្រមព្រៀងក្រុងប៉ារីស និងធានាឲ្យបាននូវការគោរពលទ្ធិប្រជាធិបតេយ្យ តាមរយៈការបោះឆ្នោតដោយសេរី យុត្តិធម៌ ត្រឹមត្រូវ និងសុច្ចរិត។ ក្រៅពីនោះ លោកក៏ទាមទារឲ្យមានការបង្កកទ្រព្យសម្បត្តិរបស់មន្ត្រីពុករលួយ និងក្រុមគ្រួសារសាច់ញាតិរបស់ក្រុមមន្ត្រីខិលខូចទាំងនោះ ដែលយកលុយមកបណ្ដាក់ទុន ឬរកស៊ីក្នុងប្រទេសអូស្ត្រាលីនេះ។ «»
លោក ជា យូហ៊ន បន្តថា ការធ្វើបាតុកម្មនេះ នឹងក្លាយជាសារមួយប្រាប់ដល់សភាសហព័ន្ធអូស្ត្រាលី ឲ្យពិចារណារាល់ការទាមទារទាំងនេះ ហើយតម្រូវឲ្យរដ្ឋាភិបាលអូស្ត្រាលី អនុវត្តនូវការដាក់វិធានការណ៍ជាទណ្ឌកម្មជាក់ស្ដែងនានា ក្នុងគោលនយោបាយការបរទេសរបស់ខ្លួននាពេលខាងមុខនេះ។
លោក ជា យូហ៊ន អំពាវនាវឲ្យបងប្អូនជនរួមជាតិខ្មែរទាំងអស់ ដែលកំពុងរស់នៅតាមបណ្ដារដ្ឋនានាក្នុងប្រទេសអូស្ត្រាលី ចូលរួមក្នុងបាតុកម្មនេះឲ្យបានច្រើនកុះករ ដោយត្រូវមកចុះឈ្មោះនៅទីស្នាក់ការសមាគមខ្មែរ ដែលមានអាសយដ្ឋានលេខ 52 Queens Ave, ទីក្រុង ស្ព្រីងវែល (Springvale) រដ្ឋវិចតូរីយ៉ា។ លោកថា ក្រុមបាតុករនឹងធ្វើដំណើរដោយរថយន្តចេញពីវត្តពុទ្ធរង្សី មែលប៊ន នៅយប់ថ្ងៃចន្ទ ទី៤ ខែធ្នូនេះ៕
សូមស្ដាប់បទសម្ភាសន៍បន្ថែមរបស់លោក តាំង សារ៉ាដា និងលោក ជា យូហ៊ន ដូចតទៅ៖
ស្ដាប់សំឡេង
