ស្វាមីរបស់ស្ត្រីដែលស្លាប់ពេលសម្រាលកូន នៅមន្ទីរពេទ្យស្រលាញ់ទារក ឬពេទ្យជប៉ុន ទទូចឲ្យសាលាដំបូងរាជធានីភ្នំពេញ បើកសវនាការលើបណ្ដឹងរបស់លោក ដែលបានប្ដឹងអ្នកដឹកនាំមន្ទីរពេទ្យជប៉ុនឲ្យបានឆាប់។
លោក ជូ ភារ៉ា អះអាងថា ចាប់តាំងពីលោកដាក់ពាក្យបណ្ដឹង ក្រោយពេលប្រពន្ធ និងកូនស្លាប់ ជាងកន្លះឆ្នាំមកនេះ សាលាដំបូងរាជធានីភ្នំពេញ មិនទាន់បានបើកសវនាការនោះទេ។ លោកទាមទារឲ្យសាលាដំបូងក្រុងភ្នំពេញ កោះហៅចុងចោទតទល់គ្នាជាមួយលោក នៅក្នុងសវនាការ ដើម្បីស្វែងរកយុត្តិធម៌ជូនប្រពន្ធ និងកូនស្រី ដែលស្លាប់នៅក្នុងផ្ទៃម្ដាយ ព្រោះតែការធ្វេសប្រហែលរបស់ក្រុមគ្រូពេទ្យ និងភាពមិនទទួលខុសត្រូវរបស់អ្នកដឹកនាំនៃមន្ទីរពេទ្យជប៉ុន។ «»
កម្មការិនីរោងចក្រកាត់ដេរ ឈ្មោះ ឈា សារិន ហៅស្រីមុំ បានស្លាប់នៅពេលសម្រាលកូនស្រីដែលជាកូនទី៣ កាលពីព្រលប់ថ្ងៃទី២៨ ខែឧសភា នៅបន្ទប់សម្រាលកូន នៃមន្ទីរពេទ្យស្រលាញ់ទារក ឬហៅពេទ្យជប៉ុន។ ស្វាមីសព គឺ លោក ជូ ភារ៉ា អះអាងថា លោកបានឃើញផ្ទាល់ភ្នែកថា មានគ្រូពេទ្យម្នាក់បានលូកដៃបង្កើតកូនលោក តែបែរជាប្រពន្ធរបស់លោកធ្លាក់ឈាម ហើយ ៥នាទីក្រោយមក ប្រពន្ធលោកបានស្លាប់នៅលើគ្រែសម្រាលទាំងមិនទាន់បានសម្រាលកូន។
លោក ជូ ភារ៉ា រំលឹកថា នៅពេលប្រពន្ធ និងកូនលោកស្លាប់ ក្រុមគ្រូពេទ្យនាំគ្នាផ្អើលឆោឡោ ដោយ ស្ត្រីជាគ្រូពេទ្យម្នាក់ ដែលបានប្រើពាក្យអសុរោះពេលបង្កើតកូនឲ្យប្រពន្ធលោក បានរត់គេចនៅពេលឆោឡោនោះ ខណៈលោកមិនអាចធ្វើអ្វីបានក្រៅពីឱបសពប្រពន្ធ ហើយស្រែកយំនោះទេ។ ក្រុមគ្រូពេទ្យក្មេងៗ បានរុញសពប្រពន្ធលោកទៅបន្ទប់សង្គ្រោះបន្ទាន់ ហើយប្រហែលកន្លះម៉ោងក្រោយមក ទើបមានវេជ្ជបណ្ឌិតមកពិនិត្យសពប្រពន្ធលោក និងបានប្រាប់លោកថា ប្រពន្ធ និងកូនស្លាប់ហើយ រួចវេជ្ជបណ្ឌិតម្នាក់នោះក៏បានដើរចេញទៅ។ លោកថា លោកទន់ដៃទន់ជើង តក់ស្លុក មិនអាចធ្វើអ្វីបាន ក្រៅពីយំឱបសពប្រពន្ធស្លាប់ទាំងពោះធំកាន់តែខ្លាំងទៅៗ។ ក្រោយមក ខាងមន្ទីរពេទ្យគ្រាន់ប្រាប់លោកថា ប្រពន្ធលោកមានជំងឺម្យ៉ាងដែលមិនអាចសង្គ្រោះបាន ទោះជានៅអាមេរិក ក៏មិនអាចសង្គ្រោះបានដែរ។
ប៉ុន្មានថ្ងៃក្រោយមក ក្រសួងសុខាភិបាលបានចេញសេចក្តីបំភ្លឺមួយ ដោយអះអាងថា ករណីនោះ ជាឧបទ្ទវហេតុ ដែលក្រុមគ្រូពេទ្យបានជួយសង្គ្រោះអស់ពីសមត្ថភាពរបស់គ្រូពេទ្យ។ ប៉ុន្តែស្វាមីសព ដែលឃើញហេតុការណ៍នោះផ្ទាល់ បដិសេធមិនទទួលយកសេចក្ដីបំភ្លឺរបស់ក្រសួងសុខាភិបាល និងបានហៅសេចក្ដីបំភ្លឺនោះថា គ្រាន់ជាលេសយករួចខ្លួន ដើម្បីគេចវេសពីភាពមិនទទួលខុសត្រូវ និងការខ្ជីខ្ជារបស់ក្រុមគ្រូពេទ្យនៅមន្ទីរពេទ្យជប៉ុន។
នាយិកាប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា អ្នកស្រី រស់ សុភាព ធ្លាប់ប្រាប់អាស៊ីសេរីថា មន្ទីរពេទ្យជប៉ុន ជាមន្ទីរពេទ្យលំដាប់នៅកម្ពុជា ដូច្នេះថ្នាក់ដឹកនាំ និងក្រុមគ្រូពេទ្យដែលចូលរួមបង្កើតកូនឲ្យកម្មការិនី ឈា សារិន គួរតែចេញមុខបកស្រាយ និងព្យាយាមពន្យល់ពីបច្ចេកទេសដល់ក្រុមគ្រួសារសព បើទោះជាគ្រូពេទ្យអាចយល់ថា ចំណេះដឹងរបស់ពលរដ្ឋមិនសូវយល់ពីបច្ចេកទេសសុខាភិបាលក៏ដោយ។ អ្នកស្រី រស់ សុភាព បញ្ជាក់ថា ទាំងអ្នកស្រី និងពលរដ្ឋ សុទ្ធតែមើលឃើញថា អ្នកក្រីក្រមិនសូវទទួលបានការយកចិត្តទុកដាក់ដិតដល់ ពីមន្ទីរពេទ្យរដ្ឋនោះទេ ហើយចំណុចខ្វះខាតខ្លាំង គឺគ្រូពេទ្យខ្លះច្រើនតែនាំគ្នាបិទបាំងបន្ថែមទៀត ទើបធ្វើឲ្យករណីស្លាប់អ្នកជំងឺនៅតែកើតមាន។ «»
ចំណែកនាយិកាអង្គការសីលការ អ្នកស្រី ធីតា ឃិះ យល់ថា ករណីនេះ ដើម្បីកុំឲ្យបន្តខូចឈ្មោះ របស់មន្ទីរពេទ្យ ឬគ្រូពេទ្យនោះ អ្នកទទួលខុសត្រូវនៃមន្ទីរពេទ្យ គួរតែចេញមុខពន្យល់ឲ្យក្រុមគ្រួសារអស់ចិត្ត។ «»
ស្វាមីរបស់សពកម្មការិនីរងគ្រោះអះអាងថា ក្រុមគ្រួសារនៅតែរង់ចាំការជជែកគ្នាជាមួយថ្នាក់ដឹកនាំនៃមន្ទីរពេទ្យជប៉ុន ដើម្បីទទួលបានហេតុផលដ៏សមស្របមួយ ដែលស្វាមី និងក្រុមគ្រួសារអាចទទួលយកបាន។ ប៉ុន្តែ រហូតមកដល់ថ្ងៃនេះ ពួកគេហាក់អស់សង្ឃឹមនឹងភាពទទួលខុសត្រូវរបស់ក្រុមគ្រូពេទ្យនៃមន្ទីរពេទ្យជប៉ុន ដោយសារ គ្មានថ្នាក់ដឹកនាំណាម្នាក់ ចេញមុនពន្យល់ក្រុមគ្រួសារសពនោះទេ គឺមានតែយករួចខ្លួន បើទោះជាប្រពន្ធ និងកូនត្រូវស្លាប់ យ៉ាងអាណោចអាធ័ម។ ស្វាមីសព លោក ជូ ភារ៉ា ថា មកដល់ថ្ងៃនេះ លោកសង្ឃឹមតែទៅលើតុលាការក្រុងភ្នំពេញតែប៉ុណ្ណោះ ក្នុងការរកយុត្តិធម៌ឲ្យលោក និងក្រុមគ្រួសារ ប៉ុន្តែលោកថា ជាងកន្លះឆ្នាំកន្លងផុតទៅហើយ មិនឃើញតុលាការកោះហៅលោកសោះ។ លោកថា រាល់ថ្ងៃ លោកចាប់ផ្ដើមសម្រក់ទឹកភ្នែក នៅពេលដែលកូនប្រុសតូចៗទាំងពីរ សួររកម្ដាយវា៕