មន្ត្រីនៅថ្នាក់ក្រោម របស់គណបក្សប្រជាជនកម្ពុជា នៅតែបន្តដើរអូសទាញ និងទិញទឹកចិត្ត ក្រុមប្រឹក្សាឃុំសង្កាត់របស់គណបក្សសង្គ្រោះជាតិ។ អ្នកវិភាគនយោបាយ មើលឃើញថា រូបមន្តដែលគណបក្សកាន់អំណាចកំពុងតែប្រើនេះ អាចនឹងនាំឲ្យមានទំនាស់ផលប្រយោជន៍ នៅក្នុងផ្ទៃក្នុងបក្សទៅវិញទេ។
បើទោះជាប្រធានគណបក្សគ្រប់គ្រងអំណាច បានកំណត់ទុកផ្លូវរស់អោយក្រុមប្រឹក្សាឃុំសង្កាត់ របស់គណបក្សប្រឆាំង គិតត្រឹមថ្ងៃទី២៦ វិច្ឆិកា ក៏សកម្មភាពអូសទាញ ឲ្យចុះចូលជាមួយនឹងគណបក្សប្រជាជនកម្ពុជានេះ នៅតែបន្តកើតឡើងនៅឡើយនៅតាមឃុំសង្កាត់ខ្លះ។
តាមរយៈសារបែកធ្លាយ មិនបានសម្រេចពេលថ្មីៗនេះ របស់មន្ត្រីគណបក្សប្រជាជនកម្ពុជា ព្យាយាមល្បួង ប្រធានក្រុមប្រឹក្សាឃុំសង្កាត់របស់បក្សប្រឆាំងនៅខេត្តសៀមរាប ត្រូវបានគេចេញចាយយ៉ាងព្រោងព្រាត នៅលើបណ្ដាញសង្គមហ្វេសប៊ុក (Facebook)។ សំឡេងដែលមានរយៈពេលជិត ៣០នាទី ដែលសន្ទនាបញ្ចុះបញ្ចូល ឲ្យចុះចូលតាមទូរស័ព្ទ ត្រូវបានមន្ត្រីបក្សកាន់អំណាច ដែលមិនត្រូវបានគេស្គាល់ឈ្មោះ ដំឡើងថ្លៃខ្លួនឲ្យបក្សប្រឆាំង រហូតដល់ ២ពាន់ដុល្លារ ឬអាចមានមុខតំណែង ជាមនុស្សដែលចាំជួយផ្ដល់យោបល់ ពីក្រោយខ្នងឲ្យលោក នាយករដ្ឋមន្ត្រី ហ៊ុន សែន ជាដើម៖ «ឥឡូវអ៊ីចេះចង់ចរចា តើអាចចូលរួមនយោបាយជាមួយគណបក្សប្រជាជនកម្ពុជាបានអត់? អូរ អត់ទេអត់បានទេ ខ្ញុំឈប់ធ្វើការហើយ លំបាកពេក។ ពិបាករឿងអីគេ? ចូលគណបក្សប្រជាជនមានផលប្រយោជន៍ច្រើនណាស់ណាពូ។ អ្នកនយោបាយគេអត់ដើរថយក្រោយទេ គេដើរទៅមុខ អត់បានបក្សសង្គ្រោះជាតិ នៅមានបក្សប្រជាជនកម្ពុជាទៀត។ ធ្វើអី បើបក្សប្រជាជនគេមានគ្នាច្រើនហើយតើ។ តែឃើញមេឃុំ ចៅសង្កាត់គណបក្សសង្គ្រោះជាតិល្អៗ ចង់យកមកដាក់គណបក្សប្រជាជនហ្នឹងណា»។
បើទោះជាយ៉ាងណា មន្រ្តីគណបក្សប្រជាជនកម្ពុជា ដែលរងការចោទប្រកាន់ថា ជាអ្នកដើរតួក្នុងការអូសទាញកម្លាំងជើងក្រោម របស់បក្សប្រឆាំងរូបនេះ បានផ្តាច់ទូរស័ព្ទភ្លាមៗ នៅពេលអាស៊ីសេរីសួរទាក់ទងអំពីមូលហេតុនៃពីការទិញទឹកចិត្តនេះ នៅថ្ងៃទី៣ ខែធ្នូ។
សមាជិកក្រុមប្រឹក្សាឃុំសង្កាត់ម្នាក់ ក្នុងចំណោមសមាជិកផ្សេងទៀត របស់គណបក្សសង្គ្រោះជាតិ ប្រចាំខេត្តសៀមរាប ដែលត្រូវបានបក្សប្រជាជនកម្ពុជាទិញទឹកចិត្ត បានព្យាយាមបដិសេធទៅនឹងការអូសទាញអោយចូលបក្សកាន់អំណាចជាច្រើនដង។ មន្ត្រីបក្សប្រឆាំងរូបនេះ អោយដឹងថា ការចូលបក្សកាន់អំណាច មិនមែនជាបំណងរបស់ខ្លួនឡើយ៖ «អត់ចូលទេ អត់ចេះធ្វើជាមួយ។ ម៉េចអ៊ីចឹងវិញ ក្រោមការដឹកនាំរបស់សម្ដេចល្អណាស់ណាពូ។ខ្ញុំមិនទៅទេ ខ្លាចអ្នកស្រុកស្រែកជេរខ្ញុំងាប់។ ខ្លាចអីគេជេរ តែយើងនៅចៅសង្កាត់គេឃើញមុខគេជេរ តែបើឡើងមកទីប្រឹក្សារបស់សម្ដេចមានអីឃើញមុខទៀត។ ទេមិនទៅទេ ឈប់ធ្វើឈប់អីហើយសម្រាកម្ដង»។
នេះពុំមែនជារឿងថ្មីឡើយ សម្រាប់លោក ហ៊ុន សែន ដែលបានដាក់ផែនការ ក្នុងការអូសទាញសមាជិកក្រុមប្រឹក្សាឃុំសង្កាត់ បក្សប្រឆាំង ឲ្យចូលជាមួយបក្សប្រជាជនកម្ពុជា។
ប្រធានគណបក្សកាន់អំណាចរូបនេះ បានដាក់ឱសានវាទត្រឹមថ្ងៃទី២៦ ខែ វិច្ឆិកា ដល់ក្រុមប្រឹក្សាឃុំសង្កាត់ របស់បក្សសង្គ្រោះជាតិ ឲ្យចូលរួមជីវភាពនយោបាយ ជាមួយនឹងបក្សប្រជាជនកម្ពុជា។ ប៉ុន្តែ ផែនការអូសទាញនេះ នៅតែបន្តអនុវត្តនៅឡើយ បើទោះឱសានវាទ របស់លោក ហ៊ុន សែន ដាក់ចេញនេះ បានផុតកំណត់ហើយក្ដី។ កាលពីថ្ងៃទី២៩ ខែវិច្ឆិកា សមាជិកក្រុមប្រឹក្សារបស់បក្សប្រឆាំង ក្នុងខេត្តសៀមរាប មួយចំនួន នៅតែរកឃើញថា បក្សកាន់អំណាច នៅតែដើរអន្ទងទឹកចិត្តនៅឡើយ។
សារបែកធ្លាយ របស់លោក ហ៊ុន សែន ដែលទំនងមើលទៅ អាចធ្វើឡើងនៅក្នុងកិច្ចប្រជុំផ្ទៃក្នុងសម្ងាត់ របស់គណបក្សប្រជាជនកម្ពុជា កាលពីពេលថ្មីៗនេះ បានរៀបចំផែនការ អូសទាញជើងក្រោម របស់បក្សប្រឆាំង ក្រោយរំលាយរួច។ លោក ហ៊ុន សែន បានបង្គាប់ឲ្យមន្ត្រីរបស់ខ្លួន ត្រូវធ្វើកិច្ចការដោយម៉ត់ចត់ ហើយបើរកឃើញ អ្នកដែលអូសទាញបាននោះ ក្បត់បក្សរបស់លោកវិញ នឹងតម្រូវកម្ចាត់ចេញ៖ «ពីមុនគេប្រមូលកម្លាំងគាំទ្រសង្គ្រោះជាតិ។ ឥឡូវត្រូវធ្វើឲ្យពួកគេក្លាយទៅអ្នកប្រមូលកម្លាំងគាំទ្រគណបក្សប្រជាជន ព្រោះពួកគេនៅមានរយៈពេលជិត ៥ឆ្នាំទៀត។ ដូច្នេះពួកគេមិនអាចក្បត់យើងបានទេ បើក្បត់យើងក៏យើងត្រូវដកគេចោលដែរ»។
អ្នកវិភាគមើលឃើញថា ការចុះចូលលើកនេះ ពីក្រុមប្រឹក្សាឃុំសង្កាត់ របស់បក្សប្រឆាំង ខុសពីលើកមុនៗ។ មានអ្នកខ្លះ អាចចុះចូលដោយស្ម័គ្រចិត្ត ប៉ុន្តែទន្ទឹមនឹងនេះ ក៏មានអ្នកខ្លះត្រូវចុះចូលដោយបង្ខំ និងទិញទឹកចិត្តដែរ។
លោកបណ្ឌិត មាស នី អ្នកស្រាវជ្រាវការអភិវឌ្ឍសង្គម យល់ឃើញថា ការព្យាយាមប្រមូលជើងក្រោមពីគណបក្សប្រឆាំងនេះ អាចកើតទំនាស់ផលប្រយោជន៍ ផ្ទៃក្នុងបក្សប្រជាជនកម្ពុជាទៅវិញទេ។ លោកបន្តថា ការផ្ដល់តួនាទី និងមុខតំណែងជាន់គ្នា អាចនាំឲ្យប៉ះពាល់កម្លាំងចិត្តមន្ត្រីចាស់ៗ របស់បក្សកាន់អំណាច ដែលធ្វើការយូរហើយ៖ «បើសិនជាអ្នកចូលទៅនឹងមិនមានឧត្ដមគិតទេ តែទៅដើម្បីលាភសក្ការៈ វានឹងធ្វើឲ្យមានសម្ពាធច្រើនទៅលើគណបក្សប្រជាជន ទាក់ទងនឹងការរកតំណែង ឬតួនាទីអីហ្នឹង។ ហើយបើសិនជាមិនមានតួនាទីអីអោយទេ ពួកគាត់អាចនឹងដូរគំនិតវិញ។ បើមិនដូច្នេះ វាអាចធ្វើឲ្យមានសម្ពាធនៅក្នុងគណបក្ស វាអាចធ្វើឲ្យមានការអាក់អន់ចិត្តរវាងអ្នកនៅខាងក្នុង និងអ្នកចូលទៅពីក្រៅអីអ៊ីចឹងទៅ»។
តាមរយៈសំឡេងបែកធ្លាយរបស់លោកនាយករដ្ឋមន្ត្រី ហ៊ុន សែន នៅក្នុងអំឡុងខែ វិច្ឆិកា មូលហេតុដែលឈានដល់ការកម្ទេចបក្សប្រឆាំង ចេញពីឆាកនយោបាយនេះ ព្រោះតែលោក ហ៊ុន សែន ដឹងជាមុនហើយថា បើទុកដល់ពេលបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ បក្សប្រជាជនកម្ពុជានឹងចាញ់ក្នុងការបោះឆ្នោតនេះ។
ម្យ៉ាងវិញទៀត ការលើកពេល បោះឆ្នោតព្រឹទ្ធសភា ដែលដោះដូរថ្ងៃខែ ពុំមានមូលហេតុជាក់លាក់នេះ អ្នកវិភាគយល់ឃើញថា ដោយសារផែនការអូសទាញ និងទិញទឹកចិត្ត របស់បក្សប្រឆាំង មិនទាន់ឆ្លើយតបទៅតាមផែនការ។ ដំបូងឡើយ លោក ហ៊ុន សែន បានកំណត់បោះឆ្នោតព្រឹទ្ធសភានីតិកាលទី៤នេះ នៅថ្ងៃទី១៥ ខែមករា។ ប៉ុន្តែការកំណត់ថ្ងៃបោះឆ្នោតនេះ មិនបានប៉ុន្មានថ្ងៃស្រួលបួលផង លោក ហ៊ុន សែន ដូរចិត្តវិញភ្លាម ដោយកំណត់យកថ្ងៃទី២៥ ខែកុម្ភៈ ឆ្នាំ២០១៨ វិញ៕