រដ្ឋសភានឹងអនុម័តទទួលស្គាល់សមាជិកគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ចំនួន៣រូបថ្មី នៅថ្ងៃទី៧ ខែធ្នូ ខាងមុខ ដើម្បីជំនួសសមាជិក គ.ជ.បចាស់មកពីគណបក្ស សង្គ្រោះជាតិ ដែលបានលាលែងពីតំណែង ក្រោយរំលាយបក្សប្រឆាំង។ រីឯអ្នកវិភាគ និងអង្គការ សង្គមស៊ីវិល លើកឡើងថា ការតែងតាំងសមាជិកគ.ជ.បថ្មី ក្នុងស្ថានភាពនយោបាយមិនល្អបែបនេះ នឹងនាំឲ្យមានមន្ទិលសង្ស័យអំពីឯករាជ្យភាពរបស់គ.ជ.ប។
ស្ថាប័នគ.ជ.បដែលត្រូវតែជាស្ថាប័នឯករាជ្យ និងអព្យាក្រឹត្យសម្រាប់ធានាឲ្យការបោះឆ្នោតប្រកប ដោយសេរី និងយុត្តិធម៌នោះ កំពុងតែមានបញ្ហាចម្រូងចម្រាស និងបាត់បង់ទំនុកចិត្តពីមជ្ឈដ្ឋានទូទៅ បន្ទាប់ពីសមាជិកគ.ជ.បថ្មី សុទ្ធតែកើតចេញពីរៀបចំ របស់រដ្ឋសភាដែលក្ដោបក្ដាប់ដោយបក្សកាន់អំណាច។
សេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភា នៅថ្ងៃទី៣០ ខែវិច្ឆិកា ឲ្យដឹងថា អង្គប្រជុំបានសម្រេចទទួលយកបេក្ខជនចំនួន៣រូប ដែលមានលក្ខណៈសម្បត្តិគ្រប់គ្រាន់ ក្នុងចំណោមបេក្ខជនដែលបានដាក់ពាក្យសុំឈរឈ្មោះជាបេក្ខជនសមាជិកគ.ជ.ប។ បេក្ខជនសមាជិកគ.ជ.បថ្មីនោះ រួមមានលោក នុត សុខុម កូតាគណបក្សហ៊្វុនស៊ិនប៉ិច ក្លាយជាអនុប្រធាន គ.ជ.ប។ រីឯលោក ហ៊ែល សារ៉ាត់ កូតាគណបក្សសញ្ជាតិកម្ពុជា និងលោក ឌឹម សុវណ្ណារុំ មន្ត្រីទំនាក់ទំនងសាធារណៈនៃសាលាក្តីខ្មែរក្រហម ដែលស្និតនឹងគណបក្សប្រជាជនកម្ពុជានោះ ជាសមាជិក។ អ្នកទាំង៣ នឹងត្រូវរដ្ឋសភា បើកសម័យប្រជុំ នៅថ្ងៃទី៧ ខែធ្នូ ខាងមុខ ដើម្បីអនុម័តផ្ដល់សុពលភាពឲ្យពួកគេចូលបំពេញការងារនៅគ.ជ.ប ជំនួសសមាជិកចាស់ គឺលោក គួយ ប៊ុនរឿន លោក រ៉ុង ឈុន និងអ្នកស្រី តែ ម៉ានីរ៉ុង កូតាគណបក្សសង្គ្រោះជាតិ ដែលបានដាក់ពាក្យលាលែងពីតំណែង ក្រោយតុលាការកំពូលរំលាយគណបក្ស ប្រឆាំងដ៏ធំនៅកម្ពុជា។
អ្នកឃ្លាំមើលការអភិវឌ្ឍសង្គម លោកបណ្ឌិត មាស នី មានប្រសាសន៍ថា ការជ្រើសរើសសមាជិក គ.ជ.បថ្មី ដើម្បីជំនួសសមាជិកដែលលាលែង គឺជាកាតព្វកិច្ចរបស់រដ្ឋាភិបាល ប៉ុន្តែលោកថា ការ ជ្រើសរើសសមាជិកគ.ជ.ប នៅក្នុងស្ថានភាពបែបនេះ វាគ្រាន់តែជ្រើសរើសអោយគ្រប់ចំនួនមនុស្ស តែប៉ុណ្ណោះ ហើយវានឹងបង្កអោយមានការសង្ស័យថែមទៀត ពីសំណាក់ប្រជាពលរដ្ឋទៅលើឯករាជ្យ ភាពរបស់គ.ជ.ប។ «»
លោកបណ្ឌិតមាស នី បន្ថែមថា ការបោះឆ្នោតដោយសេរី និងយុត្តិធម៌ ត្រឹមត្រូវ គឺមិនមែនគិតតែក្នុង ថ្ងៃបោះឆ្នោតនោះទេ ពោលគឺគេវាយតម្លៃតាំងពីមុនបោះឆ្នោតរហូតដល់ក្រោយការបោះឆ្នោត។
កាលពីថ្ងៃទី២០ ខែវិច្ឆិកា សមាជិកជាន់ខ្ពស់នៃស្ថាប័នរៀបចំការបោះឆ្នោត ៣ រូប ក្នុងចំណោម ៤រូប កូតាពីគណបក្សសង្គ្រោះជាតិ គឺលោក រ៉ុង ឈុន អ្នកស្រី តែ ម៉ានីរ៉ុង និងលោក គួយ ប៊ុនរឿន បានលាឈប់ព្រមគ្នា។ ពួកគេលើកឡើងពីមូលហេតុនៃការលាលែងនេះ ដោយសារ ការបើកផ្លូវអោយគ.ជ.ប អនុវត្តការបែងចែកអាសនៈនៃរដ្ឋសភាអាណត្តិទី៥ និងអាសនៈក្រុមប្រឹក្សាឃុំសង្កាត់អាណត្តិទី៤ ឡើងវិញ ដោយយកទៅបែងចែកឲ្យគណបក្សនយោបាយផ្សេងដែលពលរដ្ឋមិនបានបោះឆ្នោតជូន ត្រូវបានមតិសាធារណៈជាតិ និងអន្តរជាតិថា គឺជាការរំលោភរដ្ឋធម្មនុញ្ញ ច្បាប់បោះឆ្នោត និងបទបញ្ជា និងនីតិវិធីនៃការបោះឆ្នោតនៅក្នុងអាណត្តិនីមួយៗ ជាពិសេស គឺជាការរំលោភឆន្ទៈរបស់ប្រជាពលរដ្ឋ ដែលបានបោះឆ្នោតជូនគណបក្សដែលពលរដ្ឋពេញចិត្ត។
កាលពីថ្ងៃទី២២ វិច្ឆិកា លោក ហ៊ុន សែន បានបង្គាប់ឲ្យគ.ជ.ប គួរជ្រើសរើសអនុប្រធានគ.ជ.ប មកពីគណបក្សហ៊្វុនស៊ិនប៉ិច ជំនួសលោក គួយ ប៊ុនរឿន ហើយសមាជិក ២រូបទៀត ត្រូវយកពីគណបក្សសញ្ជាតិកម្ពុជា និងពីស្ថាប័នអង្គការមិនមែនរដ្ឋាភិបាល ជំនួសអោយលោក រ៉ុង ឈុន និងអ្នកស្រី តែ ម៉ានីរ៉ុង។
មន្ត្រីផ្នែកអង្កេតនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ ថា (ខុមហ្វ្រែល) លោក កន សាវាង្ស លើកឡើងថា ការជ្រើសរើសសមាជិកគ.ជ.បថ្មីនេះ ហាក់មិន ស្របនឹងច្បាប់ឡើយ ពីព្រោះយ៉ាងហោចណាស់មន្ត្រី ២រូប ជ្រើសរើសចេញពីគណបក្សមិនជាប់ឆ្នោត។ ម្យ៉ាងទៀត លោកថា នៅមុនពេលនៃការជ្រើសរើសនេះ ក៏មានបញ្ហាដែរ ដោយសារតែមានវិបត្តិនយោបាយកើតឡើង។
ទោះយ៉ាងណា លោកមិនទាន់ហ៊ានវាយតម្លៃយ៉ាងណានៅឡើយទេ អំពីឯករាជ្យភាពគ.ជ.ប នៅពេលនេះ ដោយរង់ចាំមើលការបំពេញការងារនៅពេលខាងមុខ៕