បណ្ដាញអង្គការសាកលដើម្បីការពារ និងលើកកម្ពស់សេរីភាពបញ្ចេញមតិ ហៅកាត់ថា IFEX មានមូលដ្ឋាននៅទីក្រុងតូរ៉ុនតូ ប្រទេសកាណាដា ដែលជាបណ្ដុំអង្គការមិនមែនរដ្ឋាភិបាលចំនួន ១១៩អង្គការ ធ្វើការដើម្បីលើកកម្ពស់ និងការពារសេរីភាពនៃការបញ្ចេញមតិ និងព័ត៌មាននៅទូទាំងពិភពលោក ថ្កោលទោសយ៉ាងខ្លាំងជុំវិញការណ៍ដែលលោកនាយករដ្ឋមន្ត្រី ហ៊ុន សែន បញ្ជាឲ្យក្រសួងមហាផ្ទៃ បើកការស៊ើបអង្កេតដែលអាចឈានទៅរកការបិទមជ្ឈមណ្ឌលសិទ្ធិមនុស្សកម្ពុជា (CCHR)។
ក្នុងសេចក្ដីថ្លែងការណ៍ផ្សាយថ្ងៃទី២៨ ខែវិច្ឆិកា នាយិកាប្រតិបត្តិរបស់អង្គការ IFEX អ្នកស្រី អានី ហ្គេម (Annie Game) ថ្លែងព្រមានថា រាល់ការចោទប្រកាន់នានាប្រឆាំងនឹងមជ្ឈមណ្ឌលសិទ្ធិមនុស្សកម្ពុជា គឺជាផ្នែកមួយនៃនិន្នាការជាសាកលប្រកបដោយល្បិចកលធ្វើឡើងក្នុងគោលដៅដើម្បីធ្វើឲ្យបាត់បង់ទំនុកចិត្តចំពោះការងារស្របច្បាប់របស់ក្រុមអង្គការ ដែលធ្វើការដើម្បីលើកកម្ពស់សេរីភាពនៃការបញ្ចេញមតិសម្រាប់មនុស្សគ្រប់រូប។
អ្នកស្រីបន្តថា ការបិទអង្គការ ដូចជាមជ្ឈមណ្ឌលសិទ្ធិមនុស្សកម្ពុជានេះ នឹងបណ្ដាលឲ្យអន្តរាយដល់ការការពារសិទ្ធិរបស់ពលរដ្ឋកម្ពុជា ស្របពេលដែលពួកគេកំពុងស្ថិតក្រោមការគំរាមកំហែងកាន់តែខ្លាំងឡើងៗ ហើយនឹងអាចឈានទៅដល់ការបង្កើតឲ្យមាននូវបរិយាកាសរឹតត្បិតសេរីភាពសារព័ត៌មាននៅពេលខាងមុខនេះ។ អង្គការ IFEX ថា ចំណាត់ការដោយឥតអៀនខ្មាសនេះ នឹងក្លាយជាសារមួយប្រាប់ទៅពិភពលោកថា ការគាំទ្ររបស់ប្រទេសកម្ពុជា សម្រាប់ការបញ្ចេញមតិ និងការប្រមូលផ្តុំដោយសេរី គឺគ្រាន់តែជាការសន្យាដែលពុំមានមូលដ្ឋានពិតប្រាកដតែប៉ុណ្ណោះ។
សេចក្ដីថ្លែងការណ៍របស់អង្គការដដែលនេះ គូសបញ្ជាក់ថា ដោយសារតែការបោះឆ្នោតជាតិ ឆ្នាំ២០១៨ ខាងមុខនេះ រាល់ចំណាត់ការនានា ប្រឆាំងក្រុមអង្គការសង្គមស៊ីវិល ប្រព័ន្ធផ្សព្វផ្សាយ និងអ្នកនយោបាយគណបក្សប្រឆាំង នឹងត្រូវគេមើលឃើញថា គឺគ្រាន់តែជាផែនការដ៏ហ្មត់ចត់មួយដើម្បីលុបបំបាត់ចោលការងារតាមដាន និងរាយការណ៍អំពីកាតព្វកិច្ចរបស់រដ្ឋាភិបាលក្នុងការលើកកម្ពស់សិទ្ធិរបស់ប្រជាពលរដ្ឋកម្ពុជា និងដើម្បីបំបិទនូវសំឡេងរិះគន់ប្រឆាំងនានាចោលតែម្ដង។
អង្គការ IFEX អំពាវនាវឲ្យរដ្ឋាភិបាល ទម្លាក់ចោលរាល់ការស៊ើបអង្កេតនានា ដែលពុំមានមូលដ្ឋានប្រឆាំងមជ្ឈមណ្ឌលសិទ្ធិមនុស្សកម្ពុជា ហើយត្រូវអនុញ្ញាតឲ្យមជ្ឈមណ្ឌលនេះ អាចបន្តការងារលើកស្ទួយសិទ្ធិមនុស្សដ៏ស្របច្បាប់របស់ខ្លួន ដោយមិនត្រូវមានការជ្រៀតជ្រែកណាមួយឡើយ។
បន្ថែមពីលើនេះ អង្គការ IFEX ក៏បានអំពាវនាវឲ្យសហគមន៍អន្តរជាតិ រួមទាំងអង្គការសហប្រជាជាតិ ក្រុមអង្គការដែលធ្វើការពាក់ព័ន្ធវិស័យសិទ្ធិមនុស្ស ក្រុមប្រទេសម្ចាស់ជំនួយ និងដៃគូពាណិជ្ជកម្ម ជួយការពារមជ្ឈមណ្ឌលសិទ្ធិមនុស្សកម្ពុជា ក៏ដូចជាគោលការណ៍ប្រជាធិបតេយ្យ សេរី ពហុបក្ស ដែលរដ្ឋាភិបាលលោក ហ៊ុន សែន កំពុងព្យាយាមកម្ចាត់ចោលនៅពេលនេះ៕