លោក ហ៊ុន សែន បានប្រកាសជំហរថា លោកនឹងមិនលូកដៃចូលកិច្ចការផ្ទៃក្នុង របស់ស្ថាប័នជាតិរៀបចំការបោះឆ្នោតទេ។ ប៉ុន្តែទន្ទឹមនឹងនេះលោកនាយករដ្ឋមន្ត្រី បានដាក់បញ្ជាទៅប្រធានគណៈកម្មាធិការជាតិរៀបចំការបោះឆ្នោត (គ.ជ.ប) គឺលោក ស៊ិក ប៊ុនហុក ថា មិនត្រូវទទួលយកអតីតមន្ត្រីជាន់ខ្ពស់៣រូប ដែលបានលាឈប់ពីស្ថាប័នជាតិរៀបចំការបោះឆ្នោត កាលពីពេលថ្មីនេះ ចូលបម្រើការឡើងវិញនោះឡើយ។
អ្នកជំនាញខាងកិច្ចការបោះឆ្នោត របស់អង្គការក្រៅរដ្ឋាភិបាលយល់ឃើញថា បើទោះបីជាលោក ហ៊ុន សែន អះអាងថា មិនបានជ្រៀតជ្រែក កិច្ចការផ្ទៃក្នុងរបស់គ.ជ.បក៏ដោយ ប៉ុន្តែនេះជាសារដោយប្រយោលថា លោកបានដាក់គំនាបរួចទៅហើយ ទៅលើរចនាសម្ព័ន្ធផ្ទៃក្នុងរបស់គ.ជ.ប នោះ។
មន្ត្រីជាន់ខ្ពស់នៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ឬហៅកាត់ថាCOMFREL លោក យឿង សុធារា យល់ឃើញថា អ្វីដែលលោក ហ៊ុន សែន លើកឡើងនៅពេលនេះ អាចគ្រាន់តែជាទស្សនៈនៃការបញ្ចេញមតិប៉ុណ្ណោះ។ ប៉ុន្តែគេសង្កេត ឃើញថារាល់សារនយោបាយរបស់លោក ហ៊ុន សែន តែងត្រូវបានគេអនុវត្តគ្រប់ដំណាក់កាល ហើយអនុវត្តដោយមានប្រសិទ្ធភាពថែមទៀត។ «»
លោក ហ៊ុន សែន យូរៗម្ដងបាននិយាយជាសាធារណៈថា គ្មានសេចក្ដីសម្រេចណាមួយដែលធ្វើឡើងដោយគ្មានរូបលោកនោះឡើយ។
សូម្បីតែការចាត់ចែងផ្ទៃក្នុងរបស់បក្សប្រឆាំង ក៏លោក ហ៊ុន សែន ធ្លាប់អះអាងថា ជាស្នាដៃរបស់លោកដែរ។ តាមរយៈវីដេអូ ដែលលោកនាយករដ្ឋមន្ត្រីសរសើរមិនដាច់ពីមាត់ថា គណនីឈ្មោះ សីហា ពូកែលួចថតសំឡេងសន្ទនារបស់លោកជាមួយនឹងលោក កឹម សុខា ក៏លោក ហ៊ុន សែន បង្គាប់ឲ្យអតីតប្រធានគណបក្សប្រឆាំងមួយនេះ ក្បត់លោក សម រង្ស៊ី ដែរហើយសន្យាឲ្យឡើងជាប្រធានបក្សថែមទៀត។
ការចាត់ចែងដ៏ប៉ិនប្រសប់មួយទៀត ក្រោយរដ្ឋប្រហារបង្ហូរឈាមថ្ងៃទី ៥-៦ ខែកក្កដា ឆ្នាំ១៩៩៧ លោក ហ៊ុន សែន បានតែងតាំងឲ្យលោក អ៊ឹង ហួត ធ្វើជានាយករដ្ឋមន្រ្តីទី១ភ្លាម បន្ទាប់ពីកម្ចាត់ទ្រង់ នរោត្តម រណឫទ្ធិ ចេញពីឆាកនយោបាយបានសម្រេច។ ភាពខ្លាំងដែលរងការរិះគន់មិនចេះចប់ របស់ប្រធានគណបក្សប្រជាជនកម្ពុជាមួយនេះ នៅមិនគិតដល់លោកចង់ដកអ្នកណា ឬដាក់អ្នកណានៅក្នុងរដ្ឋសភា និងការចង់កែប្រែច្បាប់ ឬបង្កើតច្បាប់អ្វីក៏បាន ទៅតាមចិត្តលោកនោះនៅឡើយផង។
នៅពេលនេះវិញ លោក ហ៊ុន សែន បានថ្លែងការពារជំហររបស់លោកទុកជាមុនថា លោកនឹងមិនចង់ឲ្យគណបក្សរបស់លោកជាប់ពាក់ព័ន្ធនិងកិច្ចការផ្ទៃក្នុងរបស់គ.ជ.ប ឡើយ។
ថ្លែងនៅចំពោះមុខកម្មករជាច្រើនពាន់នាក់ កាលពីព្រឹកថ្ងៃទី២២ វិច្ឆិកា លោក ហ៊ុន សែន បានប្រាប់ទៅប្រធានគ.ជ.ប គឺលោក ស៊ិក ប៊ុនហុក ថា លោកមិនចង់ឃើញមន្ត្រីសំខាន់ៗ បីរូបដែលជ្រើសចេញពីបក្សប្រឆាំង ហើយលាឈប់ពីស្ថាប័នជាតិរៀបចំការបោះឆ្នោត ចូលមកបម្រើការឡើងវិញឡើយ។
អាស៊ីសេរីពុំអាចសុំប្រតិកម្មចំពោះជុំវិញរឿងនេះបានភ្លាមៗទេ ពីមន្ត្រីគ.ជ.ប នៅថ្ងៃទី២២ ខែវិច្ឆិកា។ប៉ុន្តែអតីតមន្ត្រីជាន់ខ្ពស់ម្នាក់ដែលជ្រើសចេញពីកូតាបក្សប្រឆាំងគឺលោក រ៉ុង ឈុន អះអាងថា មុននឹងចេញពីស្ថាប័នជាតិមួយនេះ គឺលោក និងមន្ត្រីដទៃទៀតបានគិតច្បាស់ណាស់ ថាលោកនឹងមិនត្រឡប់ថយក្រោយវិញនោះឡើយ។ ម្យ៉ាងទៀត ចាកចេញនេះ គឺជាការគោរពឆន្ទៈរបស់ពលរដ្ឋ ដែលមានជាង ៣លាននាក់ ហើយត្រូវបានបក្សកាន់អំណាចបំផ្លាញចោល។
អតីតប្រធានសមាគមគ្រូបង្រៀនកម្ពុជាឯករាជ្យលោក រ៉ុង ឈុន និងអ្នកស្រី តែ ម៉ានីរ៉ុង ជាសមាជិក គ.ជ.ប រួមទាំងលោក គួយ ប៊ុនរឿន ជាអនុប្រធានគ.ជ.ប បានលាឈប់ព្រមគ្នាកាលពីថ្ងៃទី២០ ខែវិច្ឆិកា។ មានតែលោក ហ៊ីង ធារិទ្ធ ដែលជ្រើសចេញពីកូតាបក្សប្រឆាំងម្នាក់ប៉ុណ្ណោះ ក្នុងចំណោមមនុស្សទាំង ៤នាក់នេះ នៅបន្តក្រាញននៀលក្នុងតួនាទីជាសមាជិកគ.ជ.ប ទៀត។
ដោយឡែក លោក ហ៊ុន សែន ដែលអះអាងថា នឹងមិនលូកដៃចូលកិច្ចការផ្ទៃក្នុងរបស់ស្ថាប័នជាតិរៀបចំការបោះឆ្នោតនោះ បែរជាបានបង្គាប់ឲ្យគ.ជ.ប គួរជ្រើសរើសអនុប្រធានគ.ជ.ប មកពីគណបក្សហ៊្វុនស៊ិនប៉ិច ជំនួសលោក គួយ ប៊ុនរឿន ហើយសមាជិក ២រូបទៀត ត្រូវយកពីគណបក្សសញ្ជាតិកម្ពុជា និងពីស្ថាប័នអង្គការមិនមែនរដ្ឋាភិបាល ជំនួសអោយលោក រ៉ុង ឈុន និងអ្នកស្រី តែ ម៉ានីរ៉ុង៕