មន្ត្រីក្រុមប្រឹក្សាឃុំសង្កាត់ គណបក្សសង្គ្រោះជាតិ នៅខេត្តកំពង់ធំ ធ្វើយុទ្ធនាធិការជួបជុំគ្នាពង្រឹងបក្សទ្រង់ទ្រាយធំ នៅតាមមូលដ្ឋាន។ នៅក្នុងយុទ្ធនាការនេះ ពួកគាត់ប្ដេជ្ញាប្រកាន់ជំហរថា នឹងមិនទៅជ្រកក្រោមដំបូងទេវតា ជាដាច់ខាត បើគណបក្សត្រូវរំលាយក៏ដោយ។
មន្ត្រីគណបក្សសង្គ្រោះជាតិខេត្តកំពង់ធំ មានជំនឿថា គណបក្សរបស់ខ្លួននៅតែខ្លាំង ព្រោះមានប្រជាពលរដ្ឋគាំទ្រច្រើន។ លោក ស៊ុន ចទ្ធី ឲ្យដឹងនៅថ្ងៃទី១១ វិច្ឆិកា ថា ក្រុមប្រឹក្សាឃុំសង្កាត់គណបក្សរបស់លោក ស្មោះស្ម័គ្រចំពោះគណបក្សខ្លួន ដើម្បីបម្រើប្រជាពលរដ្ឋទៅមុខទៀតដោយមិនងាករេឡើយ។ ប្រធានគណបក្សសង្គ្រោះជាតិ ខេត្តកំពង់ធំ រូបនេះអះអាងទៀតថា ចាប់ពីថ្ងៃនេះតទៅសមាជិកក្រុមប្រឹក្សាគណបក្សរបស់លោក នឹងធ្វើយុទ្ធនាការពង្រឹងគណបក្សនៅតាមស្រុកឃុំទូទាំងខេត្តតែម្ដង។ លោកថា ជាក់ស្ដែងនៅថ្ងៃទី១១ វិច្ឆិកា មានសមាជិកក្រុមប្រឹក្សាឃុំរបស់គណបក្សលោកជាង ១០០នាក់ បានជួបជុំគ្នានៅស្រុកស្ទោង និងស្រុកប្រាសាទបល្ល័ង្គ។ លោកអះអាងទៀតថា ជំនួបនោះសមាជិកទាំងអស់បានប្រកាន់ជំហរថា បើទោះបីជាថ្មីៗនេះ លោកនាយក រដ្ឋមន្ត្រី ហ៊ុន សែន គំរាមថា គណបក្សសង្គ្រោះជាតិ នឹងត្រូវរំលាយក្នុងពេលឆាប់ៗក៏ដោយ ក៏ពួកគេមិនទៅចុះចូលគណបក្សកាន់អំណាចនោះឡើយ៖ «ពួកយើងមកធ្វើនយោបាយនេះ ក្នុងគោលបំណងមួយដើម្បីជួយកំណែលម្អសង្គម ជួយប្រជាពលរដ្ឋដែលជួបភាពអយុត្តិធម៌ ដូច្នេះពួកយើងមកធ្វើនយោបាយមិនដែលបានគិតថា មកយកផលប្រយោជន៍ ឬសម្លឹងឃើញប្រាក់កម្រៃបន្តិចបន្តួច ពីតួនាទីនោះទេ។ ដូច្នេះបើសិនជាថ្ងៃមុខ គណបក្សសង្គ្រោះជាតិ ត្រូវបានគេរំលាយមែនគឺយើងមានការងារផ្សេងទៀត ដែលយើងត្រូវធ្វើ តែយើងដាច់ខាតមិនចុះចូលជាមួយកាន់អំណាចទេ»។
មន្ត្រីស៊ើបអង្កេតជាន់ខ្ពស់អង្គការខុមហ្រ្វែល (Comfrel) លោក កន សាវាង្ស អះអាងថា ការជួបជុំគ្នាពង្រឹងគណបក្សពុំមានអ្វីខុសច្បាប់នោះទេ លើកលែងតែការជួបជុំធ្វើកុបកម្ម ដែលនាំឲ្យចលាចលនៅក្នុងសង្គមទើបច្បាប់ហាមឃាត់៖ «ហើយត្រូវការគាំពារពីអាជ្ញាធរថែមទៀតផង ហើយអាជ្ញាធរបើសិនជាគ្រាន់តែថា សួរនាំតិចតួចហើយមានការសម្រួលដល់សុវត្ថិភាព វាមិនបញ្ហាទេ។ ប៉ុន្តែបើមានការរារាំង ឬការហាមឃាត់ក្នុងការជួបជុំការប្រមូលផ្ដុំនៅក្នុងទីស្នាក់ការរបស់គេ ឬក្នុងផ្ទះសកម្មជនរបស់គេគឺជាការអនុវត្តផ្ទុយហើយ គឺមិនត្រូវតាមធម្មនុញ្ញ តាមច្បាស់ដែលមានចែង ពីសិទ្ធិ សេរីភាព ក្នុងលទ្ធិប្រជាធិបតេយ្យទេ»។
នៅខេត្តកំពង់ធំ រហូតមកទល់ពេលនេះ ទើបមានសមាជិកក្រុមប្រឹក្សាឃុំសង្កាត់គណបក្សសង្គ្រោះជាតិ ដែលចុះចូលគណបក្សកាន់អំណាចចំនួន៧នាក់ទេ ក្នុងចំណោមសមាជិកក្រុមប្រឹក្សាគណបក្សសរុបចំនួន ៣២២នាក់នោះ។ លោក ស៊ុន ចន្ធី អះអាងថា ចាប់ពីពេលនេះតទៅ គឺគ្មានសមាជិកគណបក្សណាម្នាក់ទៅជ្រកក្រោមទង់ទេវតាទៀតទេ៕