សហគមន៍ខ្មែរក្នុងប្រទេសកាណាដា អំពាវនាវឲ្យក្រុមតំណាងរាស្ត្រពីខាងគណបក្សសង្គ្រោះជាតិ នាំគ្នាទាមទារឲ្យអគ្គលេខាធិការនៃអង្គការសហប្រជាជាតិ (អ.ស.ប) ដោះស្រាយវិបត្តិនយោបាយនៅកម្ពុជា។ មន្ត្រីជាន់ខ្ពស់នៃគណបក្សសង្គ្រោះជាតិ សាទរចំពោះការអំពាវនាវនេះ។
ក្រុមសម្ព័ន្ធខ្មែរ-កាណាដា ស្នើដល់តំណាងរាស្ត្ររបស់គណបក្សសង្គ្រោះជាតិ ទាំងឡាយដែលកំពុងរងការយាយី និងការធ្វើទុក្ខបុកម្នេញផ្នែកនយោបាយពីសំណាក់រដ្ឋាភិបាលលោក ហ៊ុន សែន ត្រូវរួសរាន់បង្ហាញវត្តមាន និងប្រមូលផ្ដុំគ្នានៅទីស្នាក់ការរបស់អង្គការសហប្រជាជាតិ ក្នុងទីក្រុងញូវយ៉ក សហរដ្ឋអាមេរិក ឲ្យបានមុនថ្ងៃទី១៦ ខែវិច្ឆិកា ដែលតុលាការកំពូលគ្រោងបើកសវនាការករណីបណ្ដឹងរម្លាយបក្សប្រឆាំង។
ការប្រមូលផ្ដុំនេះ ដើម្បីប្ដឹងដល់អគ្គលេខាធិការនៃអង្គការអន្តរជាតិដ៏កំពូលមួយនេះ អំពីស្ថានការណ៍នយោបាយប្រកាសអាសន្ននៅកម្ពុជា និងការស្វែងរកដំណោះសមរម្យដល់ក្រុមបក្សប្រឆាំង។
ប្រធានគណៈកម្មការក្រុមប្រឹក្សាភិបាលនៃអង្គការសម្ព័ន្ធខ្មែរ-កាណាដា ក្នុងទីក្រុងម៉ុងត្រេអាល់ (Montreal) លោក អ៊ូ សុន បានប្រាប់អាស៊ីសេរី តាមទូរស័ព្ទថា ស្របពេលដែលសហគមន៍អន្តរជាតិ រួមមានតំណាងរាស្ត្រសហរដ្ឋអាមេរិក និងសហភាពអឺរ៉ុប បានគំរាមដាក់ទណ្ឌកម្មធ្ងន់ៗដល់រដ្ឋាភិបាល លោក ហ៊ុន សែន ដែលកំពុងសម្លាប់នយោបាយរបស់ក្រុមបក្សប្រឆាំងនោះ ដូច្នេះក្រុមតំណាងរាស្ត្ររបស់បក្សសង្គ្រោះជាតិ ដែលកំពុងមានវត្តមាននៅក្រៅប្រទេសទាំងអស់គួរឆ្លៀតឱកាសនាំគ្នាប្ដឹងចំពោះមុខអគ្គលេខាធិការនៃអង្គការសហប្រជាជាតិឲ្យជួយដោះស្រាយបញ្ហារបស់ពួកគេដែលកំពុងប្រឈមនឹងហានិភ័យនេះ។
លោក អ៊ូ សុន៖ «ខ្មែរយើងមានការបែកបាក់គ្នា អ៊ីចឹងហើយមនោគមវិជ្ជាផ្សេងគ្នា ដូច្នេះទាល់មានតែអន្តរជាតិ និងបណ្ដាប្រទេសដែលជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស និងអង្គការសហប្រជាជាតិហ្នឹងឯងទើបអាចមានលទ្ធភាពដោះស្រាយបញ្ហានៅកម្ពុជា បាននេះបាន»។
ការអំពាវនាវរបស់មន្ត្រីជាន់ខ្ពស់នៃអង្គការសម្ព័ន្ធខ្មែរ-កាណាដា រូបនេះធ្វើឡើងស្របពេលដែលអ្នកតំណាងរាស្ត្រគណបក្សសង្គ្រោះជាតិ ចំនួន ៤៣រូប ចេញសេចក្ដីថ្លែងការណ៍រួម អំពាវនាវឲ្យមន្ត្រី និងសមាជិកគណបក្សសង្គ្រោះជាតិ កុំក្បត់ឧត្ដមគតិ និងកុំជឿតាមការឃោសនាអកុសលរបស់លោក ហ៊ុន សែន កំពុងអូសទាញពួកគេឲ្យចុះចូលជាមួយបក្សកាន់អំណាច និងកុំមិនក្បត់ឆន្ទៈរាស្ត្រដែលខំបោះឆ្នោតឲ្យគណបក្សប្រឆាំងនោះ។
តំណាងរាស្ត្រម្នាក់ពីខាងគណបក្សសង្គ្រោះជាតិ ដែលកំពុងមានវត្តមានក្នុងប្រទេសកាណាដា លោក ទួន យូដា បានយល់ស្របជាមួយនឹងអង្គការសម្ព័ន្ធខ្មែរ-កាណាដា ដែលចង់ឲ្យតំណាងរាស្ត្របក្សសង្គ្រោះជាតិ នាំគ្នាជួបជាមួយមន្ត្រីជាន់ខ្ពស់នៃអង្គការសហប្រជាជាតិអំពីករណីកម្ពុជា បច្ចុប្បន្ន៖ «ក្នុងនាមយើងជាតំណាងរាស្ត្រទាំង ៥៥រូប តំណាងឲ្យពលរដ្ឋជិតកន្លះនគរ ដូច្នេះយើងត្រូវពឹងពាក់ទៅអង្គការសហប្រជាជាតិ អោយអង្គការនេះជួយរកដំណោះស្រាយ ឥឡូវយើងសល់ច្រកតែមួយហ្នឹងទេ»។
អង្គការសម្ព័ន្ធខ្មែរ-កាណាដា ក៏បានស្នើឲ្យគណបក្សសង្គ្រោះជាតិ អនុវត្តគោលការណ៍ចំនួន ៥ចំណុចរួមមាន៖
ទី១ កុំទទួលយកដាច់ខាតចំពោះការដាក់សម្ពាធណាមួយដែលជាលេសឆ្ពោះទៅរកការចរចាផ្នែកនយោបាយទ្វេភាគី។ ទី២ ផ្អាកការចរចានយោបាយទ្វេភាគីគ្រប់ទម្រង់ទាំងអស់រវាងគណបក្សសង្គ្រោះជាតិ និងគណបក្សប្រជាជនកម្ពុជា មុខពេលលោក កឹម សុខា ប្រធានគណបក្សសង្គ្រោះជាតិ និងអ្នកទោសមនសិការទាំងអស់ត្រូវបានដោះលែង។ ទី៣ គាំទ្រសេចក្ដីសម្រេចក្នុងការថ្កោលទោស និងការដាក់សម្ពាធលើរបបផ្ដាច់ការនៅកម្ពុជា បច្ចុប្បន្ន។ ទី៤ គាំទ្រនិងអនុវត្តន៍តាមលិខិតចំហរបស់អង្គការអន្តរជាតិចំនួន ៥៥ ចុះថ្ងៃទី២៣ ខែតុលា ស្នើទៅកាន់អង្គការសហប្រជាជាតិឲ្យកោះប្រជុំជាបន្ទាន់ដើម្បីដោះស្រាយវិបត្តិនយោបាយនៅកម្ពុជា។ ទី៥ ស្នើដល់អង្គការសហប្រជាជាតិ និងបណ្ដាប្រទេសជាម្ចាស់សហហត្ថលេខី ដែលមានកាតព្វកិច្ចជួយដល់កម្ពុជា ចូលរួមទាំងស្រុងក្នុងការជំរុញឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌នៅឆ្នាំ២០១៨ ខាងមុខនេះ៕