ស្ថានទូតសហរដ្ឋអាមេរិកប្រចាំនៅកម្ពុជា បញ្ជាក់ជំហរថា សហរដ្ឋអាមេរិក នៅតែបន្តគាំទ្រគោលដៅបោសសម្អាតមីន និងយុទ្ធភណ្ឌមិនទាន់ផ្ទុះឲ្យអស់ពីកម្ពុជា ត្រឹមឆ្នាំ២០២៥។ ប៉ុន្តែ មន្ត្រីជាន់ខ្ពស់អង្គការស៊ីម៉ាក់ (CMAC) អះអាងថា បើអាមេរិក មិនបន្តជួយតទៅទៀត ក៏រដ្ឋាភិបាលលោក ហ៊ុន សែន អាចដោះស្រាយបញ្ហាថវិកានេះដោយខ្លួនឯងបានដែរ។
ស្ថានទូតសហរដ្ឋអាមេរិក បញ្ជាក់ជំហរបែបនេះ ប្រាប់អាស៊ីសេរី នៅថ្ងៃទី៧ ខែវិច្ឆិកា ដោយអះអាងថា សហរដ្ឋអាមេរិក នៅតែបន្តប្ដេជ្ញាសហការគ្នាក្នុងភាពដៃគូជាមួយប្រជាពលរដ្ឋកម្ពុជា ដើម្បីបន្តគាំទ្រ គោលដៅរបស់ប្រទេសកម្ពុជា ក្នុងការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះដែលបន្សល់ទុកពីសម័យសង្គ្រាមស៊ីវិលឲ្យអស់ពីកម្ពុជា នៅត្រឹមឆ្នាំ២០២៥។
មន្ត្រីនាំពាក្យរងនៃស្ថានទូតអាមេរិក ប្រចាំនៅកម្ពុជា លោក ដេវីត ចូសារ (David Josar) ប្រាប់អាស៊ីសេរី តាមសារអេឡិចត្រូនិក (Email) ថា សហរដ្ឋអាមេរិក ប្ដេជ្ញាបោសសម្អាតយុទ្ធភណ្ឌមិនទាន់ផ្ទុះដែលជាសំណល់សង្គ្រាមរបស់អាមេរិក។ លោក ដេវីត ចូសារ បញ្ជាក់បន្ថែមថា ជំនួយផ្នែកបោសសម្អាតយុទ្ធភណ្ឌមិនទាន់ផ្ទុះនេះ គឺជាចំណុចអាទិភាពមួយរបស់ក្រសួងការបរទេសអាមេរិក ដែលរហូតមកដល់ពេលនេះ សហរដ្ឋអាមេរិកបានចំណាយថវិកាអស់ជាង ១៣១លានដុល្លាររួចមកហើយ ដើម្បីជួយផ្នែកបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះនៅកម្ពុជា។ លោកបញ្ជាក់ទៀតថា អាមេរិកនឹងនៅតែបន្តផ្ដល់ជំនួយក្នុងផ្នែកនេះ ដើម្បីឆ្លុះបញ្ចាំងអំពីការយកចិត្តទុកដាក់របស់អាមេរិកលើសារសំខាន់នៃកិច្ចការនេះ។
ជំហររបស់ស្ថានទូតអាមេរិកនេះ ធ្វើឡើងក្រោយពីប្រធានមជ្ឈមណ្ឌលសកម្មភាពកម្ចាត់មីនកម្ពុជា ឬហៅកាត់ថា ស៊ីម៉ាក់ (CMAC) លោក ហេង រតនា បានសរសេរសារលើហ្វ៊េសប៊ុក (Facebook) របស់លោកកាលពីថ្ងៃទី៦ ខែវិច្ឆិកា ដោយសម្ដែងការសោកស្ដាយ និងខកចិត្តយ៉ាងខ្លាំងចំពោះអ្វីដែលលោកអះអាងថា ជាការបញ្ចប់ជំនួយយ៉ាងតក់ក្រហល់របស់អាមេរិក ក្នុងផ្នែកបោសសម្អាតមីន និង យុទ្ធភណ្ឌមិនទាន់ផ្ទុះនៅកម្ពុជា។ លោក ហេង រតនា បញ្ជាក់ថា លោកទទួលបានព័ត៌មាននេះពីអង្គការ អ៊ិន.ភី.អេ (NPA) ដែលជាអង្គការដៃគូជាមួយស៊ីម៉ាក់ ថា ស្ថានទូតអាមេរិក បានសម្រេចកាត់ផ្ដាច់ជំនួយមនុស្សធម៌របស់ខ្លួនមកស៊ីម៉ាក់ ចាប់ពីដើមខែមករា ឆ្នាំ២០១៨ តទៅ ដោយគ្មានការបញ្ជាក់ហេតុផលអ្វីច្បាស់លាស់ឡើយ។
តបទៅនឹងការលើកឡើងនេះ មន្ត្រីនាំពាក្យរងនៃស្ថានទូតអាមេរិក ប្រចាំនៅកម្ពុជា លោក ដេវីត ចូសារ បញ្ជាក់ថា កម្មវិធីជំនួយបច្ចុប្បន្ននេះ នឹងបញ្ចប់នៅខែធ្នូ ឆ្នាំ២០១៧ នេះហើយ ក៏ប៉ុន្តែ សហរដ្ឋអាមេរិក មានបំណងផ្ដល់មូលនិធិសម្រាប់ផ្នែកនេះតទៅទៀត ដោយឈរលើមូលដ្ឋាននៃការប្រកួតប្រជែងមួយ។ លោកបញ្ជាក់បន្ថែមថា គម្រោងស្នើសុំថវិកាមួយដែលនឹងរៀបចំឡើង ដោយមានការពិគ្រោះយោបល់គ្នាជាមួយរដ្ឋាភិបាលកម្ពុជា នឹងដាក់ចេញនៅក្នុងខែវិច្ឆិកា នេះឯង។
ទោះជាប្រធានមជ្ឈមណ្ឌលសកម្មភាពកម្ចាត់មីន លោក ហេង រតនា សម្ដែងការសោកស្ដាយ និងខកចិត្តយ៉ាងខ្លាំងពេលឮដំណឹងថា អាមេរិកអាចបញ្ចប់កម្មវិធីជំនួយនេះក៏ដោយ ក៏លោកមិនបារម្ភអំពីការខ្វះថវិកាក្នុងការបន្តសកម្មភាពកម្ចាត់មីននេះទេ ព្រោះលោកបានទទួលការណែនាំពីលោកនាយករដ្ឋមន្ត្រី ហ៊ុន សែន ដោយផ្ទាល់ថា រដ្ឋាភិបាលមានថវិកាខ្លួនឯង ដើម្បីដោះស្រាយបញ្ហានេះ ចាប់ពីដើមខែមករា ឆ្នាំ២០១៨ តទៅ បើអាមេរិកផ្ដាច់ជំនួយមែននោះ។ លោក ហេង រតនា អះអាងថា ថវិកាដែលដាក់ជំនួសនេះ រដ្ឋាភិបាលកម្ពុជា នឹងប្រមូលពីដៃគូដទៃទៀត។
លោក ហេង រតនា មិនបញ្ជាក់ថា ដៃគូដទៃទៀតដែលផ្ដល់ថវិកានេះ មានប្រទេសណាខ្លះទេ ប៉ុន្តែ លោក ដេវីត ចូសារ លើកឡើងថា ថវិកាជំនួយរបស់អាមេរិកកន្លងមក មិនមែនជួយបោសសម្អាតតែយុទ្ធភណ្ឌមិនទាន់ផ្ទុះរបស់អាមេរិកប៉ុណ្ណោះទេ ប៉ុន្តែ ជួយបោសសម្អាតគ្រាប់មីនដ៏គ្រោះថ្នាក់បំផុតរបស់ចិន វៀតណាម និងសូវៀត ផងដែរ៕