សង្គមស៊ីវិលធ្វើការងារផ្នែកបោះឆ្នោតលើកឡើងថា ក្រុមមន្ត្រីគណបក្សប្រឆាំងដែលរត់ទៅចុះចូលជាមួយគណបក្សប្រជាជនកម្ពុជា តាមការអំពាវនាវរបស់លោក ហ៊ុន សែន មិនបានធ្វើឲ្យប៉ះពាល់ដំណើរការការងារ និងរចនាសម្ព័ន្ធរបស់គណបក្សនៅតាមឃុំ-សង្កាត់ឡើយ។ ចំណែកតំណាងរាស្ត្រគណបក្សសង្គ្រោះជាតិ បញ្ជាក់ថា គណបក្សរបស់លោកកំពុងរៀបចំបញ្ជីឈ្មោះបេក្ខជនដើម្បីបញ្ជូនទៅក្រសួងមហាផ្ទៃ ឲ្យទទួលស្គាល់ជាមុនសិនមុនពេលបញ្ជូនទៅ គ.ជ.ប។
មន្ត្រីជាន់ខ្ពស់នៃអង្គការខុមហ្វ្រែល (COMFREL) លោក កន សាវាង្ស ប្រាប់ថា នៅពេលដែលគណបក្សនយោបាយចូលរួមប្រកួតប្រជែងក្នុងការបោះឆ្នោត គ.ជ.ប តម្រូវអោយគណបក្សដែលបាត់បង់បេក្ខជនពេញសិទ្ធិ និងបេក្ខជនបម្រុងណាមួយត្រៀមដាក់បេក្ខជនបំពេញបន្ថែម។
ខណៈមានការចាកចេញរបស់សមាជិកក្រុមប្រឹក្សាឃុំ សង្កាត់ ស្រុក ខណ្ឌ ខេត្ត របស់គណបក្សសង្គ្រោះជាតិ ម្ដងមួយៗទៅចូលរួមជាមួយគណបក្សប្រជាជនកម្ពុជា លោក កន សាវាង្ស មើលឃើញថា គណបក្សសង្គ្រោះជាតិ មានលទ្ធភាពយកបេក្ខជនថ្មីទៅជំនួសអ្នកដែលលាឈប់ទាំងនោះបាន៖ «បើសិនជាបេក្ខជនណាមួយបាត់ គេរុញឡើង។ ឧទាហរណ៍ថា បាត់លេខរៀងទី១ អ៊ីចឹងគេរុញលេខរៀងទី២ឡើង។ បើកាលណាអ្នកពេញសិទ្ធិអស់ហើយ គេយកបម្រុងមកបន្ថែមទៀត អាហ្នឹងអត់អីទេ»។
លោក កន សាវាង្ស បន្តទៀតថា បើទោះបីជារូបភាពនៃការចាកចេញ លើទិដ្ឋភាពនយោបាយជាការបង្ហាញថា គណបក្សនេះមានការបែកបាក់ក្តី ប៉ុន្តែមិនចោទជាបញ្ហាដល់គណបក្សប្រឆាំងឡើយ។
ការលើកឡើងរបស់លោក កន សាវាង្ស ធ្វើឡើងខណៈការបោះឆ្នោតព្រឹទ្ធសភានឹងត្រូវចាប់ផ្ដើមនៅដើមឆ្នាំ២០១៨ ខាងមុខ។
សមាជិកសភាគណបក្សសង្គ្រោះជាតិ លោក អ៊ូ ច័ន្ទរ័ត្ន ប្រាប់អាស៊ីសេរី នៅថ្ងៃទី៧ ខែវិច្ឆិកា នេះថា គណបក្សរបស់លោកកំពុងធ្វើការតាមនីតិវិធី ដោយលុបឈ្មោះអ្នកចាកចេញពីគណបក្សជាមុនសិន បន្ទាប់មកត្រូវបញ្ជូនឈ្មោះបេក្ខជនថ្មីទៅក្រសួងមហាផ្ទៃ។ លោកបន្តថា ក្រោយពីក្រសួងមហាផ្ទៃ ទទួលស្គាល់រួច គណបក្សនឹងបញ្ជូនឈ្មោះបេក្ខជនទាំងនោះទៅគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប។
ទោះជាយ៉ាងណាក៏ដោយ លោក អ៊ូ ច័ន្ទរ័ត្ន នៅមិនទាន់ឲ្យដឹងពីចំនួនបេក្ខជនដែលគណបក្សយកទៅដាក់ជំនួសអ្នកដែលរត់ចោលគណបក្សសង្គ្រោះជាតិ នៅឡើយទេ៖ «មិនមានបញ្ហាអីក្នុងគណបក្សទេ។ លេខបម្រុងយើងមាន គ្រាន់តែការសម្រេចរបស់ខេត្តនីមួយៗរបស់គណបក្សមិនទាន់បានសម្រេចចិត្តពីដំបូងមក ប៉ុន្តែបន្ទាប់ពីហ្នឹងមក អ្នកដែលលាចេញយើងចាប់ផ្ដើមដាក់ឈ្មោះដាក់អីទៅក្រសួងមហាផ្ទៃ ស្នើដាក់ជំនួសហើយ ហើយអ្នកថ្មីៗយើងកំពុងរៀបចំធ្វើបណ្ដើរៗ»។
នៅពេលសារព័ត៌មានក្នុងស្រុកដែលស្និទ្ធនឹងលោក ហ៊ុន សែន ចុះផ្សាយថា មានមន្ត្រីគណបក្សសង្គ្រោះជាតិ ជាង ៦០រូបហើយបានទៅចុះចូលជាមួយគណបក្សប្រជាជនកម្ពុជា លោក អ៊ូ ច័ន្ទរ័ត្ន អះអាងថា របាយការណ៍ដែលលោកទទួលបានគឺមានមន្ត្រីគណបក្សសង្គ្រោះជាតិ ចំនួន ៤៩នាក់ប៉ុណ្ណោះ ដែលបានចាកចេញពីគណបក្សសង្គ្រោះជាតិ។
ទោះយ៉ាងនេះក្តីលោកថា ចំនួននេះមិនដល់មួយភាគរយផង បើធៀបចំនួនសមាជិកក្រុមប្រឹក្សាសមាជិកសភា និងសមាជិកព្រឹទ្ធសភារបស់គណបក្សសង្គ្រោះជាតិ ដែលមានជិត ៦ពាន់នាក់នោះ។
ខណៈចំនួនក្រុមប្រឹក្សារបស់គណបក្សប្រឆាំងរត់មកចុះចូលជាមួយគណបក្សប្រជាជនកម្ពុជា នៅតិចតួចនេះ លោក ហ៊ុន សែន បានអំពាវនាវតាមទូរទស្សន៍ផង និងតាមហ្វេសប៊ុក (Facebook) ផង ទទូចឲ្យពួកគេចាកចោលដំបូលព្រះអាទិត្យមករួមរស់ក្រោមទង់ទេវតាវិញម្តង។
មេដឹកនាំគណបក្សកាន់អំណាចដែលលើកបន្តុបដោយរដ្ឋាភិបាលវៀតណាម និងជាអតីតទាហានខ្មែរក្រហមរូបនេះ ក៏បានប្រកាសផ្ដល់ជម្រើសរបស់មន្ត្រីគណបក្សប្រឆាំងមានតែពីរគត់ គឺទៅធ្វើស្រែចម្ការ ឬចុះចូលនឹងបក្សកាន់អំណាច។
ចំណែកមេឃុំស្រែគរ ស្រុកសេសាន ខេត្តស្ទឹងត្រែង លោក សៀក មេគង្គ ប្ដេជ្ញាថា លោកមិនរត់ចោលគណបក្សសង្គ្រោះជាតិ និងរត់ចោលតំណែងរបស់លោកដែលទទួលបានពីគាំទ្ររបស់ពលរដ្ឋប្រជាពលរដ្ឋនោះឡើយ។ លោកបន្តថា តម្លៃរបស់លោកគឺការស្មោះត្រង់នឹងគណបក្សសង្គ្រោះជាតិ និងពលរដ្ឋ ដូច្នេះលោកមិនក្បត់ឆន្ទៈ និងភាពស្មោះត្រង់របស់លោកទៅចុះចូលជាមួយគណបក្សប្រជាជនកម្ពុជា ដើម្បីរក្សាតំណែងដដែលតាមការអូសទាញរបស់លោក ហ៊ុន សែន នោះឡើយ៖ «ខ្ញុំស្មោះត្រង់ជាមួយបងប្អូនហើយ ខ្ញុំសុខចិត្តអត់តំណែងក៏អត់ចុះ ខ្ញុំសុខចិត្តធ្វើស្រែចម្ការសាមញ្ញធម្មតា។ ជំហររបស់ខ្ញុំនៅដដែល ពីព្រោះយើងមិនបានធ្វើអីខុសទេ ធ្វើត្រឹមត្រូវតាមរដ្ឋធម្មនុញ្ញ តាមតួនាទី»។
ចំណែកសមាជិកក្រុមប្រឹក្សាគណបក្សប្រឆាំងមួយចំនួនដែលបានចុះចូលជាមួយគណបក្សកាន់អំណាចរអ៊ូរទាំថា ពលរដ្ឋលែងសូវរាប់រកពួកគេដូចមុនទៀតហើយ។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ អះអាងថា បើទោះបីជាគណបក្សសង្គ្រោះជាតិ កំពុងរងគ្រោះ ប៉ុន្តែលោកថា បញ្ហានេះក៏ជាឱកាសធ្វើឲ្យគណបក្សនេះដឹងថា មាននរណាខ្លះនៅស្ម័គ្រស្មោះ ហើយនរណាខ្លះទៀតរត់ចោលបក្សនៅពេលបក្សជួបបញ្ហា។ លោកបន្តថា អ្នកនយោបាយដែលចេញពីគណបក្សមួយទៅគណបក្សមួយដើម្បីរក្សាអំណាច ឬតំណែងរបស់ខ្លួនគឺជាអ្នកធ្វើនយោបាយដើម្បីតែអំណាចនិងបុណ្យស័ក្ដិតែប៉ុណ្ណោះ មិនមែនដើម្បីប្រយោជន៍ពលរដ្ឋពិតប្រាកដនោះទេ៕