មន្ត្រីសង្គមស៊ីវិលដែលតាមដានព្រឹត្តិការណ៍នយោបាយយល់ថា បើបក្សប្រឆាំងមិនត្រូវបានរំលាយទេ ពេលនោះចរន្តនៃអ្នកដែលរត់ចុះចូលជាមួយបក្សកាន់អំណាច គឺដូចជួយសម្អាតនូវភាពមន្ទិលផ្ទៃក្នុងបក្សដូច្នេះដែរ។
ការលើកឡើងបែបបេះ របស់អ្នកតាមដានព្រឹត្តិការណ៍នយោបាយ ខណៈដែលមន្ត្រីគណបក្សសង្គ្រោះជាតិ មួយចំនួនតូចរត់ទៅចុះចូលជាមួយគណបក្សប្រជាជនកម្ពុជា ជាបន្តបន្ទាប់ ក្រោយពីមានការអំពាវនាវពីលោក ហ៊ុន សែន និងព្រមានថា គណបក្សប្រឆាំងនឹងត្រូវរំលាយចោល។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា ស្ថានការណ៍នយោបាយសព្វថ្ងៃនេះ មើលទៅឃើញថា គណបក្សសង្គ្រោះជាតិ កំពុងរងគ្រោះ ប៉ុន្តែលោកថា បញ្ហានេះក៏ជាឱកាសធ្វើឲ្យគណបក្សនេះដឹងថា មានអ្នកណាខ្លះនៅស្ម័គ្រស្មោះ និងអ្នកណាខ្លះរត់ចោលបក្សនៅពេលបក្សជួបបញ្ហា។ មន្ត្រីសង្គមស៊ីវិលរូបនេះបន្តថា អ្នកនយោបាយដែលចេញពីគណបក្សមួយទៅគណបក្សមួយដើម្បីរក្សាអំណាច ឬតំណែងរបស់ខ្លួន គឺអ្នកធ្វើទាំងនោះធ្វើនយោបាយដើម្បីតែអំណាចនឹងបុណ្យស័ក្ដិតែប៉ុណ្ណោះ មិនមែនដើម្បីប្រជាពលរដ្ឋនោះទេ៖ «កត្តាធម្មជាតិក្ដី រឿងទាក់ទងនឹងជីវភាពក្ដី គេហៅថា ការរកឃើញមនុស្សស្មោះត្រង់ មនុស្សក្លាហាន ដែលគួរអោយទុកចិត្តហ្នឹង គឺរកឃើញនៅពេលដែលមានខ្យល់ព្យុះបោកបក់។ អ៊ីចឹងមនុស្សកំសាកតែងតែរត់គេចពីការតតាំង ទប់ទល់នឹងព្យុះភ្លៀង»។
ការលើកឡើងបែបនេះរបស់អ្នកឃ្លាំមើលស្ថានការណ៍នយោបាយ ខណៈលោកនាយករដ្ឋមន្ត្រី ហ៊ុន សែន ស្រែកដង្ហោយហៅតាមទូរទស្សន៍ និងហ្វេសប៊ុក (Facebook) ផង ឲ្យមន្ត្រីបក្សប្រឆាំងដែលទទួលបានតួនាទី ព្រោះការបោះឆ្នោតរបស់ពលរដ្ឋមកចុះចូលជាមួយលោក ហើយលោកនឹងរក្សាមុខតំណែងពួកគេឲ្យនៅដដែល។
ទោះយ៉ាងណាក្ដី ការណ៍ដែលលោក ហ៊ុន សែន អំពាវនាវញឹកញាប់នោះ ត្រូវបានមន្ត្រីគណបក្សសង្គ្រោះជាតិ អះអាងថា មានមន្ត្រី ឬសកម្មជនរបស់ខ្លួនតិចតួចណាស់ ដែលរត់ទៅចុះចូលជាមួយលោក ហ៊ុន សែន។
សមាជិកព្រឹទ្ធសភាគណបក្សប្រឆាំង លោក សោ ចាន់ដេត ប្រាប់ថា ក្នុងចំណោមសមាជិកសភា និងក្រុមប្រឹក្សា ខេត្ត ក្រុង ស្រុក ខណ្ឌ និងឃុំសង្កាត់របស់គណបក្សសង្គ្រោះជាតិ ជិត ៦ពាន់នាក់ ទើបតែមានមន្ត្រីគណបក្សសង្គ្រោះជាតិ ចុះចូលគណបក្សប្រជាជនកម្ពុជា ប្រហែលជាង ៤០នាក់ ដែលរត់ចោលជួរទាំងនោះ ភាគច្រើនតាមរយៈការអូសទាញពីមន្ត្រីគណបក្សកាន់អំណាច។
ចំណែកសមាជិកសភាមកពីគណបក្សសង្គ្រោះជាតិ លោក សួន រីដា សរសេរនៅលើហ្វេសប៊ុក ឌឺដងទៅលោក ហ៊ុន សែន ថា ការដែលលោក ហ៊ុន សែន និយាយម្ដងហើយម្ដងទៀតចង់បានក្រុមប្រឹក្សាឃុំ ស្រុក ខេត្ត របស់គណបក្សយកទៅធ្វើការ ប្រហែលជាលោក ហ៊ុន សែន ដឹងថា មន្ត្រីរបស់គាត់ធ្វើការបម្រើរាស្ត្រមិនកើត ទើបចង់បានមន្ត្រីបក្សប្រឆាំងទៅធ្វើការ។
ឆ្លើយតបទៅនឹងការពពាយនាយរបស់លោក ហ៊ុន សែន អតីតប្រធានគណបក្សសង្គ្រោះជាតិ លោក សម រង្ស៊ី បានអំពាវនាវពីក្រៅប្រទេសជាថ្មីម្ដងទៀត កុំមន្ត្រីគណបក្សសង្គ្រោះជាតិ ទៅចុះចូលជាមួយគណបក្សប្រជាជនកម្ពុជា តាមការអូសទាញរបស់លោក ហ៊ុន សែន។ លោកថា សម្រេចចុះចូលបក្សកាន់អំណាចថា សម្រេចចិត្តខុសទៅនឹងឧត្ដមគតិរបស់ពលរដ្ឋម្ចាស់ឆ្នោត ដែលបោះឆ្នោតឲ្យពួកគេ មិនតែប៉ុណ្ណោះ ក៏ជាការសម្រេចចិត្តខុសទៅនឹងផលប្រយោជន៍ផ្ទាល់ខ្លួនរបស់អ្នកទាំងនោះដែរ៖ «នរណាដែលទៅចុះចូលហ្នឹងខុសហើយ ជឿតាម ហ៊ុន សែន ភ។ បើចង់មកចុះចូលជាមួយគណបក្សសង្គ្រោះជាតិវិញ ក៏អត់ តំណែងខាងបក្សសង្គ្រោះជាតិ ក៏បាត់ អាទទួលតំណែងខាងគេ (បក្សប្រជាជន) ក៏អត់»។
ខណៈដែលលោក ហ៊ុន សែន សង្ឃឹមថា តុលាការកំពូលនឹងរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ខាងមុខនេះ សមាជិកព្រឹទ្ធសភាអាមេរិកមកពីគណបក្សសាធារណៈ និងជាអតីតបេក្ខជនប្រធានាធិបតី លោក ថេត គ្រូស (Ted Cruz) ប្រចាំរដ្ឋ តិចសាស់ (Texas) បានដាក់ឱសានវាទដល់រដ្ឋាភិបាល លោក ហ៊ុន សែន ឲ្យដោះលែងលោក កឹម សុខា ត្រឹមថ្ងៃទី៩ ខែវិច្ឆិកា ខាងមុខជាកំហិត។ ចំណែកសមាជិកក្រុមប្រឹក្សាឃុំ-សង្កាត់ និងមន្ត្រីមន្ត្រីគណបក្សសង្គ្រោះជាតិ ដែលស្មោះនឹងបក្សសង្គ្រោះជាតិថា សុខចិត្តទៅធ្វើស្រែ បើគណបក្សសង្គ្រោះជាតិត្រូវរំលាយ ក៏មិនចុះចូលជាមួយលោក ហ៊ុន សែន ដែរ៕