ពលរដ្ឋដែលចូលរួមនៅក្នុងព្រះរាជពិធីបុណ្យអុំទូក បង្ហាញការភ្ញាក់ផ្អើលនៅពេលដឹងថា អាវប៉ូលិស និងទាហាន ត្រូវបានដាក់លក់ដោយសេរីនៅក្នុងពិធីបុណ្យអុំទូក។ ពួកគាត់ស្នើឲ្យអាជ្ញាធរបង្ក្រាបសកម្មភាពនេះដោយផ្ដើមចេញពីអ្នកលក់ជាមុន។
យុវតីម្នាក់រស់នៅខែត្រព្រៃវែង មកដើរលេងនៅក្នុងពិធីបុណ្យអុំទូកនៅមុខព្រះបរមរាជវាំង រាជធានីភ្នំពេញ ឲ្យដឹងថា គាត់បានប្រទះឃើញអាវដែលមានអក្សរជាភាសាអង់គ្លេសដាក់ថា ប៉ូលិស (Police) និងទាហាន (Army) ត្រូវបានគេដាក់លក់ជាច្រើននៅតាមផ្សារក្នុងរាជធានីភ្នំពេញ និងនៅតាមតូបខ្លះនៅតំបន់កោះពេជ្រ។ ពលរដ្ឋរូបនេះស្នើឲ្យសមត្ថកិច្ចបង្ក្រាបការតាំងលក់អាវប៉ូលិសនេះដែលដាក់តាំងលក់ជាសាធារណៈ៖ «»។
កាលពីយប់ថ្ងៃទី៣ ខែវិច្ឆិកា កម្លាំងសមត្ថកិច្ចបានឃាត់ខ្លួនមនុស្សជាង ១០០នាក់ ដែលពាក់អាវមានអក្សរ Police និង Army ដើរលេងក្នុងពិធីបុណ្យអុំទូក នៅកន្លែងគោលដៅផ្សេងៗគ្នា។ គេហទំព័រអគ្គស្នងការនគរបាលជាតិ បានស្រង់សម្ដីស្នងការរាជធានីភ្នំពេញ លោក ជួន សុវណ្ណ ថា ការឃាត់ខ្លួនពលរដ្ឋជាង ១០០នាក់ ដែលពាក់អាវមានអក្សរប៉ូលិស និងទាហាន ដោយសារសង្ស័យមានចេតនាមិនល្អនៅពិធីបុណ្យអុំទូក។
លោក ជួន សុវណ្ណ អះអាងថា ក្រោយពីសួរនាំប្រជាពលរដ្ឋថា ពួកគាត់ដើរកម្សាន្តធម្មតាទេ ដោយសាររដូវនេះជារដូវរងា ដូច្នេះពួកគាត់បានទិញអាវប្រភេទអាវរងានេះពាក់ មានមនុស្សចាស់ ក្មេងជំទង់ ប្រុសស្រី ។ សមត្ថកិច្ចបញ្ជាក់ថា ការឃាត់ខ្លួនមនុស្សជាង ១០០នាក់នេះ នៅតាមគោលដៅផ្សេងៗគ្នា ក្នុងរាត្រីថ្ងៃអុំទូកថ្ងៃទី២។ ក្រោយពីសាកសួររួច សមត្ថកិច្ចបញ្ជាក់ថា ពលរដ្ឋទាំងជាង ១០០នាក់នោះ មិនមានចេតនាអាក្រក់នោះទេ សមត្ថកិច្ចបានអនុញ្ញាតឲ្យពួកគាត់ដើរលេងកម្សាន្តវិញ ប៉ុន្តែដកហូតយកអាវដែលមានពាក្យ Police និង Army ដើម្បីរក្សាទុក។
មេប៉ូលិសក្រុងភ្នំពេញ លោក ជួន សុវណ្ណ ប្រាប់គេហទំព័រប៉ូលិសដដែលថា លោកគ្រោងនឹងស្នើសុំអភិបាលរាជធានីភ្នំពេញ ដើម្បីអំពាវនាវឲ្យគ្រប់អាជីវករលក់ដូរតាមបណ្ដាផ្សារនានា នៅរាជធានីភ្នំពេញ ឈប់លក់អាវដែលមានអក្សរដូចខាងលើនេះតទៅទៀត ជៀសវាងមានការយល់ច្រឡំ។
ពលរដ្ឋដើរលេងបុណ្យអុំទូកម្នាក់ទៀតប្រាប់ថា ក្រោយបានដឹងរឿងនេះ លោកព្រួយបារម្ភថា អាចមានជនខិលខូចស្លៀកសម្លៀកបំពាក់ប៉ូលិស និងទាហាន ឆ្លៀតឱកាសបង្កើតចលាចលនៅក្នុងព្រះរាជពិធីបុណ្យអុំទូក។ លោកយល់ស្របនឹងសមត្ថកិច្ចដែលកោះហៅពលរដ្ឋពាក់អាវប៉ូលិស និងទាហានទាំងនោះយកមកណែនាំ ប៉ុន្តែលោកស្នើឲ្យអាជ្ញាធរចាត់វិធានការលើកន្លែងលក់អាវប៉ូលិស និងទាហានទាំងនោះ៖ «»។
អភិបាលរាជធានីភ្នំពេញ លោក ឃួង ស្រេង តាមរយៈសារព័ត៌មានក្នុងស្រុក បានអំពាវនាវដល់អាជីវករទាំងអស់ និងអ្នករកស៊ីនាំចូលសំលៀកបំពាក់ ស្នើសុំបញ្ឈប់ការលក់ និងនាំចូលនូវសម្លៀកបំពាក់ និងឧបករណ៍ដែលមានអក្សរប៉ូលិស និងទាហានតទៅទៀតជាបន្ទាន់ ព្រោះការនាំចូល និងលក់សម្ភារៈកងកម្លាំងប្រដាប់អាវុធអាចនឹងមានទោសតាមផ្លូវច្បាប់។
ចំណែកពលរដ្ឋម្នាក់ទៀតជាអ្នករស់នៅក្រុងភ្នំពេញ ប្រាប់ថា លោកមិនបាននៅចូលរួមពិធីបុណ្យអុំទូកមុខព្រះបរមរាជវាំងចតុមុខនោះទេ ដោយលោកទៅកម្សាន្តនៅតាមខែត្រ។ ប៉ុន្តែ លោកសប្បាយចិត្តនៅពេលដែលបានដឹងថា សមត្ថកិច្ចគ្រាន់តែព្រមានពលរដ្ឋដែលពាក់អាវប៉ូលិស និងទាហាន ដោយមិនចាត់វិធានការផ្សេងៗ។ លោកយល់ថា សមត្ថកិច្ចគួរចាត់វិធានការទៅលើអ្នកលក់វិញ៖ «»។
ដោយឡែក កាលពីព្រឹកថ្ងៃទី៣ ខែវិច្ឆិកា សមត្ថកិច្ចបានចាប់មនុស្ស ២នាក់ ដែលសង្ស័យថា បានយកដាវទៅគំរាមជំរិតទារប្រាក់ពីពលរដ្ឋដើរលេងកម្សាន្តក្នុងព្រះរាជពិធីបុណ្យអុំទូកថ្ងៃទី២ នៅម្ដុំវត្តពោធិយារ៉ាម ហៅវត្តចាស់ ស្ថិតនៅភូមិ១ សង្កាត់ជ្រោយចង្វារ ខណ្ឌជ្រោយចង្វារ។
តាមរបាយការណ៍របស់ប៉ូលិស ជនសង្ស័យបានយកដាវទៅជំរិតទារប្រាក់ និងជំរិតទារទូរស័ព្ទពីពលរដ្ឋដែលដើរលេងកម្សាន្តនៅក្នុងព្រះរាជពិធីបុណ្យអុំទូក នៅពេលនោះកម្លាំងល្បាតក្នុងគោលដៅប្រទះឃើញទើបបង្ក្រាបបានតែម្ដង៕