មន្ត្រីសហគមន៍នេសាទនៅស្រុកឯកភ្នំ ខេត្តបាត់ដំបង សម្ដែងការខកចិត្តយ៉ាងខ្លាំង ចំពោះមន្ត្រីរដ្ឋបាលជលផល និងអាជ្ញាធរ ពាក់ព័ន្ធនៅក្នុងខេត្តនេះថា បណ្ដោយឲ្យអ្នកមានលុយមួយក្រុមតូច ធ្វើនេសាទខុសច្បាប់នៅតំបន់ព្រៃលិចទឹកបឹងទន្លេសាប ដោយសេរី និងពុំមានការទប់ស្កាត់ឡើយ។
មន្ត្រីសហគមន៍នេសាទរូបនេះ អះអាងថា ការធ្វើនេសាទខុសច្បាប់នេះ បានប៉ះពាល់យ៉ាងខ្លាំងដល់ប្រជាពលរដ្ឋធ្វើនេសាទជាលក្ខណៈគ្រួសារ ធ្វើឲ្យពួកគាត់មិនអាចរកប្រាក់ចំណូលដោះស្រាយជីវភាពគ្រួសារប្រចាំថ្ងៃបាន។
សហគមន៍នេសាទនៅស្រុកឯកភ្នំ អះអាងថា បញ្ហានេសាទខុសច្បាប់នៅតំបន់បឹងទន្លេសាបក្នុងខេត្តបាត់ដំបងឆ្នាំនេះ កើតមានឡើងជាច្រើនឆ្នាំកន្លងទៅ។
អនុប្រធានសហគមន៍នេសាទស្ដីក្រោមរហាលសួង លោក ហោ សំអាត ឲ្យដឹងនៅថ្ងៃទី២៨ តុលា ថា ក្រុមអ្នកមានលុយប្រមាណ ១០នាក់ បានឆក់ឱកាសនយោបាយកំពុងឡើងកម្ដៅ នាំគ្នាធ្វើនេសាទខុសច្បាប់ ដោយប្រើឧបករណ៍នេសាទមងក្រឡាញឹក ឬហៅថាបណរ៉ាវ ដាក់ចាប់ត្រីទាំងតូចទាំងធំនៅតំបន់ភូមិព្រែកត្រប់ ឃុំព្រែកនរិន្ទ និងភូមិបាក់ព្រា ឃុំព្រៃចាស់ ស្រុកឯកភ្នំ យ៉ាងគគ្រឹកគគ្រេង ដោយពុំមានអាជ្ញាធរណាទប់ស្កាត់នោះទេ។
លោក ហោ សំអាត អះអាងទៀតថា ការធ្វើនេសាទនេះមួយកន្លែងៗ ចម្ងាយជិត១០គីឡូម៉ែត្រ ដែលធ្វើឲ្យប្រជាពលរដ្ឋក្រីក្រមិនអាចចូលទៅធ្វើនេសាទជាលក្ខណៈគ្រួសារ ដើម្បីរកប្រាក់ដោះស្រាយជីវភាពប្រចាំថ្ងៃបានទេ។
ឆ្លើយតបនឹងបញ្ហានេះ នាយផ្នែករដ្ឋបាលជលផលប្រចាំនៅភូមិព្រែកទាល់ លោក សៀង ដារិទ្ធ មានប្រសាសន៍ថា លោកមិនអាចទទួលបានទេ ដែលសហគមន៍នេសាទអះអាងថា បទល្មើសនេសាទឆ្នាំនេះ មានសភាពធំធេងជាងឆ្នាំកន្លងទៅ។ លោកថា រឿងនេះមិនមែនជា ព័ត៌មានពិតឡើយ។ ទោះជាយ៉ាងណាមន្ត្រីជលផលរូបនេះ ទទួលស្គាល់ថា ការធ្វើនេសាទខុសច្បាប់នៅតំបន់បឹងទន្លេសាប កើតមានខ្លះប្រាកដមែន ប៉ុន្តែ មិនច្រើនទេ។ លោកបន្ថែមថា បញ្ហានេះ មន្ត្រីជលផល ក៏កំពុងចាត់វិធានការណ៍ដូចភ្លៀងរលឹមដែរ។
ទោះជាយ៉ាងនេះក្ដី សហគមន៍នេសាទស្ដីក្រោមរហាលសួង លោក សំអាត អះអាងថា បញ្ហានេសាទខុសច្បាប់នេះ កន្លងមកលោកបានដាក់លិខិតស្នើទៅនាយខណ្ឌរដ្ឋបាលជលផលខេត្តបាត់ដំបង ឲ្យចាត់វិធានការជិត ២ខែហើយ ក៏ប៉ុន្តែពុំមានការឆ្លើយតបនឹងសំណូមពររបស់លោកទេ។
សហគមន៍នេសាទរូបនេះ សង្កត់ធ្ងន់ទៀតថា ប្រសិនបើអាជ្ញាធរពាក់ព័ន្ធរវល់តែរឿងនយោបាយដោយមិនទប់ស្កាត់ចំពោះអ្នកធ្វើនេសាទខុសច្បាប់ទេ គឺនៅរដូវសម្រកខាងមុខ ប្រជាពលរដ្ឋដែលប្រកបរបរធ្វើនេសាទ ប្រមាណ ៣ពាន់គ្រួសារនៅស្រុកឯកភ្នំ នឹងមិនអាចធ្វើនេសាទរកប្រាក់ចំណូលដោះស្រាយជីវភាពពួកគាត់បានឡើយ។ មិនតែប៉ុណ្ណោះលោកថា តំបន់បឹងទន្លេសាបប្រឈមនឹងការហិនហោចត្រីនៅថ្ងៃខាងមុខជាពុំខាន៕