លោកនាយករដ្ឋមន្ត្រី អះអាងថា លោកមិនឈឺក្បាលវិលមុខចំពោះសម្ពាធអន្តរជាតិ ហើយក៏មិនបារម្ភចំពោះការគំរាមដាក់ទណ្ឌកម្មសេដ្ឋកិច្ច របស់ពិភពលោកចំពោះកម្ពុជានោះដែរ។ យ៉ាងណាក៏ដោយអ្នកវិភាគនយោបាយ យល់ឃើញថា នេះជារបៀបរបស់អ្នកនយោបាយ ហើយក៏ជារបៀបធ្វើនយោបាយដែរ បើទោះជាដឹងខ្លួនចាញ់ហើយ ក៏មិនប្រកាសថាចាញ់ដែរ។
ការបង្ហាញសាច់ដុំនៅក្នុងសប្ដាហ៍នេះ ប្រឆាំងនឹងសម្ពាធអន្តរជាតិរបស់លោក ហ៊ុន សែន ត្រូវបានអ្នកវិភាគ មើលឃើញថា អាចនឹងធ្វើឲ្យរដ្ឋាភិបាល ត្រូវក្លាយជារដ្ឋឯកោដូចបណ្ដាប្រទេសមួយចំនួន នៅលើពិភពលោក ជាពិសេសនឹងរុញច្រានឲ្យកម្ពុជាត្រូវអស់ផ្លូវដើរទៅវិញទេ។
ការរិះគន់ពីជំហររបស់លោកនាយករដ្ឋមន្ត្រី នៅពេលនេះ ស្របពេលលោកប្រមុខបក្សកាន់អំណាច បានធ្វើសេចក្ដីសម្រេចចិត្តមួយ នៅក្នុងកិច្ចប្រជុំគណៈរដ្ឋមន្ត្រី កាលពីព្រឹកថ្ងៃទី ២៧ តុលា នៅទីស្ដីការគណៈរដ្ឋមន្ត្រី។ កាសែតក្នុងស្រុក បានចុះផ្សាយដោយស្រង់សំដីរបស់អ្នកនាំពាក្យគណៈរដ្ឋមន្ត្រី លោក ផៃ ស៊ីផាន មកបញ្ជាក់ថា លោក ហ៊ុន សែន គ្មានពេលទៅកាន់ទឹកដី សហរដ្ឋអាមេរិកនោះទេ។ ប៉ុន្តែ ការជាន់ទឹកដីមហាអំណាចផ្នែកសព្វាវុធនេះ ដោយមន្ត្រីណាមួយនោះ វាគឺជារឿងដាច់ដោយឡែកប៉ុណ្ណោះ។ ជាងនេះទៀត លោក ហ៊ុន សែន អះអាងថា លោកពុំមានលុយកាក់ត្រូវតម្កល់ទុកនៅបរទេសឡើយ ក្រៅពីលុយដែលត្រូវធ្វើសាលារៀន សម្រាប់ការអប់រំតែប៉ុណ្ណោះ។
ប្រតិកម្មរបស់ប្រធានគណបក្សប្រជាជនកម្ពុជានេះ ស្របពេលអន្តរជាតិ បូករួមទាំងប្រទេសមហាអំណាចមួយចំនួន រួមមានសហរដ្ឋអាមេរិកជាដើម បង្ហាញជំហរមិនគាំទ្រ ដែលសហគមន៍អន្តរជាតិ ចាត់ទុកថា លោក ហ៊ុន សែន កំពុងរុញឲ្យកម្ពុជាដើរដល់គំនូសបន្ទាត់ក្រហម។
ថ្លែងពីប្រទេស អ៊ីតាលី មុនមួយថ្ងៃកាលពីថ្ងៃទី ២៦ តុលា ក្នុងនាមជាអ្នកគាំទ្របក្សប្រឆាំងគឺលោក សម រង្ស៊ី ថ្លែងថា គម្រោងនៃការរំលាយបក្សសង្គ្រោះជាតិ ពីសំណាក់បក្សកាន់អំណាចត្រូវបរាជ័យហើយ។ លោកបន្តថា ការរំលាយបក្សប្រឆាំង គឺត្រូវទាមទារមានសេចក្ដីសម្រេចចិត្តពីគណៈកម្មការនាយកជាមុនសិន។ ក្នុងន័យនេះអតីតមេបក្សប្រឆាំង អះអាងថា គណៈកម្មការនាយកបានចាកចេញពីប្រទេសអស់ហើយ ហេតុនេះគម្រោងនៃការរំលាយគឺពុំអាចទៅរួចឡើយ។
លោក សម រង្ស៊ី ដែលត្រូវហ៊ុមព័ទ្ធទៅដោយបណ្ដឹងនៅក្នុងតុលាការក្រុងភ្នំពេញ ជាច្រើនសំណុំរឿងនោះ បានអះអាងថា វិបត្តិនយោបាយនៅកម្ពុជានៅពេលនេះ កំពុងស្ថិតក្រោមការតាមដាន ដោយយកទុកចិត្តទុកពីសហគមន៍អន្តរជាតិ។ មិនតែប៉ុណ្ណោះ ការបង្ហាញជំហរពីប្រទេសមហាអំណាច ក្នុងពេលកម្ពុជាកំពុងជួបវិបត្តិនយោបាយនេះ នឹងជាសម្ពាធដែលមិនអាចបើកផ្លូវឲ្យរដ្ឋាភិបាល ធ្វើអ្វីតាមចិត្តនឹកឃើញកើតទៀតនោះឡើយ។
អ្នកវិភាគនយោបាយ មើលឃើញថា មកដល់ដំណាក់កាលនេះ ភាគីនយោបាយទាំងសង្ខាងគឺហាក់ដើរដល់ផ្លូវទាល់ច្រករៀងៗខ្លួន។ ប្រសិនបើបក្សកាន់អំណាច ហ៊ានរំលាយបក្សប្រឆាំង នោះនឹងធ្វើឲ្យមានផលអាក្រក់កាន់តែខ្លាំង ដល់ការរីកលូតលាស់ផ្នែកសេដ្ឋកិច្ចទាំងមូល។ ប៉ុន្តែ បើបក្សប្រឆាំង អាចនៅមានជីវិតនយោបាយបន្ត នោះបក្សប្រជាជនកម្ពុជា ត្រូវចូលខ្លួនប្រកួតជាមួយដៃគូដែលខ្លាំងបំផុតដែរ នៅលើសង្វៀននយោបាយលើកនេះ។
លោកបណ្ឌិត មាស នី អ្នកវិភាគនយោបាយ ទទួលស្គាល់ថា ជាធម្មតានេះជារបៀបនៃការធ្វើនយោបាយ របស់អ្នកនយោបាយ។ បើទោះជាបែបណា អ្នកវិភាគរូបនេះ យល់ឃើញថា ការរំលាយបក្សប្រឆាំង វាមិនងាយនោះឡើយ ហើយអ្នកដែលទទួលថ្មបាក់ និងគ្រោះអាក្រក់នេះមិនមែនតែបក្សប្រឆាំងទេ គឺរដ្ឋាភិបាលដែរ។ ក្រៅពីនេះ សំឡេងបក្សប្រឆាំង កាន់តែកើនឡើង នេះក៏ជាប្រផ្នូលមិនល្អប៉ុន្មាននោះដែរ សម្រាប់បក្សកាន់អំណាច។ យ៉ាងណាលោកបណ្ឌិត មាស នី យល់ឃើញថា ប្រសិនលោក ហ៊ុន សែន មិនខ្វល់ពីទណ្ឌកម្មសេដ្ឋកិច្ច របស់ពិភពលោក ហើយងាកទៅពឹងចិន និងរុស្សី នេះជារឿងដែលអាក្រក់បំផុតថែមទៀត សម្រាប់កម្ពុជា។ លោកបន្តថា កម្ពុជាធ្លាប់ឆ្លងកាត់ពិសោធន៍ច្រើនណាស់មកហើយជាមួយចិន តែជាលទ្ធផលកម្ពុជាពុំដែលបានចំណេញប៉ុន្មាននោះទេ។
បើទោះជាបែបណា លោក ហ៊ុន សែន ដែលមានប្រវត្តិជានាយករដ្ឋមន្ត្រី កាន់អំណាចយូរជាងគេនៅក្នុងតំបន់អាស៊ីនេះ ហាក់មិនខ្វល់នឹងសម្ពាធអន្តរជាតិឡើយ។ ប្រធានគណបក្សប្រជាជនកម្ពុជារូបនេះ ប្រកាសពីការកាន់កាប់អំណាចដោយរឹងមាំ ហើយប្រឆាំងដាច់ខាត អ្នកដែលប៉ុនប៉ងធ្វើឲ្យកម្ពុជាជួបវិបត្តិ៕