Clik here to view.
ក្រុមគ្រួសាររបស់ស្ត្រី ដែលបានស្លាប់ទាំងម្ដាយ និងកូន កាលពីថ្ងៃទី២៨ ខែឧសភា ឆ្នាំ២០១៦ នៅក្នុងបន្ទប់សម្រាលនៃមជ្ឈមណ្ឌលស្រលាញ់ទារក ឬហៅថា ពេទ្យជប៉ុន បានទទូចឲ្យសាលាដំបូងរាជធានីភ្នំពេញ ពន្លឿននីតិវិធីក្នុងការផ្ដល់យុត្តិធម៌។
អស់រយៈពេលជិតកន្លះឆ្នាំហើយ ដែលក្រុមគ្រួសាររបស់កម្មការិនី ឈា សារិន ហៅស្រីមុំ រង់ចាំយុត្តិធម៌។ លោក ជូ ភារ៉ា បាត់បង់ទាំងប្រពន្ធ និងកូនស្រីពៅ នៅតែរក្សាជំហរចោទគ្រូពេទ្យ និង ថ្នាក់ដឹកនាំនៃមន្ទីរពេទ្យជប៉ុន ថាធ្វេសប្រហែស ទើបបណ្ដាលឲ្យប្រពន្ធកូនស្លាប់។ លោកទទូចឲ្យស្ថាប័នតុលាការពន្លឿនសវនាការឲ្យបានឆាប់រហ័ស ខណៈដែលបច្ចុប្បន្ននេះ ក្រុមគ្រួសារលោក រស់នៅមិនមានសុភមង្គលទេ ក្រោយប្រពន្ធស្លាប់ចោល។
កាលពីព្រលប់ថ្ងៃទី២៨ ឧសភា កម្មការិនីឈ្មោះ ឈា សារិន បានស្លាប់នៅលើគ្រែសម្រាលកូន ខណៈកំពុងសម្រាល។ ស្វាមីរបស់សពកម្មការិនី ឈា សារិន គឺលោក ជូ ភារ៉ា ចោទថា ការស្លាប់របស់ប្រពន្ធ និងកូន បណ្ដាលមកពីក្រុមគ្រូពេទ្យមិនយកចិត្តទុកដាក់ និងរើសអើងប្រពន្ធលោកជាកម្មការិនីរោងចក្រមានប័ណ្ណសមាជិកបេឡាជាតិរបបសន្តិសុខសង្គម (ប.ស.ស)។
ក្រោយពីស្វាមីកម្មការិនី អះអាងថា ក្រុមគ្រូពេទ្យ និងថ្នាក់ដឹកនាំមន្ទីរពេទ្យជប៉ុនរត់គេច មិនព្រមចេញមុខពន្យល់ក្រុមគ្រួសារ នៅពេលស្លាប់ប្រពន្ធកូនរួចមក លោកបានដាក់ពាក្យប្ដឹងទៅតុលាការ។
តំណាងអយ្យការអមសាលាដំបូងរាជធានីភ្នំពេញ កាលពីថ្ងៃទី១១ ខែកក្កដា បានកោះហៅប្ដីរបស់កម្មការិនី ឈា សារិន ដើម្បីទៅបំភ្លឺនៅថ្ងៃទី១៣ កក្កដា លើពាក្យបណ្ដឹងដែលបានប្ដឹងថ្នាក់ដឹកនាំនៃមន្ទីរពេទ្យជប៉ុន ដែលធ្វេសប្រហែសបណ្ដាលឲ្យប្រពន្ធ និងកូនរបស់លោកស្លាប់។
បើទោះជាបែបនេះក្ដី លោក ជូ ភារ៉ា ប្រាប់ថា ចាប់តាំងពីថ្ងៃនោះមក លោក និងកូនប្រុសទាំង២ កំពុងរង់ចាំថ្ងៃសវនាការ ប៉ុន្តែបានស្ងប់ស្ងាត់ មិនទាន់លឺមានការកោះហៅនោះទេ។ លោក ជូ ភារ៉ា បន្ថែមថា មេធាវីការពារក្ដីឲ្យលោក នឹងធ្វើលិខិតមួយដើម្បីជំរុញតុលាការបន្ថែមទៀត ប្រសិនបើពាក្យបណ្ដឹងរបស់ លោក មិនត្រូវបានដោះស្រាយនោះទេ។
អាស៊ីសេរីមិនអាចទាក់ទងសុំការបំភ្លឺពីអ្នកនាំពាក្យស្ថាប័នអយ្យការអមសាលាដំបូងរាជធានីភ្នំពេញ លោក លី សុផាណា បានទេ នៅថ្ងៃទី២៦ ខែតុលា
នាយិកាអង្គការសីលការ អ្នកស្រី ធីតា ឃិះ យល់ថា ករណីនេះ ដើម្បីកុំឲ្យបន្តខូចឈ្មោះ របស់មន្ទីរពេទ្យ ឬ គ្រូពេទ្យនោះ អ្នកទទួលខុសត្រូវនៃមន្ទីរពេទ្យ គួរតែចេញមុខពន្យល់ឲ្យក្រុមគ្រួសារអស់ចិត្ត។
មន្ទីរពេទ្យនៃមជ្ឈមណ្ឌលជាតិគាំពារមាតា និងទារក ធ្លាប់ចេញសេចក្ដីបំភ្លឺជូនគ្រួសារសព និងសាធារណជនថា ករណីស្លាប់កម្មការិនី ឈា សារិន ពេលសម្រាលកូនកាលពីថ្ងៃទី២៨ ឧសភា គឺជាឧបទ្ទវហេតុ ហើយក្រុមគ្រូពេទ្យជំនាញរបស់មន្ទីរពេទ្យខំប្រឹងប្រែងជួយអស់ពីលទ្ធភាព។
ស្វាមីសពកម្មការិនី គឺ លោក ជូ ភារ៉ា អះអាងថា ការស្លាប់ប្រពន្ធ និងកូន មិនអាចត្រឹមតែចេញសេចក្ដីថ្លែងការណ៍មួយ ដើម្បីលាងខ្លួន ហើយបន្តមិនមានភាពទទួលខុសត្រូវបែបនេះបាននោះទេ។
លោក ជូ ភារ៉ា បន្ដថា បើទោះជាលោក និងពលរដ្ឋទូទៅ មិនសូវជឿលើប្រព័ន្ធតុលាការកម្ពុជា តែសម្រាប់លោក គ្រាន់តែជាសហជីពក្រៅរោងចក្រម្នាក់ គ្មានជម្រើសអ្វី ក្រៅពីប្ដឹងទៅតុលាការ និងដេករង់ចាំយុត្តិធម៌នោះទេ៕
