អាជ្ញាធរនៅខែត្រតាកែវ អះអាងថា បានរកឃើញគ្រាប់បែកមួយគ្រាប់ ប្រភេទ MK 82 ទម្ងន់ ២២៧ គីឡូក្រាម មួយគ្រាប់ទៀត ស្ថិតនៅទីតាំងក្នុងភូមិថ្មី សង្កាត់រកាក្រៅ ក្រុងដូនកែវ ខែត្រតាកែវ។ គ្រាប់បែកមួយគ្រាប់នោះ ត្រូវបានអាជ្ញាធរមូលដ្ឋានរាយការណ៍ទៅមន្ត្រីជំនាញរួចរាល់ហើយ។
អភិបាលខែត្រតាកែវ លោក ឡាយ វណ្ណៈ បានប្រាប់សារព័ត៌មានក្នុងស្រុកថា ពិតជាមានការរកឃើញគ្រាប់បែកមួយគ្រាប់ ទម្ងន់ជាង២០០គីឡូក្រាមមែន ដែលស្ថិតក្នុងទឹកដីក្រុងដូនកែវ។ ការរកឃើញនេះ គឺបន្ទាប់ពីពលរដ្ឋបានកាប់គាស់ដី ហើយប្រទះឃើញ។ ប៉ុន្តែទោះយ៉ាងណា គ្រាប់នោះមិនបានផ្ទុះ នោះទេ។
គ្រាប់បែកប្រភេទ MK 82 មួយគ្រាប់នេះ ត្រូវបានប្រជាពលរដ្ឋកាយដីប្រទះឃើញ នៅព្រឹកថ្ងៃទី២៥ ខែតុលា ឆ្នាំ២០១៧។ សារព័ត៌មានដែលស្និតនឹងលោកនាយករដ្ឋមន្ត្រី ហ៊ុន សែន ឈ្មោះ ហ្វ្រេសញូវ (Fresh News) ចុះផ្សាយថា បន្ទាប់ពីប្រទះឃើញ ប្រជាពលរដ្ឋបានរាយការណ៍ទៅកម្លាំងការិយាល័យគ្រប់គ្រងអាវុធជាតិផ្ទុះ និងបានចុះទៅពិនិត្យកន្លែងដែលប្រទះឃើញគ្រាប់ គឺជាប្រភេទគ្រាប់ទម្លាក់ពីយន្តហោះ MK82 ដែលមានទម្ងន់សរុប២២៧គីឡូក្រាម។
ចាប់តាំងពីក្រោយពេលដែលរដ្ឋាភិបាលសហរដ្ឋអាមេរិក បិទទិដ្ឋាការចូលសហរដ្ឋអាមេរិករបស់មន្ត្រីដឹកនាំក្រសួងការបរទេសកម្ពុជាមក លោកនាយករដ្ឋមន្ត្រី ហ៊ុន សែន បានណែនាំឲ្យមន្ត្រីរដ្ឋាភិបាល ទៅរកមើលគ្រាប់បែកគីមីរបស់សហរដ្ឋអាមេរិកដែលបន្សល់ក្នុងទឹកដីកម្ពុជា។ ជាហូរហែក្រោយមក ការរកឃើញទីតាំងគ្រាប់បែកគីមី និងផលប៉ះពាល់នៃគ្រាប់បែករបស់សហរដ្ឋអាមេរិក ត្រូវបានមន្ត្រីរដ្ឋាភិបាលរកឃើញជាញឹកញាប់ ទាំងនៅខែត្រស្វាយរៀង និងតំបន់ផ្សេងទៀត។
ជុំវិញចំណាត់ការដោះគ្រាប់បែកគីមី១គ្រាប់ ដែលរកឃើញនៅក្នុងក្រុងដូនកែវ កាលពីថ្ងៃទី២៥ តុលា អាស៊ីសេរី នៅមិនទាន់អាចសុំការពន្យល់បន្ថែមពីអគ្គនាយកមជ្ឈមណ្ឌលកម្ចាត់មីនកម្ពុជា ឬ ហៅថា ស៊ីម៉ាក់ (CMAC) បានទេ នៅថ្ងៃទី២៥ តុលា។ អាស៊ីសេរីក៏មិនទាន់អាចសុំការបកស្រាយបែបណាពីស្ថានទូតអាមេរិកប្រចាំនៅក្រុងភ្នំពេញ បានដែរ។
ប៉ុន្តែ ឯកអគ្គរដ្ឋទូតអាមេរិកលោក វីល្លៀម ហៃដ្ដ៍ (William Heidt) ធ្លាប់លាតត្រដាងថា សហរដ្ឋអាមេរិកបានចំណាយថវិកាអស់ជាង ១៦០លានដុល្លារ ក្នុងកិច្ចប្រឹងប្រែង ដើម្បីជួយដោះមីន និងគ្រាប់មិនទាន់ផ្ទុះនៅកម្ពុជា។ លោកថា ពាក់កណ្ដាលនៃទឹកប្រាក់នេះ ត្រូវបានប្រើប្រាស់ សម្រាប់ដោះមីនរបស់ចិន សូវៀត និងវៀតណាម នៅភាគខាងលិចប្រទេស គឺនៅតាមចម្ការមីនដែលមានគ្រោះថ្នាក់ ១០ដង លើសគ្រាប់ដែលទម្លាក់ដោយអាមេរិក។ មន្ត្រីនាំពាក្យទូតអាមេរិកធ្លាប់បញ្ជាក់ថា រដ្ឋាភិបាលកម្ពុជាមិនបានស្នើឲ្យអាមេរិកជួយដោះស្រាយបញ្ហាគ្រាប់គីមីនេះទេ ហើយបន្ថែមថា កម្ពុជាអាចប្រើប្រាស់ថវិកាអាមេរិកដែលត្រៀមសម្រាប់ដោះមីន ដើម្បីយកទៅដោះស្រាយបញ្ហាគ្រាប់គីមីទាំងនោះ។
នាយកប្រតិបត្តិអង្គការសម្ព័ន្ធគណនេយ្យសង្គម លោក សន ជ័យ យល់ថា ការរកឃើញគ្រាប់បែកគីមីនេះ មិនមែនជារឿងថ្មីនោះទេ ហើយគ្រាប់បែកដែលទម្លាក់នៅកម្ពុជា ក៏មិនមែនសុទ្ធតែរបស់សហរដ្ឋអាមេរិកដែរ ក៏មានគ្រាប់បែកចិន រុស្ស៊ី និងវៀតណាម ផងដែរ។ លោកមើលឃើញថា ការរកឃើញគ្រាប់បែក ឬផលប៉ះពាល់នៃគ្រាប់បែកនាពេលថ្មីៗនេះ គឺជាផ្នែកមួយនៃជម្លោះការទូតកម្ពុជា និង សហរដ្ឋអាមេរិក។
ចំណែករដ្ឋមន្ត្រីការពារជាតិកម្ពុជា លោក ទៀ បាញ់ ធ្លាប់ប្រាប់ក្រុមអ្នកសារព័ត៌មានថា កម្ពុជាពិតជាអាក់អន់ចិត្ត ដែលសហរដ្ឋអាមេរិក មកបំផ្លិចបំផ្លាញប្រទេសកម្ពុជាហើយ តែមិនសហការចូលរួមដោះស្រាយ។ លោករដ្ឋមន្ត្រីការពារជាតិ និងលោកនាយករដ្ឋមន្ត្រី ហ៊ុន សែន បានចោទសហរដ្ឋអាមេរិកថា មិនបានជួយដោះគ្រាប់បែកគីមីដែលអាមេរិកបានទម្លាក់នោះទេ ហើយពួកលោកថា រដ្ឋាភិបាលគណបក្សប្រជាជនកម្ពុជា នឹងព្យាយាមបោសសំអាតគ្រាប់បែកគីមី ដែលបន្សល់ដោយអាមេរិកឲ្យអស់ ដោយគ្មានជំនឿថា អាមេរិកមកដឹកគ្រាប់បែកពីកម្ពុជា ទៅវិញទៅទេ៕